Hramadstva

U Homieli za seksualny hvałt sudziać ideołaha kaledža

Na 6 lutaha ŭ sudzie Čyhunačnaha rajona Homiela pryznačany pačatak pracesu za hvałtoŭnyja dziejańni seksualnaha charaktaru (art. 167 č. 3 KK Biełarusi). U hetym abvinavačvajecca Aleh Sachin, jaki, jak vyśvietliŭ «Fłahštok», pracavaŭ u Homielskim dziaržaŭnym kaledžy bytavoha absłuhoŭvańnia.

Aleh Sachin pry naviedvańni «Ruskaha doma» ŭ Homieli. Fota: sacsietki

Pavodle źviestak «Kibierpartyzan», tolki adzin hamialčuk maje piersanalnyja danyja, nazvanyja ŭ raskładzie suda. Na staroncy kaledža ŭ sacsietcy zastalisia zhadki Sachina jak aŭtara tekstaŭ ab vychavaŭčaj pracy z navučencami, u asnoŭnym — raboty pa tak zvanym «patryjatyčnym vychavańni».

Sachin pisaŭ spravazdačy pra ŭdzieł moładzi kaledža ŭ ideałahičnych mierapryjemstvach. Apošniaja takaja spravazdača źjaviłasia 18 vieraśnia — pra śviatkavańnie «Dnia narodnaha adzinstva». Z tych časoŭ Sachin bolš nie zhadvaŭsia ŭ pabliku kaledža, svaje staronki ŭ sacsietcy jon taksama nie abnaŭlaŭ.

U infarmacyi pra siabie Aleh Sachin paznačaŭ miesca pracy — kaledž bytavoha absłuhoŭvańnia, adznačajučy, što jon žanaty.

Sutnaść abvinavačvańnia nieviadomaja — praces prachodzić u zakrytym režymie.

U Kryminalnym kodeksie havorycca pra toje, što častka 3 nazvanaha artykuła vystaŭlajecca za «dziejańni, učynienyja ŭ dačynieńni da zaviedama małaletniaha (małaletniaj), albo jakija paciahnuli pa nieaściarožnaści śmierć paciarpiełaha (paciarpiełaj), albo pryčynieńnie ciažkich cialesnych paškodžańniaŭ, albo zaražeńnie VIČ, albo inšyja ciažkija nastupstvy».

Sankcyja artykuła praduhledžvaje pazbaŭleńnie voli na termin ad vaśmi da piatnaccaci hadoŭ.

Kamientary da artykuła