Vučnia nie adpuścili dadomu z bolem u žyvacie — usio skončyłasia apieracyjaj

Kiraŭnictva škoły nie zdymaje ź siabie adkaznaść za toje, što adbyłosia: kłasny kiraŭnik užo atrymała vymovu. Adnak dyrektar škoły źviartaje ŭvahu, što ŭ hetaj historyi nie ŭsio tak adnaznačna:

«Maci vučnia, viedajučy, što ŭ jaho balić žyvot, mahła sama pieratelefanavać u škołu, ale nie zrabiła hetaha».

«Ja vyrašyła: raz nichto nie telefanuje, značyć, z synam usio ŭ paradku»

Syn Kaciaryny vučycca ŭ staličnaj škole №53 u 8-m kłasie. U toj dzień, 19 śniežnia, padletak patelefanavaŭ maci na mabilny telefon i raspavioŭ, što ŭ jaho balić žyvot.

— Heta było hadzinie a 11-j. Ja skazała synu, kab jon znajšoŭ kłasnaha kiraŭnika ci zavuča i paprasiŭsia dadomu, paabiacała, što ŭ vypadku patreby zabiaru jaho. Jon pieratelefanavaŭ i pieradaŭ słovy kłasnaj: zastałosia ŭsiaho try ŭroki, paprasiła zastacca. Ja nakiravała syna da miedsiastry — pakazacca na ŭsialaki vypadak.

Taja, jak mnie paśla raspavioŭ syn, ahledzieła jaho žyvot, ale nie pamierała tempieraturu, dała piać tabletak aktyvavanaha vuhalu i adpraviła na ŭrok. Jon i pajšoŭ. Varta adznačyć, što chłopiec u mianie ścipły, spakojny, adkazny i lišni raz pabajaŭsia b kaho-niebudź paturbavać. Ja ž vyrašyła, što raz nichto nie telefanuje, ni kłasnaja, ni miedsiastra, značyć, z synam usio ŭ paradku. Jon patelefanavać nie moh, bo telefony na čas urokaŭ u dziaciej zabirajuć, — emacyjna raspaviadaje žančyna.

Pa słovach Kaciaryny, syn prasiadzieŭ jašče try ŭroki ŭ škole i viarnuŭsia dadomu z bolem u žyvacie sprava i tempieraturaj krychu vyšej za 37 hradusaŭ. Z hetymi simptomami jany pryjechali ŭ dziciačuju palikliniku №1. Tam padletku zrabili UHD i paśla ahladu chirurha nakiravali ŭ RNPC dziciačaj chirurhii z padazreńniem na vostry apiendycyt (hierainia pradastaviła redakcyi dakumienty, jakija paćviardžajuć dyjahnaz).

Kala 16 hadzin padletka špitalizavali ŭ adździaleńnie ekstrannaj chirurhii, i da viečara apieryravali. Paźniej z epikryzu stała viadoma: u syna hieraini byŭ vostry flehmanozny apiendycyt, spatrebiłasia pałasnaja apieracyja. Padletka vypisali dadomu za niekalki dzion da Novaha hoda. Zaraz z chłopcam usio ŭ paradku, jon chodzić na ŭroki, ale ŭ jaho maci zastalisia pytańni da navučalnaj ustanovy.

— Heta dobra, što svoječasova pryjechali ŭ balnicu. Ja tady patelefanavała kłasnamu kiraŭniku i spytała, čamu mnie nichto nie patelefanavaŭ, nie paviedamiŭ, jak moj syn siabie adčuvaje, bo jon sam nie moh sa mnoj źviazacca z-za taho, što ŭ dziaciej zabirajuć telefony. Vychodzić, što syn siadzieŭ i pakutavaŭ na ŭrokach z takimi bolami ŭ žyvacie! I pytańni ŭ mianie nie tolki da kłasnaha kiraŭnika, ale i da miedsiastry, jakaja navat tempieraturu nie pamierała. Ja nie miedyk, ale pry bolach u žyvacie i pavyšanaj tempieratury ŭžo možna było dziejničać inakš. Nu patelefanavali b, skazali, što adnaho nie adpuskajuć — ja b adrazu pryjechała.

«Kłasny kiraŭnik abaviazany byŭ patelefanavać baćkam»

Paśla navahodnich śviataŭ z roźnicaj u adzin dzień Kaciaryna atrymała adkazy na abodva zvaroty. U adkazie škoły havorycca, što situacyja, jakaja adbyłasia z synam hieraini 19 śniežnia, była razhledžana na naradzie pry dyrektary, a z kłasnaha kiraŭnika i fielčara ŭziali piśmovyja tłumačeńni.

