Usiaho patrochu

Biełaruskaje telebačańnie 90-ch: uzhadvajem jarkija prajekty i papularnych viadučych

Kaliści na BT raskazvali pa-biełarusku pra navinki kino i ŭ žyvym efiry abmiarkoŭvali prablemy padletkaŭ. Jakija prajekty i viadoŭcy byli papularnyja ŭ 90-ja i što ź imi ciapier?

Jahor Chrustaloŭ (źleva) i Aleś Kruhlakoŭ. Prahrama «Krok». Luty 1991 hoda. Skryn videa: kruglyakov / YouTube

Vy možacie pahladzieć siužet abo pračytać tekst nižej.

Jahor Chrustaloŭ

Adna z hałoŭnych asob biełaruskaha telebačańnia taho času naradziłasia ŭ siamji futbolnaha bramnika Viačasłava Chrustalova, jaki ŭ 1970-ch hulaŭ za minskaje «Dynama». Pa zakančeńni prafiesijnaj karjery toj pracavaŭ trenieram, a paśla i dyrektaram stadyjona «Dynama», tamu niadziŭna, što i syna mužčyna rychtavaŭ futbalistam.

Maleńki Jahor razam z baćkami.

Ale toj abraŭ žurnalistyku. Jašče adnym zachapleńniem Jahora Chrustalova była muzyka — na žurfaku jon hraŭ u hurcie «BB». 

Jahor Chrustaloŭ u składzie hurta «BB» prymaje ŭdzieł u telehulni «Piać zorak». 1992 hod. Skryn videa: krakatuk9090 / YouTube

Padčas vučoby jon razam sa svaim adnahrupnikam Alesiem Kruhlakovym pačaŭ rabić prahramu «Krok», natchnionuju rasijskim «Vzhladom». Za dziorzkaść aŭtaram nieadnarazova pahražali adchileńniem ad efiru, ale zapuščany ruchavik pieramienaŭ užo było nie spynić.

Jahor Chrustaloŭ u adnoj ź pieradač «Krok». 1991 hod. Skryn videa: kruglyakov / YouTube

Razam z «Krokam» jaje aŭtary rabili i prahramu «Krok-tusoŭka». Mienavita z padačy Chrustalova na telebačańni ŭpieršyniu źjaviŭsia małady hurt «Lapis Trubiacki».

Archiŭny zapis pieršaha vystupleńnia «Lapisa Trubiackoha» na BT. Krynica: lyapis98 / YouTube

Za «Krokam» źjaviłasia i pieršaje tok-šou «Karambol» — viadoŭca zaprašaŭ znakamitych surazmoŭcaŭ, a hledačy ŭ studyi mahli zadavać svaje pytańni. Na «Karamboli» pierabyvali ŭsie topavyja biełaruskija artysty, a taksama zamiežnyja, jakija pryjazdžali ŭ Minsk na hastroli.

Lidar pank-rok-hurta «Ciektar Haza» Juryj Klinskich u prahramie «Karambol». 1997 hod. Krynica: yuraxoi / YouTube

Akramia taho, Chrustaloŭ byŭ pradziusaram mnohich inšych pieradač, jakija vychodzili na BT, a ŭ 1997 hodzie čytačy haziety «Znamia junosti» nazvali jaho samym seksualnym mužčynam Biełarusi. 

U nulavyja Chrustaloŭ užo jak pradziusar zapuskaŭ na novym telekanale ANT pieršyja biełaruskija realici-šou «Zorny cyrk», «Dźvie zorki», «Try chałaściaki» i inšyja, a jašče prydumlaŭ telemiuzikły, jakija pakazvali ŭ navahodnim efiry.

Jahor Chrustaloŭ. Fota: ANT

Taksama jon pisaŭ pieśni dla pop-artystak — Łarysy Hrybalovaj, Iny Afanaśjevaj, Jadvihi Papłaŭskaj i Haliny Šyškovaj. Supraca z Šyškovaj u vyniku vyliłasia ŭ kachańnie, i ŭ pazašlubnym ramanie ź joj u Chrustalova naradziŭsia syn.

