«Spadziajusia, heta ŭbačać u Amierycy i ŭ čarhovy raz pačnuć nam zajzdrościć». Tyktok śmiajecca z homielskaha aeraporta
Błohierka pakazała ŭ tyktoku, jak vyhladaje zona vyletu ŭ homielskim aeraporcie. Zdajecca, čas tut spyniŭsia niekalki dziesiacihodździaŭ tamu.
Vieranika vylatała z aeraporta Homiela ŭ Maskvu i vyrašyła źniać videa dla tyktoku i pakazać, jak toj vyhladaje. Kaža, sama była ŭ šoku. Zona rehistracyi bolš-mienš prystojnaja. Jość dźvie stojki rehistracyi i navat kafieteryj. Ale ździŭlaje, kaniešnie, adsutnaść ludziej (u kadr trapiła ŭsiaho dva čałavieki) i miortvaja cišynia.
Pobač z aeraportam amal što pustaja parkoŭka — niahledziačy na toje, što biaspłatnaja. Jak kaža tyktokierka, tyja niekalki pryparkavanych mašyn chutčej za ŭsio naležać rybakam, jakija pryjechali na voziera la aeraporta.
A voś zona vyletu vyhladaje tak, byccam tut pryncypova vyrašyli pakinuć muziej savieckaj hramadzianskaj avijacyi. Raźbityja padłohi, pafarbavanyja farbaj žudasnaha zialonaha koleru ściany. U kucie sumujuć viadro i švabra, na jakuju niejki haspadarlivy supracoŭnik prylapiŭ razdrukavany na pryntary nadpis «Dla tualetaŭ». Zatoje na ścianie možna ŭbačyć strohaje papiaredžańnie dla zamiežnikaŭ: «No smoking!».
— Bačycie, jak sučasna, — sumna žartuje Vieranika i paśla dadaje: — U mianie takoje adčuvańnie, byccam ja ŭ 80-ja trapiła.
Kafieteryj taksama vyhladaje vielmi ścipła.
Za try dni videa nabrała kala 420 tysiač prahladaŭ. Kamientatary kpiać. «Spadziajusia, što heta pabačać u Amierycy i ŭ čarhovy raz pačnuć nam zajzdrościć», — napisała adna žančyna. Druhaja adznačyła, što lacieła z hetaha aeraporta kala 30 hadoŭ nazad: «Voś heta stabilnaść! Ničoha nie źmianiłasia!»
A niechta spytaŭ: «A dakładna heta nie vakzał u vioscy?». Jašče adna kamientatarka rastłumačyła situacyju: «Vy nie zrazumieli? Heta ž muziej SSSR! Retra aeraport! Vy nidzie bolš takoha nie pabačycie. Heta taki dyzajn».
Byli i racyjanalizatarskija prapanovy zdavać aeraport u arendu kinošnikam, kab choć niejak pačać na im zarablać.
Byli i kamientary pra toje, što ničoha drennaha ŭ takim aeraporcie niama i treba šanavać toje, što jość.
U adkaz takim niepieraborlivym biełarusam błohierka zapisała videa ŭ aeraporcie Samarkanda (žančyna lacieła ŭ adpačynak va Uźbiekistan z Homiela praz Maskvu). Žyvie ŭ hetym horadzie krychu bolš čałaviek, čym u Homieli, — kala 550 tysiač. Ale ž aeraport Samarkanda vyhladaje sučasna, ludziej tam vidavočna bolš.
Jašče ŭ adnym videa Vieranika kaža:
— Chaciełasia b bačyć naš aeraport u lepšym vyhladzie. Bo heta mižnarodny aeraport, na siekundu. Heta nie sielski aeraport, nie ŭnutrany. Chaciełasia b, kab jon vyhladaŭ prezientabielna dla ludziej, tamu što heta pieršaje ŭražańnie ab našaj krainie.
Kamientary