Vienhryja nazvała ŭmovu dla źniaćcia vieta na €50 miljardaŭ dla dapamohi Ukrainie
13.12.2023 / 13:1
Budapiešt pa-raniejšamu vystupaje suprać čatyrochhadovaha płana dapamohi.
Bałaš Orban: Fota: Michel Euler / AP
Palityčny daradca Viktara Orbana zajaviŭ, što Vienhryja moža źniać vieta z pakieta dapamohi Ukrainie ŭ €50 młrd, kali JeC vydzielić prypynienaje letaś finansavańnie Budapieštu, piša RBK.
Vienhryja hatovaja źniać vieta na čatyrochhadovy pakiet padtrymki Ukrainy ŭ €50 młrd, prapanavanyja Jeŭrakamisijaj, kali ES razmarozić srodki padtrymki Budapiešta (kala €30 młrd), zajaviŭ hałoŭny palityčny daradca vienhierskaha premjer-ministra Viktara Orbana Bałaš Orban. Bałaš Orban nie maje rodnasnych suviaziaŭ z premjeram.
«Finansavańnie Vienhryi z boku ES i finansavańnie Ukrainy — heta dva asobnyja pytańni, — skazaŭ jon. — Ale kali ES nastojvaje na tym, što finansavańnie Ukrainy pavinna ažyćciaŭlacca sa źmienienaha biudžetu ES, tady hetyja dva pytańni stanoviacca ŭzajemazłučanymi».
U toj ža čas Budapiešt pa-raniejšamu vystupaje suprać čatyrochhadovaha płana dapamohi Ukrainie i paličyŭ za lepšaje b, kab ES prapanavaŭ Kijevu finansavańnie na adzin hod bieź źmien u biudžecie, adznačyŭ Bałaš Orban, dadaŭšy, što Vienhryja «razhledzić mahčymaść uniasieńnia ŭkładu» ŭ hety pakiet.
Pavodle jaho słoŭ, u ramkach pieramovaŭ ab dapamozie Ukrainie Vienhryja razhledzić prapanovu ES ab pavieličeńni finansavańnia achovy miežaŭ — pastajannaje patrabavańnie Budapiešta — a taksama dadatkovyja subsidyi ES, kab zrabić ekanomiku błoka bolš kankurentazdolnaj.
Adnak siabroŭstva Ukrainy ŭ ES zastajecca «čyrvonaj linijaj» dla Budapiešta, padkreśliŭ Bałaš Orban, pakolki Vienhryja ličyć jaje nie adpaviednaj kryteram.
U suviazi z hetym nieabchodna adkłaści pačatak pieramovaŭ ab dałučeńnia Kijeva da błoku, kab paźbiehnuć «adpraŭki niehatyŭnaha sihnału Ukrainie». «Adpraŭka niehatyŭnaha sihnału Ukrainie procilehłaja tamu, čaho choča Vienhryja», — zajaviŭ jon.
ES u minułym hodzie prypyniŭ pieradaču Vienhryi kala €30 młrd z-za prablem ź viaršenstvam zakona i chabarnictvam.
Dla razbłakavańnia ŭsioj sumy Budapieštu treba vykanać šerah patrabavańniaŭ — ad zabieśpiačeńnia akademičnaj svabody da abarony pravoŭ ŁHBT-supolnaści i pradastaŭleńnia prytułku.
Čakajecca, što ES da 13 śniežnia razbłakuje €10 młrd finansavańnia dla Vienhryi paśla pryniaćcia zakonaŭ, nakiravanych na niezaležnaść sudoŭ. Adnak Orban zajaviŭ, što Budapiešt choča atrymać usiu sumu.