Tak, kłasny kiraŭnik patłumačyła, što paśla skarhi vučnia na bol u žyvacie nakiravała jaho ŭ miedpunkt. Miedrabotnik, u svaju čarhu, «abśledavaŭ dzicia i daŭ piać tabletak vuhalu», parekamiendavaŭšy jamu źviarnucca paŭtorna, kali boli zachavajucca. U liście havorycca, što vučań bolš nie źviartaŭsia sa skarhami na drennaje samaadčuvańnie.

U toj ža čas kłasny kiraŭnik pryznałasia, što nie patelefanavała maci vučnia i nie paviedamiła joj pra drennaje samaadčuvańnie syna. Za heta nastaŭniku było vyniesiena dyscyplinarnaje spahnańnie ŭ vyhladzie zaŭvahi.

Z upraŭleńnia adukacyi Savieckaha rajona pryjšoŭ bolš detalovy adkaz. Naprykład, acenku dziejańniam fielčara davała ŭžo paliklinika, bo miedrabotnik nie źjaŭlajecca supracoŭnikam škoły, a ličycca ŭ štacie miedycynskaj ustanovy. U adkazie na zvarot adznačajecca, što na momant ahladu vučnia fielčaram «dadzienych ab vostraj chirurhičnaj patałohii nie było». Tam taksama padkreślivajecca, što padletku było rekamiendavana źviarnucca paŭtorna ŭ miedpunkt, kali boli zastanucca na praciahu 45 chvilin, ale dzicia hetaha nie zrabiła.

Zhodna z adkazam upraŭleńnia adukacyi, nastaŭnik abaviazany byŭ prainfarmavać baćkoŭ vučnia pra toje, što zdaryłasia. Heta patrabuje słužbovaja instrukcyja rabotnikaŭ ustanoŭ adukacyi i praviły ŭnutranaha rasparadku škoły.

Dyrektar škoły: «Nichto nie trymaŭ by dzicia ŭ škole nasilna. Navošta nam heta?»

Žurnalisty źviazalisia z dyrektaram škoły z prośbaj prakamientavać vypadak ź ich vučniem. Voś što jana raspaviała:

— Apiendycyt u S. adbyŭsia ŭ balnicy. Dniom z ranicy ŭ jaho pačalisia pieršyja prykmiety, maci viedała pra heta, ale dadomu nie zabrała. Nijakaj viny škoły ŭ hetym niama, — prakamientavała Natalla Ślapian.

— Kaciaryna kaža, što joj nichto sa škoły nie zvaniŭ.

— Syn patelefanavaŭ joj sam i skazaŭ, što ŭ jaho balić žyvot. Jaho nakiravali ŭ miedpunkt. Miedsiastra ahledzieła S., dała aktyvavany vuhal i papiaredziła, što, kali jon budzie i dalej adčuvać siabie kiepska, treba joj pra heta paviedamić. Tak, maci sapraŭdy nie patelefanavali paśla naviedvańnia miedpunkta. Ale niezrazumiełaja i pazicyja maci: čamu jana nie patelefanavała ni synu, ni kłasnamu kiraŭniku, kab udakładnić, jak jon siabie adčuvaje?

— Pavodle słoŭ maci, kłasny kiraŭnik «uhavorvała S. zastacca na ŭrokach».

— Heta niapraŭda. Maci viedała, što jamu kiepska, ale nie pieratelefanavała i nie zabrała dadomu. <…> U kłasnaha kiraŭnika ŭvieś dzień uroki, 30 čałaviek u kłasie. My zrabili joj zaŭvahu, što jana nie patelefanavała maci vučnia i nie paviedamiła, što jamu nie horš, što jamu dali aktyvavany vuhal. <…> Pry hetym jamu nie było kiepska: jon hulaŭ u telefonie, razmaŭlaŭ z adnahodkami, siadzieŭ na ŭrokach. U nas u škole vydatnyja piedahohi, jany b zaŭvažyli, kali b dziciaci było kiepska, ci jon sam by skazaŭ. Ale źniešnich prykmiet taho, što jamu kiepska ci niešta balić, nie było. <…> Nichto nie trymaŭ by dzicia ŭ škole nasilna. Navošta nam heta? My vyklikajem chutkuju ŭ škołu, heta nie zabaroniena.

— Pavodle słoŭ maci, u vučniaŭ na čas urokaŭ zabirajuć telefony, i patelefanavać synu, atrymlivajecca, nie było sensu.

— U staršych kłasach my telefony nie zabirajem, jany lažać u kłasie. Vučni sapraŭdy zdajuć telefony pry ŭvachodzie [ŭ kłas]: kładuć ich u śpiecyjalny boks. Ale kali dziciaci treba patelefanavać, jamu nichto hetaha nie zabaraniaje.

• 0
• 0
• 0
• 6
• 1
• 1
• 11
• 0