Šrajbman patłumačyŭ, čym lidarstva Cichanoŭskaj važnaje dla alternatyŭnaj Biełarusi
«Piersanalija lepš uvasablaje alternatyŭny prajekt Biełarusi».
U novym vypusku jutub-kanała Carnegie Politica ekśpierta Bierlinskaha centru Karnehi Arcioma Šrajbmana paprasili patłumačyć, nakolki važna najaŭnaść lidara dla isnavańnia biełaruskaj apazicyi.
Pa słovach analityka, najaŭnaść u biełaruskaj apazicyi lidara ŭ asobie Śviatłany Cichanoŭskaj «maje dadanuju vartaść».
«Bieź jaje situacyja była b horšaj. Nie tamu, što jana niejkim cudadziejnym čynam arhanizuje dziejnaść apazicyi, i apazicyja stanovicca efiektyŭniej. Nie.
Prosta heta napramuju paŭpłyvała na mahčymaści alternatyŭnaj Biełarusi atrymlivać mižnarodnuju ŭvahu, łabiravać niejkija važnyja dla siabie pytańni, źviazanyja z takimi praktyčnymi temami, kštałtu zakrytych-adkrytych pahranpierachodaŭ, viz, adukacyjnych mahčymaściej, dyskryminacyi/niedyskryminacyi biełarusaŭ».
Akramia hetaha, na pohlad analityka, «piersanalija lepš uvasablaje alternatyŭny prajekt Biełarusi».
«2020 hod, jaki ŭ cełym u zachodnim śviecie ŭsprymajecca jak paražeńnie Łukašenki na vybarach, daŭ hetuju dualnaść usprymańniu Biełarusi: jość adna Biełaruś, [a] jość Biełaruś alternatyŭnaja, jakaja pry inšych histaryčnych uvodnych chutčej za ŭsio źlijecca z realnaj, z toj, jakaja znachodzicca ŭnutry krainy, u jaje miežach, i maje niadrennyja šancy ŭznačalić [krainu]».
«Ja nie havaru kankretna pra Śviatłanu Cichanoŭskuju, a pra pradstaŭnikoŭ prademakratyčnaha padychodu — kali chočacie, ideałohii, — bo 2020 hod pakazaŭ vializny zapyt na alternatyŭny šlach raźvićcia», — udakładniaje analityk.
Šrajbman zaŭvažaje, što ŭ ciapierašnich umovach niama niejkaj palityčnaj baraćby, u jakoj lidarstva sapraŭdy maje značeńnie: «bolš-mienš lehitymnaje pradstaŭnictva maje značeńnie dla taho, kab u vostryja momanty prymać važnyja losavyznačalnyja rašeńni, jakija buduć pryznavacca ŭsimi ŭdzielnikami pratestu ci demakratyčnaha ruchu».
«Heta toje, čaho nie chapała biełaruskaj apazicyi ŭ 2020-m hodzie. Była niejkaja razhublenaść, było niejkaje nierazumieńnie, jak dziejničać dalej, była stałaja dekapitacyja kiraŭnictva apazicyj. Lidaraŭ sadžali, vyhaniali z krainy, novyja źjaŭlalisia, ich sadžali, i nie stvaraŭsia ŭstojlivy miechanizm kiravańnia hetym rucham.
Tamu ŭ hetym sensie nie toje, kab hetaje lidarstva było nieabchodna dla ŭnutranaj palityki ŭ Biełarusi, ale jano nieabchodna dla źniešniaj, jano biezumoŭna dapamahaje dypłamatyi», — tłumačyć Šrajbman.
U jaki dzień u 2020-m mahli zdarycca pieramieny? Polski dypłamat vydaŭ knihu ab pracy ŭ Biełarusi i daŭ adkaz na heta pytańnie9
Kamientary
Dla takich Šrajbmanaŭ mienavita "alternatyŭnaja" Biełaruś vyhodnaja ź Cichanoŭskaj ci bieź jaje, bo heta daje jamu pracu i hrošy. Nam, biełarusam, patrebnaja svaja adzinaja Biełaruś. Biez Łukašenki i biez kultaŭ Cichanoŭskich i inšych žadajučych pasiadzieć na našym karku. My - narod, a nie statak, jaki hladzić u rot niejkamu lidaru-viertuchaju.