Śviet

Rasijski CVK prybraŭ z łahatypa vybaraŭ kličnik. Pry čym tut Navalny?

Na łahatyp navat skardzilisia ŭ FSB.

Hrafika: «Miedyjazona»

Rasijski Centrvybarkam abnaviŭ łahatyp adzinaha dnia hałasavańnia, jaki projdzie 8 vieraśnia 2024 hoda.

U paraŭnańni ź pieršym varyjantam, pradstaŭlenym na minułym tydni, z łoha źnik čyrvony kličnik. Mnohija tady zaŭvažyli, što hety znak pa styli nahadvaje simvał akcyi «Razumnaje hałasavańnie», jakuju pravodziŭ Alaksiej Navalny.

Fota: kamanda Navalnaha

Paśla publikacyi pieršaha łahatypa maskoŭski deputat ad KPRF Pavieł Ivanoŭ źviarnuŭsia ŭ FSB z patrabavańniem pravieryć aficyjny łahatyp vybaraŭ na ekstremizm. Kiraŭnik CVK Eła Pamfiłava nazvała skarhi na simvoliku «paranaidalnymi vydumkami roznaha rodu pravakataraŭ i łajdakoŭ». Tym nie mienš, łahatyp padkarektavali.

Paśla źmieny łahatypa Pamfiłava zajaviła, što jon byŭ pierapracavany «z ulikam pažadańniaŭ i rekamiendacyj z rehijonaŭ».

Kamientary da artykuła