Litaratura

Adkryŭsia pieradzakaz na novuju knihu pra Hary Potera pa-biełarusku

Vydaviectva «Januškievič» paviedamiła, što 8 lutaha 2025 hoda pabačyć śviet kniha «Hary Poter i Kielich ahniu», čaćviortaja kniha sa znakamitaj sieryi Džaan Roŭlinh. Ź siońniašniaha dnia na sajcie knihauka.com vydaviectva abviaściła papiaredni zakaz asobna na čaćviortuju knihu i na ŭsie knihi razam.

Pierakład z anhlijskaj movy hetaj častki «Hary Potera» vykanała Alena Piatrovič, mastackaje afarmleńnie Brajana Sełźnika (ZŠA) z adaptacyjaj Kryściny Ivancovaj.

Kniha źmiaščaje ažno 712 staronak. Buduć dadrukavanyja ŭ ćviordaj vokładcy i 3 papiarednija knihi sieryi.

Vydaviectva nahadvaje, što atrymańnie praciahu pravoŭ na biełaruskaje vydańnie sieryi pra Hary Potera hetym razam išło z bajami dziela taho, što Vialikabrytanija ŭviała strohija sankcyi ŭ adnosinach da Biełarusi jak krainy-suahresara, prytym vielmi pryncypovuju pazicyju zaniała sama aŭtarka knihi.

Urešcie z dapamohaj kaleh i siabroŭ vydaviectvu «Januškievič» udałosia dakazać brytancam, što vydańnie «Hary Potera» na biełaruskaj movie i režym Łukašenki — źjavy nie tolki nie tojesnyja, ale navat supraćlehłyja.

Ale novy kantrakt zaklučany na davoli žorstkich umovach. Vydadzienyja pa biełarusku knihi Džaan Roŭlinh buduć ekskluziŭna pradavacca tolki na niekalkich placoŭkach: u kniharni «Knihaŭka» ŭ Varšavie, internet-kramie knihauka.com, markietpłejsach Allegro i Amazon. Na terytoryi Biełarusi i Rasii ich pradavać zabaroniena, tamu poštaj vydaviectva tudy dasyłać knihi nie zmoža.

«Spadziajomsia, što, niahledziačy na hetyja pieraškody, našy čytačy na radzimie znojduć rašeńni, jak nabyć i atrymać novyja vydańni», — adznačaje vydaviectva «Januškievič».

Kamientary da artykuła