Strałkoŭ, Limonaŭ, Praśvirnin zasnavali «Kamitet 25 studzienia». Ich meta — dałučyć Biełaruś i Ukrainu da Rasii
Učora ŭviečary ŭ ofisie ruchu «Navarosija» ŭ Maskvie pad staršynstvam Ihara Strałkova, kolišniaha lidara «DNR», adbyŭsia ŭstanoŭčy schod «Kamiteta 25 studzienia».
Na pasiedžańni prysutničali piśmieńnik-nacboł Eduard Limonaŭ, redaktar sajta «Sputnik i pahrom» Jahor Praśvirnin, zasnavalnik niezarehistravanaj Nacyjanalna-demakratyčnaj partyi Kanstancin Kryłoŭ, piśmieńnik-futurołah Maksim Kałašnikaŭ, błohier El Miuryd (Anatol Nieśmijan).
Usio heta krajnie pravyja abo krajnie levyja, marhinalnyja rasijskija palityčnyja siły.
«My syšlisia ŭ mierkavańni ab tym, što stanovišča RF skočvajecca da sistemnaha krachu, što prazachodnija libierały ŭžo nie chavajuć svajoj złaradnaści i zahadzia prymiarajucca da ŭłady i što sama ŭłada RF robić usio dla svajho padzieńnia. Situacyja mocna nahadvaje napiaredadzień Majdana va Ukrainie. Pry hetym u krainie niama razumnaj Treciaj siły, što procistaić jak tupikovym, zbankrutavanym achranicielam, hetak i prazachodnim biełastužačnikam», — napisaŭ na svajoj staroncy ŭ ŽŽ Maksim Kałašnikaŭ.
Eduard Limonaŭ ža adznačyŭ metu kamiteta nastupnym čynam: «Kab Rasija nie dastałasia chadarkoŭskim libierałam. Staŭleńnie da isnujučaj ułady — chaładnavata ŭmieranaje».
Siarod svaich metaŭ kamitet «25 studzienia» nazyvaje: na pieršych parach nie dać Rasii razvalicca, a ŭ budučyni – pačać «palityku ŭznaŭleńnia ruskaha naroda ŭ adnoj dziaržavie». «Pry hetym dla nas ruskija – heta vielikarosy, małarosy i biełarusy». Takim čynam ruch vystupaje za likvidacyju biełaruskaj niezaležnaści.
«Dziejučaja ŭłada chvoraja i zaniataja samarazbureńniem. Naviazvacca joj u pamočniki my nie majem namieru. I vymazvacca ŭ joj — taksama. Jana ciapier na vačach pieratvarajecca ŭ chadziačaha mierćviaka, zabiŭšy siabie ekanamičnym idyjatyzmam apošnich 15 hadoŭ», — praciahnuŭ Kałašnikaŭ.
U jaki dzień u 2020-m mahli zdarycca pieramieny? Polski dypłamat vydaŭ knihu ab pracy ŭ Biełarusi i daŭ adkaz na heta pytańnie9
Kamientary