«Ja vas, baranaŭ, rezaŭ i budu rezać». Dzieviać razoŭ sudzimy najmit viarnuŭsia z ukrainskaha pałonu i zabiŭ chłopca byłoj žonki

Były najmit PVK «Vahnier» Arciom Syčoŭ byŭ dzieviać razoŭ sudzimy za kradziažy, rabavańnie, machlarstva, paboi, pryčynieńnie škody i zabojstva. Na volu jon vyjšaŭ paśla taho, jak zavierbavaŭsia na vajnu. Tam jon trapiŭ u pałon, viarnuŭsia na radzimu ŭ vyniku abmienu i znoŭ ździejśniŭ zabojstva.

Sud u piermskaj Dabrancy prysudziŭ Syčova da 10 hadoŭ kałonii strohaha režymu za zabojstva sužyciela svajoj byłoj žonki, piša «Viorstka».

Syčoŭ raskazvaŭ, što pryjechaŭ u hości da svajoj byłoj žonki i razam ź joj i jaje sužycielem Maksimam vypivaŭ na kuchni. Astatniaje jon pamiataje ćmiana, tamu što byŭ pjany.

Byłaja žonka Syčova raskazała, što vyjšła na niekalki chvilin zakinuć u łaźniu droŭ. Viarnuŭšysia, jana zaŭvažyła na padłozie plamy kryvi, jakija viali z kvatery na vulicu. Vybiehšy z domu, žančyna ŭbačyła Maksima, jaki lažaŭ na ziamli. Syčoŭ stajaŭ nad im i trymaŭ jahonuju hałavu, i «jak jana zrazumieła, sprabavaŭ pierarezać jamu horła».

Žančyna padbiehła i adšturchnuła Syčova, jaki zajaviŭ joj, što «ja vas, baranaŭ, rezaŭ i budu rezać». Maksim da hetaha momantu byŭ užo biez prytomnaści. Paranienaha mužčynu na chutkaj advieźli ŭ balnicu, ale na nastupny dzień jon pamior.

Pa słovach syna žančyny, Syčoŭ razzłavaŭsia na Maksima za toje, što jon pacałavaŭ pry im jahonuju byłuju žonku. Ekśpierty ŭstanavili, što «vahnieraviec» nanios achviary nie mienš za piać udaraŭ nažom u tvar, hrudzi, šyju i padpachavuju vobłaść.

U jakaści źmiakčalnych abstavin sud pryznaŭ udzieł Syčova ŭ vajnie suprać Ukrainy ŭ jakaści dobraachvotnika PVK «Vahnier», a taksama dziaržaŭnyja i viedamasnyja ŭznaharody, i prysudziŭ jaho da 10 hadoŭ kałonii strohaha režymu. Taksama zabojcu abaviazali vypłacić 1 młn rubloŭ (kala 10 tysiač dalaraŭ) maralnaj kampiensacyi na karyść maci zahinułaha.

Pry hetym u prysudzie havorycca, što Syčoŭ «nie sudzimy». Zvyčajna heta śviedčyć pra toje, što były źniavoleny atrymaŭ pamiłavańnie paśla taho, jak zavierbavaŭsia na vajnu va Ukrainie.

U 2006—2016 hadach Syčoŭ byŭ vosiem razoŭ sudzimy za kradziažy, machlarstva, rabavańnie, uhon, paboi, naŭmysnaje pryčynieńnie lohkaj, siaredniaj i ciažkaj škody. A ŭ 2021 hodzie piermski sud prysudziŭ jaho da 7,5 hadoŭ strohaha režymu za zabojstva.

Tady žonka paviedamiła jamu pra žadańnie raźvieścisia i źjechała, a Syčoŭ vypiŭ i pasvaryŭsia ź piensijanierkaj, u jakoj časova žyŭ razam z žonkaj. Paśla hetaha jon udaryŭ žančynu źleva ŭ padpachu i paškodziŭ joj serca. Stupień ich svajactva ŭ pastanovie suda nie adznačałasia, ale sam jon nazyvaŭ zahinułuju «babulaj».

Miarkujučy pa ŭsim, paśla hetaha jon zavierbavaŭsia na vajnu va Ukrainie. Na froncie Syčoŭ trapiŭ va ŭkrainski pałon: u studzieni 2023 hoda prajekt «NIE ČAKAJ mianie z Ukrainy» apublikavaŭ jahonaje fota.

U Rasiju Syčoŭ moh viarnucca ŭ vyniku abmienu 31 studzienia 2024 hoda. Tady Ukraina pieradała 195 pałonnych, bolšaść ź jakich byli byłymi źniavolenymi. Piermski ambudsmien tady kazaŭ, što siarod vaśmi vajskoŭcaŭ ź Piermskaha kraju, jakija viarnulisia ŭ vyniku abmienu, jość u tym liku žychar Dabranki.

• 2
• 0
• 24
• 22
• 3
• 0
• 9
• 0