Jahor Chrustaloŭ razam z synam Ivanam. Fota: belarus.kp.ru

U pieršaj pałovie 2010-ch biełarus źjechaŭ u Maskvu pracavać pradziusaram na telekanale STS. Sam Chrustaloŭ pryznavaŭ heta ŭciokami ad prablem u asabistym žyćci. Praź piać hadoŭ jon viarnuŭsia dadomu i jašče niekatory čas vioŭ na roznych kanałach hutarkovyja prahramy. 

Jahor Chrustaloŭ u prahramie «Našie utro» na ANT. 2022 hod. Skryn videa: ONTBLOG / YouTube

Ale ŭ 2018-m žyćcio Jahora Chrustalova zrabiła jašče adzin rezki viraž, i jon kančatkova pakinuŭ telebačańnie. Jon pačaŭ pracavać pres-sakratarom kampanii «Jeŭrahandal», jakoj naležać sietki kram «Jeŭraopt», «Chit» i «Hrošyk».

Łarysa Hrybalova

20-hadovaja śpiavačka źjaviłasia na telebačańni dziakujučy Jahoru Chrustalovu. U pieramožcy konkursa «Maładziečna-93» toj pabačyŭ patencyjał i paklikaŭ jaje na BT. Tak stvaryłasia prahrama «Usio narmalna, mama», muzyčny džynhł ź jakoj viedaje nie adno pakaleńnie biełarusaŭ.

Łarysa Hrybalova vystupaje na konkursie «Maładziečna-94». Fota: gribalevalarisa / Instagram 

Adzin z aŭtaraŭ «Usio narmalna, mama» Uładzimir Maksimkaŭ raskazvaŭ, što ŭ pačatku ŭsio rabiłasia intuityŭna i nichto nie zadumvaŭsia ni pra jakija kancepcyi dy płany. Usio było zatočana na charyzmu Hrybalovaj — u kadry jana była miłaj i ščyraj, a jejnyja lapy padčas zdymak časta ŭklučali ŭ kancy pieradačy.

Łarysa Hrybalova u prahramie «Usio narmalna, mama!». Krynica: poyushiegoroda / YouTube

U minijaciurnaj dziaŭčynie było stolki enierhii, što jaje chapała i na muzyčnuju karjeru, i na zdymki ŭ sieryjałach, i na ŭdzieł u viadomaj prahramie «Ranišniaja pošta» na rasijskim kanale ORT. Va «Usio narmalna, mama» jana z kamandaj prydumlała novyja rubryki, a taksama pahadžałasia na lubyja ekśpierymienty: na zdymki pad vadoj i dahary nahami.

Posmotrieť etu publikaciju v Instagram

Publikacija ot Łarisa Hribalova•Vieduŝaja•Pievica•SMM (@gribalevalarisa)

U pieršaj pałovie nulavych u Łarysy Hrybalovaj vyjšaŭ solny albom «Čto-nibud́», mnohija pieśni ź jakoha biaskonca krucili pa radyjo. A paśla taho, jak prahramy «Usio narmalna, mama» nie stała, jaje viadoŭca zaniałasia biznesam i zasnavała adno ź pieršych u Biełarusi ivent-ahienctvaŭ. Taksama žančyna šmat zajmałasia dabračynnaściu i časta źjaŭlałasia na teleekranach u roznych šou.

Fota: gribalevalarisa / Instagram 

U 2020-m Hrybalova vystupiła suprać hvałtu, za što trapiła ŭ čorny śpis dziejačaŭ kultury, jakim zabaroniena vystupać u Biełarusi. Vosieńniu minułaha hoda jaje zatrymlivali, ale ŭ toj ža dzień vypuścili na volu. 

