Hramadstva

Za 42 rubli pradajuć budynak, u jakim načavaŭ Napaleon

U Hłybokim znoŭ sprabujuć pradać budynak byłoha klaštara karmielitaŭ. Pačatkovy košt pabudovy XVIII stahodździa, jakaja maje patrebu ŭ restaŭracyi, čysta simvaličny — adna bazavaja vieličynia, to-bok 42 rubli.

Budynak klaštara karmielitaŭ raźmieščany ŭ centry Hłybokaha — na płoščy 17 vieraśnia. Pabudova źjaŭlajecca historyka— kulturnaj kaštoŭnaściu. Uźviali ŭ 1735 hodzie, to-bok budynku amal 300 hadoŭ.

U svoj čas pry manastyry isnavali žyłyja karpusy, a taksama biblijateka, špital, apteka, słužbovyja i składskija pamiaškańni. A ŭ 1812 hodzie mienavita tut na niekalki dzion spyniaŭsia francuzski impieratar Napaleon Banapart.

Klaštar karmielitaŭ byŭ zakryty ŭ 1865 hodzie, jašče praz 10 hadoŭ kaścioł byŭ pieratvorany ŭ pravasłaŭnuju carkvu. Ad žyłych karpusoŭ da našych dzion dajšło tolki adno kryło, dva inšyja byli razabranyja ŭ 1892 hodzie.

Čarhovyja tarhi projduć na elektronnaj placoŭcy «BUTB-majomaść» 3 sakavika. Padać zajavu na ŭdzieł možna da 26 lutaha ŭklučna.

Raniej sproby pradać hety budynak nieadnarazova rabilisia, u tym liku i za minimalnuju canu. Ale achvotnych nie znachodziłasia. 

Kamientary da artykuła