Śviet

Bajden zajaviŭ, što vyjdzie ź pieradvybarnaj honki tolki «pa ŭkazańni Usiavyšniaha»

Zakłapočanaść prychilnikaŭ i supiernikaŭ nakont jaho ŭzrostu, kahnityŭnych zdolnaściaŭ i padzieńnia rejtynhu jon paličyŭ biespadstaŭnymi.

Džo Bajden na avijabazie ŭ Dełaviery. 5 lipienia 2024 hoda. Fota: Manuel Balce Ceneta / AP

Prezident ZŠA Džo Bajden u intervju telekanału ABC zajaviŭ, što vyjdzie ź pieradvybarnaj honki tolki «pa ŭkazańni Usiavyšniaha», piša Rasijskaja słužba Radyjo Svaboda.

Zakłapočanaść prychilnikaŭ i supiernikaŭ nakont jaho ŭzrostu, kahnityŭnych zdolnaściaŭ i padzieńnia rejtynhu jon paličyŭ biespadstaŭnymi.

Svoj słaby vystup tydzień tamu padčas debataŭ z Donaldam Trampam, jaki taksama pretenduje na pasadu prezidenta ZŠA, Bajden rastłumačyŭ prastudaj i stomaj.

Tady prezident ZŠA ź ciažkaściu farmulavaŭ adkazy, vyhladaŭ niesabranym z kiepskaj pamiaćciu. Z-za hetaha mnohija, u tym liku zakanadaŭcy-demakraty, zaklikajuć Bajdena admovicca ad baraćby za druhi termin prezidenctva.

Čarhovym zaklikam staŭ list lidaraŭ biznesu i hramadzianskaj supolnaści, u jakim jany prosiać Bajdena admovicca ad pieraabrańnia «dziela demakratyi i budučyni nacyi».

Aŭtary lista ličać, što zaraz u Bajdena bolš šancaŭ prajhrać, čym vyjhrać, i nahadvajuć ab pahrozach, jakija moža pradstaŭlać Tramp dla ekanomiki i nacyjanalnaj biaśpieki.

List padpisali ŭžo 168 prademakratyčna nastrojenych aktyvistaŭ — i podpisy praciahvajuć pastupać užo paśla adsyłki dakumienta ŭ Bieły dom.

U čas intervju Bajden taksama skazaŭ, što nie maje patreby ŭ kahnityŭnym teściravańni i što najlepšym testam źjaŭlajecca jaho štodzionnaja dziejnaść u jakaści prezidenta.

Jon nastojvaje, što nichto nie vałodaje najlepšymi źviestkami, čym jon, «kab być prezidentam abo atrymać pieramohu ŭ prezidenckaj honcy».

Bajden dadaŭ, što nie vieryć vynikam apytańniaŭ, jakija prahnazujuć jamu parazu na vybarach, jakija adbuducca 5 listapada 2024 hoda.

Kamientary da artykuła