Vidźmo-Nievidźmo

Adna z najbolš aryhinalnych pieradač źjaviłasia na biełaruskim telebačańni vypadkova. Naohuł, jejny viadoŭca i hołas Siarhiej Filimonaŭ źbiraŭsia pryśviacić žyćcio inšamu — teatralnaj režysury, ale jaho baćka, saviecki partyjny dziejač, zajaviŭ, što syn musić vučyć historyju KPSS, tamu chłopiec pajšoŭ na histfak BDU.

Paśla ŭniviersiteta Siarhiej źjechaŭ na dziesiać hadoŭ u Maskvu, dzie zajmaŭsia turystyčnym biznesam i płanavaŭ emihravać u dalokuju Aŭstraliju. Ale heta ŭ jaho nie atrymałasia, tamu jon viarnuŭsia ŭ Minsk, adkryŭ na radzimie punkt videaprakatu i pieryjadyčna pisaŭ artykuły pra kulturu ŭ haziety.

Siarhiej Filimonaŭ u Maskvie. Fota: onliner.by

Telebačańniu niezaležnaj Biełarusi byli patrebnyja novyja maładyja tvary, i zaŭvažnaha ŭ tusoŭcy maładziona paklikaŭ na BT rabić prahramu pryjaciel jaho baćki. Ale toj admoviŭsia — Filimonavu telebačańnie padavałasia prystaniščam starych, dzie jamu niama miesca, da taho ž jamu nie padabalisia strohija praviły i płanavańnie. Ale praz hod, u 1992-m, druhaja sproba stała paśpiachovaj — amatar mastactva razam ź siabrami navažyŭsia rabić pieradaču pra toje, što lubić: muzyku i kino.

Hienadź Rabcaŭ i Siarhiej Filimonaŭ. 1993 hod. Skryn videa: SBTiR / YouTube

Niezvyčajnuju nazvu Siarhiej Filimonaŭ prydumaŭ, kali lažaŭ u vannaj. Na jaho dumku, jana ŭdała źviazvała dźvie asnoŭnyja častki prahramy: videa i aŭdyja. Pieršy čas za muzyčnuju častku adkazvaŭ žurnalist Hienadź Rabcaŭ, ale praz paru hadoŭ viadoŭca ŭ «Vidźmo-Nievidźmo» zastaŭsia adzin.

U dainternetavyja časy prahrama była hłytkom śviežaha pavietra — mnohija hladzieli jaje z ručkaj i błaknotam, kab zapisać nazvy novych filmaŭ i muzyčnych albomaŭ, a paśla znajści na rynkach ci ŭ prakatach patrebnyja kasiety.

Užo praz hod paśla pieršaha vypusku ŭ «Vidźmo-Nievidźmo» źjaviłasia čarha z rekłamadaŭcaŭ, i prahrama častkova pieratvaryłasia ŭ tranślacyju rekłamnych rolikaŭ dy rozyhryšaŭ roznych tavaraŭ, a jejnaja praciahłaść pavialičyłasia da 70 chvilin. 

Aŭtar i viadoŭca prahramy «Vidźmo-nievidźmo» Siarhiej Flimonaŭ. 1995 hod. Skryn videa: SBTiR / YouTube

U redakcyju prychodzili poŭnyja miachi listoŭ ad hledačoŭ. Papularnaści spryjała i adsutnaść rehulavańnia: nichto nie paryŭsia ni ab aŭtarskim pravie, ni ab konkursach, jakija pakazvali pa telebačańni. 

Na BT prahrama vychodziła dzieviać hadoŭ, i ŭ 2002-m «Vidźmo-Nievidźmo» pierasialiłasia na mienš rejtynhavy telekanał STB. Z hetaha pačaŭsia jaje kaniec. Nulavyja byli roskvitam internetu, i ludziam dla dostupu da suśvietnych navinak pierastaŭ być patrebny pasiarednik u vyhladzie niejkaj teleprahramy. 

U vyniku ŭ 2011 hodzie «Vidźmo-Nievidźmo» źnikła z kabielnych telekanałaŭ. Pieradača jašče niekalki hadoŭ vychodziła na «Biełsacie», ale heta chutčej byŭ imidžavy pradukt, čym taja prahrama, na jakoj trymajecca kanał.

