Жыхар Магілёва прадае 20-капеечную манету за 480 рублёў. У чым яе асаблівасць?
30.01.2025 / 8:45
Жыхар Магілёва выставіў на продаж праз аўкцыён ay.by незвычайны лот — 20-капеечную манету 2009 года з вытворчым дэфектам. За пашкоджаны экземпляр ён спадзяецца атрымаць 480 рублёў, піша Onliner.by.
Паводле слоў прадаўца, манета мае хвалістую форму і сляды сціскання, што робіць яе непрыдатнай для разлікаў.
Аднак ён сцвярджае, што гэта не проста брак, а сапраўдная рэдкасць: такія манеты прайшлі «гашэнне» на манетным двары, і іх засталося не больш за дзесяць — усе яны знаходзяцца ў прыватных калекцыях.
Таргі працягнуцца да 31 студзеня, і пакуль невядома, ці знойдзецца калекцыянер, гатовы заплаціць за манету амаль 500 рублёў.
Тым не менш цікавасць да падобных рэдкіх асобнікаў сярод нумізматаў застаецца высокай.