Biełaruski aburajucca advent-kalendarom ad Luxvisage — i nie tolki z-za cany
Biełaruski brend kaśmietyki Luxvisage vypuściŭ svoj advent-kalandar. Nabyć taki pakul možna tolki praz rasijski markiet-płejs. Padarunki i ŭ im paasobku kaštujuć u dva razy tańniej, čym sam nabor. Ale ŭ biełarusak i inšyja pytańni da brendu.
Pa-pieršaje, dziŭna, što taki nabor biełaruskaj kaśmietyki nielha nabyć u Biełarusi. Na aficyjnaj staroncy brendu ŭ instahramie rajać zamaŭlać advent-kalandar na rasijskim markiet-płejsie Wildberries.
Pa-druhoje, ahlady na advient-kalandar Luxvisage pačali rabić rasijskija błohierki. Vyhladaje tak, byccam brend dasłaŭ navinku mienavita im, praihnaravaŭšy biełaruskich.
Uźnikajuć pytańni i nakont taho, u jaki ž dzień pačynać raspakoŭku advent-kalendara. Bo zvyčajna ŭ Jeŭropie ź jaho dapamohaj čakajuć Kalady (tamu akiencaŭ ź minijaciurnymi padarunkami 24 ci 25). Apošnim časam źjavilisia varyjanty i dla nierelihijnych ludziej — na 30 ci 31 akienca, kab čakać Novy hod.
Ale ŭ advient-kalendary Luxvisage usiaho 12 akiencaŭ. U kamientaryjach sumna žartujuć, što, mabyć, pačynać raspakoŭku treba za 12 dzion da nastupnaj zarpłaty, kab viesialej było čakać dnia, kali narešcie znoŭ dazvoliš sabie nabyć ježy paśla darahoha padarunka.
Nu i hałoŭnaje pytańnie datyčycca koštu. Za 12 tannych biełaruskich praduktaŭ prapanujuć zapłacić 257 rubloŭ.
Hałoŭny pryncyp advent-kalendaroŭ ad jeŭrapiejskich brendaŭ kaśmietyki zaklučajecca ŭ tym, što pakupnik atrymlivaje praduktaŭ na bolšuju sumu, čym zapłaciŭ. Naprykład, addaŭ 100 jeŭra, a atrymaŭ bjuci-srodkaŭ na 200. Kaniešnie, tam jość svaje chitraści. Naprykład, časta kładuć pradukty, jakija zvyčajna nie karystajucca vialikaj papularnaściu (pamadu nie samaha chadavoha adcieńnia ci jašče niešta takoje). Ale z bolšaha ludzi zastajucca zadavolenymi.
U Luxvisage atrymlivajecca, što nabyć padarunki asobna budzie ŭ dva razy tańniej, čym kali zamoviš advent-kalandar całkam. My padličyli košt usich praduktaŭ u advencie Luxvisage, karystajučysia tym samym Wildberries — atrymałasia kala 128 rubloŭ.
U instahramie Luxvisage šmat aburanych biełarusak, jakija taksama nie palenavalisia samastojna padličyć ahulny košt padarunkaŭ. Žančyny pytajucca, čym možna heta rastłumačyć. Najbolš papularny varyjant: «Mabyć, kardon taki darahi». Pradstaŭniki brendu niehatyŭ pakul ihnarujuć.
Sioleta Luxvisage aktyŭna zamaŭlaŭ rekłamu svajoj kaśmietyki ŭ topavych rasijskich błohierak. Navat Ksienija Sabčak pryznavałasia ŭ lubovi da tušy dla viejek Luxvisage XXL i hielu dla brovaŭ taho ž brendu.
Tady padpisčyc ź Biełarusi najbolš chvalavaŭ toj fakt, dzie supierbiudžetny biełaruski brend znajšoŭ hrošy na rekłamu ŭ Sabčak. Chtości vykazaŭ zdahadku, što markietołaham Luxvisage pryjšłosia pradać dušu djabłu. A adna dziaŭčyna pažartavała: «Usioj Biełaruśsiu skidalisia vam na rekłamu». Mabyć, u tym žarcie była častka praŭdy.
«Usioj Biełaruśsiu skidvalisia na rekłamu»: Ksienija Sabčak rekłamuje biełaruski hiel dla brovaŭ koštam 6 rubloŭ
«Stali ratunkam, a potym i spravaj žyćcia». Žycharka Baranavič uciakła z bjuciśfiery i pieratvaryła chobi ŭ biznes
«Pradam ajfon, nie spadabaŭsia koler». Na «Kufry» pierapradajuć navahodnija padarunki
Kamientary
Čamu kiraŭnicy vybarčaha štabu Cichanoŭskaj možna Tesłu kuplać, Viačorku nasić hadzińnik za tysiačy dalaraŭ, Krasulinaj navučać dziaciej u Bierlinie nieviadoma za jakija hrošy, Cichanoŭskaj žyć nieviadoma za kolki i adkul atrymanaje, a prostym ludziam nielha kupić toje, što jany chočuć, za svaje?