Siarhiej Filimonaŭ. 2021 hod. Fota: sergey.filimonov.528 / facebook

Bieź Siarhieja Filimonava nie abychodziłasia nivodnaja kina— ci teatralnaja premjera ŭ Minsku, paśla zvalnieńnia z telebačańnia jon praciahvaŭ sačyć za ŭsimi navinkami kultury, ale nie daŭ rady niebiaśpiečnaj novaj chvarobie — karanavirusu.

Viadoŭca ličyŭ jaje štučnastvoranaj i admaŭlaŭ nieabchodnaść masačnaha režymu i vakcynacyi. Ale ŭ listapadzie 2021 hoda Siarhiej Filimonaŭ zachvareŭ na toj samy kavid i praź niekatory čas pamior. Viadoŭcu było 62 hady. 

Aleś Kruhlakoŭ

Biez hetaha viadoŭcy było składana ŭjavić BT dzievianostych i nulavych. Taksama Kruhlakoŭ byŭ hołasam biełaruskaha «Jeŭrabačańnia».

Biełaruskaj formaj imia Alaksandr chłopiec staŭ karystacca jašče z kanca vaśmidziasiatych, kali jaho materyjały vychodzili ŭ hazietie «Naviny BNF» i na radyjo «Svaboda». Z taho času i zastaŭsia Alesiem, tym bolš heta jaho vyłučała siarod astatnich ciozak. 

Na telebačańnie Aleś Kruhlakoŭ pryjšoŭ 18-hadovym studentam žurfaka. Jaho parekamiendavała ŭziać lehiendarnaja dyktarka Zinaida Bandarenka — jana skazała, što ŭ vačach padletka niešta jość. Tak jon staŭ adnym z suviadoŭcaŭ «Kroka» razam ź Jahoram Chrustalovym.

Aleś Kruhlakoŭ u adnoj ź pieradač «Krok». 1991 hod. Skryn videa: kruglyakov / YouTube

Aleś Kruhlakoŭ byŭ pačynalnikam mnohich rahram na BT — intelektualnyja hulni «Oskar» i «Piać zorak», ranišniaje šou «Dobraj ranicy, Biełaruś».

Frahmient hulni «Oskar». 1997 hod. Krynica: kruglyakov / YouTube

Pryčym, u pieršych hulniavych telešou viadučamu davodziłasia zajmacca litaralna ŭsim: ad vypiski propuskaŭ da pošuku sponsaraŭ. Akramia taho, Kruhlakoŭ vioŭ naviny i palityčnyja pieradačy. Navat abrevijatura ATN — ahienctva telenavinaŭ — źjaviłasia z padačy hetaha žurnalista. 

Aleś Kruhlakoŭ viadzie naviny na ANT. Skryn videa: kruglyakov / YouTube

Z druhoj pałovy dzievianostych Aleś Kruhlakoŭ sumiaščaŭ pracu na telebačańni z supracoŭnictvam z pasolstvam ZŠA ŭ Minsku ŭ jakaści pres-sakratara. Heta ŭ vyniku stała pryčynaj kančatkovaha sychodu z BT u 2006 hodzie — jaho adchilili ad efiru prosta pierad finałam biełaruskaha adboru na «Jeŭrabačańnie», jaki musiŭ vieści mienavita Kruhlakoŭ. 

Niekalki hadoŭ tamu razam ź siamjoj Aleś kančatkova pierabraŭsia za akijan. Siońnia jon pracuje ŭ «Hołasie Amieryki» — viadzie internet-prahramy i zapisvaje padkasty.

Jaŭhien Novikaŭ

Hetaha televiadoŭcu składana nazvać kultavym, ale jaho pieradača «Pravy čałavieka. Pohlad u śviet» stała sapraŭdnym miemam. Z teleekranaŭ jana pužała hledačoŭ žudasnymi rečami, jakija nibyta mieli miesca ŭ krainach Zachadu.

