Аляксандр Лукашэнка не прайшоў разам з Пуціным і іншымі гасцямі Крамля 300 метраў пешкі ў Аляксандраўскі сад
9.05.2023 / 11:14
Гэты і іншыя факты, а таксама яго бязрадасны выгляд на трыбуне і падчас асабістай сустрэчы з Пуціным даюць падставы думаць, што ён быў вымушаны паляцець у Маскву хворым.
Сумны Лукашэнка на парадзе ў Маскве. Кадр з відэа
У Аляксандраўскім садзе Лукашэнка прысутнічаў, яго туды давезлі электрамабілем. Трыбуну парада ад сада аддзяляе прыкладна 300 метраў.
Звяртае на сябе ўвагу таксама той факт, што толькі прэзідэнт Таджыкістана Эмамалі Рахмон надзеў на парад так званую георгіеўскую стужку. Прэзідэнты Узбекістана і Кыргызстана надзелі разеткі ў нацыянальных колерах, як і Аляксандр Лукашэнка — з кветкай яблыні, што лукашэнкаўцы зрабілі сімвалам 9 Мая ў Беларусі. Прэзідэнты Казахстана, Туркменістана і прэм'ер Арменіі абышліся без разетак.