SK pahražaje zabrać kvatery ŭ 104 udzielnikaŭ śviatkavańnia Dnia Voli za miažoj
Kryminalnyja spravy inicyjavanyja pa dvuch artykułach.
Śpis padazravanych pa spravie «Biełarusaŭ zamiežža» papoŭniŭsia na 104 proźviščy, piša BiełTA.
SK śćviardžaje, što biełarusy, jakija vymušanyja byli pakinuć radzimu ŭ vyniku masavych represij, na emihracyi «pačali farmavać instrumienty dla akazańnia źniešniaha cisku na Biełaruś» i svajoj dziejnaściu «spryjajuć izalacyi aficyjnaha Minska na mižnarodnaj arenie, zaklikajuć da prapracoŭki bolš žorstkich sankcyj u dačynieńni da Biełarusi i jaje hramadzian, kampramietacyja kiraŭnictva krainy».
Tak, 25 sakavika 2024 hoda jany adznačali na vyhnańni ŭhodki abviaščeńnia niezaležnaści BNR (Dzień Voli).
«Hetyja schody supravadžalisia vykarystańniem nacyjanalistyčnaj simvoliki, abraźlivymi łozunhami, jakija raspalvajuć sacyjalnuju varožaść siarod biełarusaŭ, zaklikami da ekanamičnaha i palityčnaha cisku na našu krainu», — adznačyli ŭ SK.
Śledčy kamitet śćviardžaje, što atrymaŭ źviestki pra bolš za sotniu asob, jakija brali niepasredny ŭdzieł u vuličnych akcyjach na terytoryi Varšavy, Vilni, Urocłava, Biełastoka, Brusiela, Batumi, Prahi, Kalifornii, Fiładelfii i h.d., i śpis pastajanna papaŭniajecca.
«Hetyja asoby pryznanyja padazravanymi pa kryminalnaj spravie. Hałoŭnym śledčym upraŭleńniem ich dziejańniam dadziena pravavaja acenka ŭ ramkach art. 361-1 (Stvareńnie ekstremisckaha farmiravańnia i ŭdzieł u im) i art.369-1 (Dyskredytacyja Respubliki Biełaruś) Kryminalnaha kodeksa Biełarusi».
«U ramkach rasśledavańnia kryminalnaj spravy ŭžo atrymana infarmacyja ab abjektach nieruchomaści i majomaści, jakija naležać im, na terytoryi Biełarusi. Pravodziacca śledčyja dziejańni, u tym liku ahlady, pieratrusy, nakładańnie aryštu na majomaść i inšyja pracesualnyja mierapryjemstvy. Śledčym kamitetam buduć pryniaty vyčarpalnyja miery pa zabieśpiačeńni pryncypu niaŭchilnaści pakarańnia i kampiensacyi škody, u tym liku ŭ ramkach śpiecyjalnaj vytvorčaści», — pałochajuć u SK.
«U nas fobija žyvoj kamunikacyi. A seks mienš važny, čym dla minułych pakaleńniaŭ». Zumiery adkazvajuć na pretenzii da svajho ładu žyćcia4
Kamientary