Jaŭhien Novikaŭ skončyŭ Minski miedycynski instytut i pracavaŭ kardyjochirurham u minskaj balnicy. Ale raptam mužčyna zachapiŭsia kardynalna inšaj śfieraj dziejnaści i pajšoŭ vučycca na jurysta. U 1990 hodzie jaho vyłučyli deputatam u Viarchoŭny Saviet BSSR.

Ahitacyjny płakata Jaŭhiena Novikava padčas vybaraŭ u Viarchoŭny Saviet BSSR 12-ha sklikańnia, 1990 hod. Krynica: Nacyjanalny archiŭ Respubliki Biełaruś

U parłamiencie Novikaŭ vystupaŭ suprać pryvatyzacyi i ŭviadzieńnia instytuta prezidenctva. U 1992 hodzie deputat stvaryŭ pravaabarončuju arhanizacyju «Biełaruskaja liha pravoŭ čałavieka», jakaja siarod inšaha dapamahała ludziam, jakija sutyknulisia z represijami z boku ŭładaŭ.

Deputat Jaŭhien Novikaŭ. Fota: vytoki.net

Jaŭhien Novikaŭ aktyŭna krytykavaŭ maładoha prezidenta Alaksandra Łukašenku, ale paśla jahonyja pohlady rezka pamianialisia. Praz heta jaho adchilili ad kiraŭnictva «Lihaj pravoŭ čałavieka», ale zaŭvažyli ŭ inšym miescy — na biełaruskim telebačańni.

Z 2000 hoda eks-deputat staŭ vychodzić u efir z aŭtarskaj prahramaj «Pravy čałavieka. Pohlad u śviet». Jana mieła vyraznuju antyzachodniuju skiravanaść, a viadoŭca ŭ joj pierakazvaŭ roznyja kanśpirałahičnyja teoryi. Nieadnarazova prapahandysta abvinavačvali ŭ chłuśni, ale jon ličyŭ, što hodna trymaje ŭdar na infarmacyjnaj vajnie. 

Jaŭhien Novikaŭ. Skryn videa: SBTiR / YouTube

Prahrama Novikava praisnavała bolš za 10 hadoŭ i pieražyła mnohija zabaŭlalnyja prajekty. Historyja jaje zakryćcia davoli pakazalnaja. «Pravy čałavieka» krucili na mižnarodnym kanale «Biełaruś-24», a ŭ 2014-m bolšaja častka pieradač stała pryśviačacca padziejam va Ukrainie. Heta nie zastałosia niezaŭvažanym u paŭdniovych susiedziaŭ, i Nacyjanalnaja Rada pa pytańniach telebačańnia pryniała rašeńnia zabaranić biełaruski telekanał za antyŭkrainskuju prapahandu. 

Na BT sihnał zrazumieli i nie prosta prybrali Novikava ź mižnarodnaha viaščańnia, a zakryli jahonuju prahramu całkam. Siońnia padobnaje ŭjavić prosta niemahčyma.

Jaŭhien Novikaŭ na sajcie kramola.info

Jaŭhien Novikaŭ ža nie zhubiŭsia i peŭny čas pracavaŭ na rasijskich čarnasociennych sajtach.

Juryj Žyhamont

Juryj Žyhamont u pieradačy «Novyja padarožžy dyletanta». Skryn videa STB

Vobraz Juryja Žyhamonta znajomy lubomu biełaruskamu telehledaču, chacia, mahčyma, nie ŭsie navat viedali jahonaje proźvišča. Prahrama «Padarožžy dyletanta» vychodziła na praciahu 17 hadoŭ, i za hety čas jejny aŭtar raskazaŭ pra sotni cikavych miescaŭ. 

Naohuł, Žyhamont nie płanavaŭ być ni televiadučym, ni akcioram. Paśla armii jon advučyŭsia na mašynista viežavych kranaŭ i paśpieŭ navat papracavać pa śpiecyjalnaści. Ale znajomstva sa studentami teatralnaha instytuta pieraviarnuła jahonaje žyćcio. 

