Кітайская ШІ-мадэль зрабіла фурор на тэхналагічным рынку. Лідарства ЗША можа быць пад пагрозай
27.01.2025 / 15:18
Стартап DeepSeek з Кітая ўзрушыў Крэмніевую даліну, выпусціўшы мадэль штучнага інтэлекту, якая можа перасягнуць лепшыя амерыканскія аналагі, пры гэтым з'яўляецца таннейшай і выкарыстоўвае меней магутныя чыпы.
Ілюстрацыйны здымак. Фота: Andrea Verdelli / Getty Images
ШІ-памочнік ад кітайскага стартапа DeepSeek у панядзелак абагнаў свайго канкурэнта ChatGPT і стаў самым рэйтынгавым бясплатным дадаткам, даступным у App Store у ЗША, піша myfin.by.
Гэта адбылося праз некалькі дзён пасля таго, як кампанія выпусціла сваю флагманскую мадэль штучнага інтэлекту R1, якая, як мяркуецца, з'яўляецца больш эканамічна эфектыўнай, чым у канкурэнтаў, пры працы на менш прасунутых чыпах.
На гэтым фоне ф'ючарсы амерыканскага тэхналагічнага індэксу Nasdaq 100 знізіліся амаль на 2,5%, а кантракты на S&P 500 — на 1,4%.
Акцыі Nvidia, якія каціруюцца на Франкфурцкай біржы, упалі прыкладна на 7%, у той час як акцыі Tesla, Amazon і Meta страцілі ў кошце больш за 2% падчас ранніх еўрапейскіх таргоў.
У Японіі фіксуецца падзенне акцый мясцовых вытворцаў чыпаў, сярод якіх Advantest, Tokyo Electron і Renesas Electronics. Акцыі Softbank Group, якой належыць кампанія-распрацоўшчык мікрасхем Arm, упалі на 8,3% пасля прыкметнага росту на мінулым тыдні.
Чаму важна?
Раней DeepSeek прадставіла сваю бясплатную ШІ-мадэль з адкрытым зыходным кодам, на стварэнне якой, па сцвярджэннях стартапа, пайшло ўсяго два месяцы і менш як $6 млн.
Пры гэтым выкарыстоўваліся далёка не самыя прасунутыя чыпы H800s ад Nvidia, бо ўрад ЗША наклаў абмежаванні на Кітай, адрэзаўшы краіне доступ да самых магутных чыпаў кампаніі, такім як H100.
У шэрагу тэстаў прадукцыйнасці, праведзеных іншымі распрацоўшчыкамі, мадэль DeepSeek перасягнула па дакладнасці Llama 3.1 ад Meta, GPT-4o ад OpenAI і Claude Sonnet 3.5 ад Anthropic як у рашэнні складаных задач, так і ў матэматыцы і кадаванні.
Аб самім стартапе і яго заснавальніку Лян Вэньфэне мала што вядома: DeepSeek быў народжаны кітайскім хедж-фондам High-Flyer Quant, які, паводле паведамленняў у СМІ, кіруе актывамі на суму каля $8 млрд.
Той факт, што малавядомы кітайскі стартап скарачае разрыў з некаторымі з найбуйнейшых тэхналагічных кампаній свету, маючы пры гэтым значна меншыя рэсурсы, можа падарваць намаганні ЗША па стварэнні мер абароны ад глабальных канкурэнтаў у галіне штучнага інтэлекту.