HUBAZiK zatrymaŭ za kamientary jašče adnaho mužčynu. Toj zrabiŭ tuju ž pamyłku, što i dziasiatki tysiač biełarusaŭ
Jahony vypadak taksama pakazvaje, što HUBAZiK pracuje pa samych lohkich mišeniach.
Zatrymanamu Dźmitryju Čarnuchu — 28 hadoŭ. Jon z Barysava. Pracavaŭ u roznych miescach i ničym asabliva nie vyłučaŭsia.
U 2020-m mužčyna pakinuŭ amal 400 kamientaroŭ u adras łukašystaŭ u roznych čatach i nie vydalaŭ ich. Ciapier za ich na jaho zaviali kryminalnyja spravy, kali vieryć kanału HUBAZiKa.
Jak jaho znajšli, choć spačatku jahony akaŭnt byŭ abaronieny davoli dobra? Vielmi prosta — jon źmianiŭ imia i «avatarku» ŭ telehramie na svaje ŭłasnyja. Paśla hetaha adšukać jaho stała spravaj litaralna siekundaŭ.
Jon daloka nie pieršy, kaho zatrymlivajuć z hetaj pryčyny. Učora my paviedamlali pra zatrymańnie minčuka, jaki ŭ niejki momant adkryŭ svoj numar u telehramie. Viadoma, što pa hetaj ža pryčynie apynułasia za kratami Maryna Sankievič, jakoj prysudzili siem hadoŭ kałonii za kamientary ŭ telehramie.
Davoli prostyja miery biaśpieki mohuć dapamahčy vam zaścierahčysia, choć i nie harantujuć biaśpieki.
Pa źviestkach hrodzienskich pravaabaroncaŭ, dziasiatki tysiač karystalnikaŭ majuć adkrytyja piersanalnyja źviestki ŭ telehramie. Ahułam kala miljona akaŭntaŭ, jakija naležać biełarusam, pakidali kamientary ŭ adkrytych čatach.
My šmat razoŭ nahadvali pra toje, što kali vy ŭ 2020-m pisali ź nieabaronienaha akaŭnta, to harantyi biaśpieki być nie moža. Ale voś što možna zrabić, kab źmienšyć ryzyku.
- Pačyścić kamientary ŭ telehramie (z dapamohaj bota ad hrodzienskich pravaabaroncaŭ), vydalić akaŭnt i stvaryć jaho nanova. Lepš — na virtualny, kupleny za kryptavalutu abo za miažoj numar.
- Vyčyścić fota sa smartfona, akaŭnta Google Photos i akaŭnta ŭ iCloud, kab prybrać fota z pratestaŭ.
- Vyčyścić «kramołu» ź inšych sacsietak i miesiendžaraŭ: Viber, Whatsapp, Telegram, Instagram, Facebook, VK i «Adnakłaśniki» (asobna vydalicie łajki).
- Pačyścicie vaš akaŭnt u Google (i Google Play), a taksama YouTube, kali tam mahło zachavacca niešta «kramolnaje».
- Praanalizujcie, dzie jašče mahli być ślady vašaj dziejnaści, i pasprabujcie ich źmienšyć abo vydalić zusim — tut vam dapamohuć pošukaviki.
«Naša Niva» — bastyjon biełaruščyny
PADTRYMAĆU jaki dzień u 2020-m mahli zdarycca pieramieny? Polski dypłamat vydaŭ knihu ab pracy ŭ Biełarusi i daŭ adkaz na heta pytańnie1
Kamientary