Jašče adnym chobi Juryja Žyhamonta byli vandroŭki pa Biełarusi. I ŭ 2001 hodzie heta vyliłasia ŭ toje, što zachapleńnie stała častkaj prafiesii mužčyny. Biełaruskaje telebačańnie zapuściła pieradaču pra vandroŭki pa krainie, viadoŭcam jakoj staŭ jakraz charyzmatyčny Žyhamont. 

Juryj Žyhamont

«Padarožžy dyletanta» mianiali telekanały i sychodzili ŭ internet, ale na praciahu mnohich hadoŭ niaźmiennym zastavaŭsia vobraz jejnaha aŭtara — šlapa, akulary, sakvajaž i palito.

Juryj Žyhamont u vobrazie viadučaha. Skryn videa: CTVBYvideo / YouTube

Z 2018-ha prahrama bolš nie vychodzić, ale Žyhamont nie zakinuŭ lubimuju spravu i napisaŭ knihu pra svaje najulubioniejšyja miescy ŭ Biełarusi.

Inha Chruščova

Jašče ŭ 1994 hodzie studentka BDU Inha Chruščova hałasavała za Stanisłava Šuškieviča, ale paśla maładaja žurnalistka ŭvajšła ŭ prezidencki puł Alaksandra Łukašenki. 

Inha Chruščova. 1996 hod. Skryn videa: SBTiR / YouTube

Jejnyja pohlady rezka źmianilisia — u svaich siužetach Chruščova pačała raśpiakać apazicyju i jaje lidaraŭ, a viaršyniaj prapahandy staŭ repartaž z «Čarnobylskaha šlachu — 96».

Žurnalistka tłumačyła svaje emocyi tym, što na tym mitynhu pratestoŭcy atakavali jaje sa zdymačnaj hrupaj. Rabotniki BT atrymali kuchtaloŭ, a ich techniku pałamali. 

Jak raskazvała Chruščova, u dzievianostyja ŭ žurnalistaŭ nie było nijakich zabaron na zdymku Alaksandra Łukašenki. A jana sama trapiła pad upłyŭ jahonaj ščyraści i charyzmy. Ale pakrysie pajezdki stali ŭsio bolš nahadvać teatralnyja pastanoŭki, taksama Łukašenku stała nielha zdymać zzadu. Chruščova heta źviazvaje sa źjaŭleńniem Natalli Piatkievič, jakaja stała pieršaj prezidenckaj pres-sakratarkaj. Z pryznačeńniem hetaj čynoŭnicy pačałosia i raźmierkavańnie patrebnych pytańniaŭ pamiž žurnalistami puła. 

Paśla adnoj z pres-kanfierencyj, na jakoj Inha Chruščova zadała Łukašenku pytańnie, nie ŭzhodnienaje Natallaj Piatkievič, jaje prybrali z puła. Na niekatory čas prapahandystka sychodziła ŭ spartovuju redakcyju BT, ale pierad vybarami 2010 hoda viarnułasia ŭ naviny. 

Inha Chruščova na kanale «Žyćcio-malina». 2023 hod. Kadr ź videa

Tym nie mienš praź niekalki hadoŭ žančyna kančatkova pierajšła ŭ biznes z telebačańnia. Jak pryznavałasia sama Chruščova, heta zdaryłasia pa maralnych mierkavańniach. Kardynalna źmianilisia i jejnyja pohlady — jana pačała krytykavać režym i kajałasia za svajo minułaje. U 2020 hodzie žančyna zajmałasia zboram podpisam za Viktara Babaryku, a taksama brała ŭdzieł u akcyjach pratestu.

Siońnia 53-hadovaja Inha Chruščova žyvie ŭ Hiermanii.

