Śviet

Pad Pałtavaj va Ukrainie zafiksavali ziemlatrus

U Pałtavie 1 lutaha adčuvalisia prykmietnyja vahańni. Vierahodna, u hetym ukrainskim rehijonie adbyŭsia ziemlatrus, piša «Suśpilnie».

Karta ziemlatrusu 1 lutaha. Krynica: Hałoŭny centr śpiecyjalnaha kantrolu

Padziemnyja šturški adčuvalisia kala 18:25 1 lutaha. Šturški zafiksavali na hłybini 3 kiłamietry pamiž haradami Pałtava i Rašaciłaŭska. Mahnituda šturškoŭ była 3,67, pavodle aficyjnych danych Hałoŭnaha centra śpiecyjalnaha kantrolu.

Na aficyjnym telehram-kanale Dziaržaŭnaj słužby nadzvyčajnych situacyj Ukrainy paviedamili, što, pavodle papiaredniaj infarmacyi, nijakich niehatyŭnych nastupstvaŭ hety ziemlatrus nie prynios, zvarotaŭ da ratavalnikaŭ nie było.

Miascovyja žychary raskazali «Suśpilnamu», što, u pryvatnaści, u šmatpaviarchoŭkach adčuvałasia, jak dryžała mebla. U sacsietkach žychary Pałtavy paviedamlali pra niesankcyjanavany ruch aŭtamabilaŭ u haražy z-za padziemnych šturškoŭ.

Minuły raz takija vahańni ŭ hetym rehijonie adčuvalisia ŭviečary 9 listapada 2024 hoda. Ziemlatrus byŭ na zachad ad Pałtavy na hłybini 8 kiłamietraŭ. Jaho kłasifikavali pa mahnitudzie 3,0 (pa škale Rychtera) jak ledź adčuvalny.

Kamientary da artykuła