«Ciapierašni kryzis biełaruskaha IT nie časovy, a fundamientalny» — analityk
Biznes-analityk nazyvaje pryčynaj nie tolki rost štučnaha intelektu, ale i pieraaryjentacyju amierykanskaha aŭtsorsu na inšyja rehijony płaniety, najpierš Łacinskuju Amieryku, a taksama słabaść biełaruskaj adukacyi.
Biełaruski miljanier Juryj Mielničak sprahnazavaŭ kryzis u IT i ŭ Parku vysokich technałohij, u pryvatnaści, jaki byŭ aryjentavany na vialikija aŭtsortynhavyja kampanii, a ciapier zhortvajecca va ŭmovach mižnarodnaj izalacyi Biełarusi.
«Mielničak usio pravilna kaža, ale jość niekalki momantaŭ, jakija dapaŭniajuć karcinu,— skazaŭ «Našaj Nivie» biełaruski biznes-analityk, jaki pracuje ŭ śfiery IT. — Ciapierašni kryzis biełaruskaha IT, zdajecca, nie časovy, jon fundamientalny. Tut hałoŭnaje toje, što IT u Biełarusi (i ahułam va Uschodniaj Jeŭropie) pierastała być sacyjalnym liftam, i heta była b dobraja tema dla artykuła. A pryčyna tut kompleksnaja, nie tolki rost štučnaha intelektu. Z taho, što ja baču:
1. Amierykanskija zamoŭcy apošnija hady pieraaryjentoŭvajucca na Łacinskuju Amieryku.
Tak, jakaść kadraŭ tam pakul što horšaja, ale i rejty śpiecyjalistaŭ u razy mienšyja. Biełarusy i ŭkraincy vychodziać nieadekvatna darahimi na aŭtsors, praściej naniać i navučyć salvadorcaŭ i kałumbijcaŭ. Plus amierykancam praściej z LatAm, bo adna tajmzona i kulturna jany ŭsio ž bližejšyja (asabliva z łacinasami ZŠA). Plus u Łacinskaj Amierycy svoj unutrany rynak i infrastruktura źjaŭlajecca dla startapaŭ. Niezdarma aŭtsors kštałtu JEPAMa adkryvaje ŭsio novyja i novyja ofisy tam.
2. Mielničak pra heta zhadvaŭ, ale nie raskryŭ: dehłabalizacyja, pryčym nie tolki razryŭ idzie na Zachad, Kitaj i Rasiju, ale navat ZŠA i Jeŭropa razychodziacca.
ES uvodzić usio bolš i bolš rehulacyj u śfiery (kštałtu General Data Protection Regulation), i amierykanskija kampanii pakul što ich starajucca vykonvać, ale kali ich budzie bolš i bolš, a składanaść ich vykanańnia pieravysić patencyjny prybytak ad jeŭrapiejskaha rynku, amierykanskim technałahičnym hihantam moža stać prosta niecikava, i rynak padzielicca. I jeŭrapiejski rynak voźmuć pad siabie niemcy i francuzy.
3. Upłyvaje i vajna. Mnohija amierykanskija zamoŭcy prosta pierastali najmać navat ukraincaŭ, nie kažučy ŭžo pra biełarusaŭ. Salidarnaść salidarnaściu, a biznes-ryzyki nichto nie admianiaŭ.
4. Biełaruskija aŭtsors-kampanii, jakija rełakavali svaich supracoŭnikaŭ u Polšču/Litvu, bieź ilhotaŭ PVT, kali jany vymušanyja płacić padatki jak usie, prosta niekankurentazdolnyja.
I heta taksama prablema. Navat u polskich i litoŭskich kampanij rejty vyšejšyja, nie havoračy ŭžo pra amierykanskija FAANGi.
Niekankurentazdolnyja, bo nizkaja jakaść mieniedžmientu i inšych upraŭlencaŭ. Nizkaja jakaść mieniedžmientu, bo ŭ Biełarusi ideałahizavanaja i nizkajakasnaja vyšejšaja adukacyja.
Ja dumaju, što heta nie prosta cykličny spad, a što hetaja historyja nadoŭha. Biełaruskamu aŭtsorsu kaput. A praduktovych paśpiachovych kampanij u takich sacyjalna-palityčnych umovach u Biełarusi nie źjavicca»,— miarkuje biznes-analityk.
«Nie ŭsio tak błaha». Što budzie sa studentami-ajcišnikami ŭ EHU biez EPAM
EPAM raptoŭna vyjšaŭ z prahramy padrychtoŭki ajcišnikaŭ u EHU
IT užo nie toje? Navučańnie jakim prafiesijam zaraz modnaje ŭ biełarusaŭ
«Tut IT nie panaceja». Biełarus raskazaŭ, jak jano — vučycca ŭ Narviehii
Łukašenka ŭpeŭnieny, što paśla masavaha adjezdu ajcišnikaŭ halina ruchajecca napierad
Kamientary