«5ch5»

Hetaja prahrama była davoli śmiełym ekśpierymientam dla biełaruskaha telebačańnia i apiaredziła čas. Maładyja viadoŭcy, siarod jakich byli navat školniki, abmiarkoŭvali sacyjalnyja prablemy kštałtu padletkavaj złačynnaści i rańniaj ciažarnaści, pryčym rabiłasia heta ŭ žyvym efiry. U vyniku «5x5» stała tramplinam dla mnohich telezorak, jakija dahetul praciahvajuć pracavać u miedyja.

Dźmitryj Šepieleŭ u prahramie «5ch5». Skryn videa pieradačy

Samym viadomym vychadcam z prahramy jość Dźmitryj Šepieleŭ. Minčuk paśla zakryćcia «5ch5» vioŭ prahramy na BT, a potym źjechaŭ pracavać u Kijeŭ. Tam biełarus siabie dobra zarekamiendavaŭ i praź niekatory čas apynuŭsia ŭ Maskvie, dzie taksama staŭ zorkaj — vioŭ statusnyja mierapryjemstvy kštałtu Jeŭrabačańnia ci losavańnia čempijanatu śvietu pa futbole, a taksama pracavaŭ na samym papularnym «Pieršym kanale».

Dźmitryj Šepieleŭ i Žana Fryskie. Skryn videa: Riybkazol | YouTube

Šepieleŭ byŭ žanaty z rasijskaj pop-zorkaj Žannaj Fryskie, u 2020-m asudziŭ hvałt biełaruskich siłavikoŭ, a praz dva hady — i rasijskaje ŭvarvańnie va Ukrainu. Ale ŭ vyniku Šepieleŭ zrabiŭ svoj vybar i zastaŭsia na rasijskim telebačańni, dla čaho jamu navat daviałosia źjeździć u akupavany Maryupal. 

Dzianis Kurjan u prahramie «5ch5». Skryn videa pieradačy

Inšaj zorkaj «5ch5» byŭ Dzianis Kurjan, jaki źjaviŭsia ŭ prahramie dziakujučy ŭsio tamu ž Šepielevu. Paśla zakryćcia moładzievaj pieradačy Kurjan zrabiŭ paśpiachovuju karjeru na telebačańni — jon pracavaŭ na BT i ANT, kamientavaŭ «Jeŭrabačańnie», a taksama cyrymonii ŭručeńnia premij «Oskar» i «Hremi». 

Dzianis Kurjan. Fota: sacsietki

Pakrysie Kurjan z teleekranaŭ syšoŭ u biznes: vałodaŭ sietkaj restaranaŭ chutkaha charčavańnia, a taksama zasnavaŭ studyju, jakaja zdymaje rekłamnyja roliki i karparatyŭnyja filmy. Z 2020 hoda na telebačańni jon bolš nie źjaŭlajecca.

Siarod inšych zaŭvažnych viadoŭcaŭ «5ch5» varta adznačyć Hleba Łaŭrova, a taksama Kaciu Pytlevu i Ivana Padreza.

Kacia Pytleva. Skryn videa pieradačy

Łaŭroŭ ciapier słavić režym i zajmajecca palityčnaj prapahandaj na ANT. A Pytleva i Padrez nie padtrymali hvałt i falsifikacyi na vybarach, emihravali ź Biełarusi i ciapier robiać svaje internet-prajekty.

Ivan Padrez. Skryn videa pieradačy

Biełaruskamu telebačańniu ŭ dzievianostyja było vielmi składana zmahacca z rasijskim — tam byli hrošy, mahčymaści i technałohii. Tym nie mienš svaboda pieršych hadoŭ niezaležnaści dazvoliła źjavicca na BT mnostvu papularnych prajektaŭ, za jakimi stajali ambitnyja i telenavityja aŭtary. Mnohija ź ich zmahli prystasavacca da pieramienaŭ i znajści siabie ŭ novych miescach ci śfierach, niekatoryja ž tak i zastalisia ŭ historyi simvałami svaich asabistych prajektaŭ. 

Kamientary da artykuła