U Biełarusi mohuć mocna źnizić limity biaspošlinnaha ŭvozu tavaraŭ praz naziemnyja miežy i ŭ pasyłkach
22.02.2024 / 10:8
Ministerstva finansaŭ Rasii nie padtrymała ideju zachavać pavyšanymi normy biaspošlinnaha ŭvozu tavaraŭ dla asabistaha karystańnia na biahučym uzroŭni. Pakolki hetyja normy ŭvodziać dla ŭsich krain JEAES, to źmieny buduć i dla Biełarusi.
Ilustracyjny zdymak. Fota: «Naša Niva»
Pryčym tut sankcyi?
Na biahučy momant limit pry ŭvozie tavaraŭ praz naziemnyja miežy składaje 1000 jeŭra i 31 kh. Pavyšanyja limity dziejničajuć z krasavika 2022 hoda. Na taki krok ułady pajšli dziela taho, kab nie dapuścić deficytu tavaraŭ praz uviedzienyja sankcyi. Inšymi słovami, dziaržava pryadkryła zasłonu i ŭklučyła zialonaje śviatło šeramu impartu. Da vajny i sankcyj biazmytny paroh składaŭ 500 jeŭra i 25 kh.
Maksimalnaja cana biaspošlinnaha ŭvozu tavaraŭ u pasyłkach moža źnizicca da 200 jeŭra.
Pieršapačatkova płanavałasia, što pavyšanyja normy buduć dziejničać da 1 kastryčnika 2022 hoda, ale paźniej dvojčy praciahvali termin dziejańnia pavyšanych limitaŭ.
Ciapier vyhladaje, što padaŭžeńnia nie budzie, pakolki, jak vynikaje z paviedamleńnia rasijskaha Minfina, «abstaviny, jakija pasłužyli padstavaj dla ŭviadzieńnia nazvanaj normy, da ciapierašniaha času ŭ značnaj miery vyčarpanyja».
Kali źmieny prymuć, to jany pačnuć dziejničać z 1 krasavika 2024 hoda.
Atrymlivajecca, što za amal dva hady dziejańnia sankcyj biznes i ekanomiki krain JEAES, pierš za ŭsio Rasii i Biełarusi, prystasavalisia da pracy ŭ novych umovach i patreba ŭ šerym imparcie źnikła.
Inšym dokazam taho, što Rasija i Biełaruś bolš nie majuć vialikaj patreby ŭ šerych pastaŭkach tavaraŭ, možna nazvać zabaronu na pieraprodaž u RF aŭtamabilaŭ, razmytnienych u Biełarusi z vykarystańniem ilhoty. Hetaja norma nabyvaje moc 1 krasavika.
Što heta aznačaje dla Biełarusi?
Dla šerahovych žycharoŭ źmianšeńnie limitaŭ biazmytnaha ŭvozu tavaraŭ z 1000 jeŭra i 31 kh da 500 jeŭra i 25 kh budzie aznačać rost cen na niekatoryja impartnyja tavary, jakija pad vyhladam rečaŭ dla asabistaha vykarystańnia čaŭnaki masava pryvozili ŭ krainu dla nastupnaj realizacyi. Častka takich tavaraŭ išła dalej u Rasiju.
Pamienšajuć zarobki čaŭnakoŭ i pradprymalnikaŭ, jakija zarablali na dastaŭcy i prodažy tavaraŭ ź ES.
Inšym čyńnikam, jaki taksama paŭpłyvaje na canu tavaraŭ dla spažyŭcoŭ i zarobki peŭnaj katehoryi hramadzian, stanie anansavanaje zakryćcio jašče dvuch punktaŭ propusku na miažy ź Litvoj, jakoje adbudziecca 1 sakavika.
Usio heta značna źmienšyć mahčymaści biełarusaŭ jeździć u susiednija krainy ES pa zakupy, kab sekanomić. Jak viadoma, šerah tavaraŭ, asabliva bytavaja technika, u ES kaštuje značna tańniej, čym u Biełarusi. Aproč hetaha vybar tam bolš šyroki.
Čytajcie taksama:
Za čatyry pajezdki ŭ Polšču moža atrymacca narmalnaja biełaruskaja zarpłata. Kolki zarablajuć biełaruskija čaŭnaki
Da čaho moža pryvieści zakryćcio jašče dvuch punktaŭ propusku na miažy ź Litvoj