«Pavinna stajać kali i nie ŭ pieršych, dyk u šerahach». Mukavozčyk zaklikaŭ tvorčuju intelihiencyju publična padtrymlivać represii
Viadomy prapahandyst z «SB. Biełaruś siehodnia» Andrej Mukavozčyk vystupiŭ z artykułam na staronkach haziety «Litaratura i mastactva», u jakim uščuvaje tvorčuju intelihiencyju za toje, što bolšaść jaje ŭchilajecca ad pramoj publičnaj padtrymki režymu Łukašenki i jaho represiŭnaj palityki.
«Čamu vy saromiejeciesia, siabry, publična vykazać svoj patryjatyzm i dziaržaŭnaść? Niachaj u mastackaj formie, ale — vykazać?» — pačynaje svoj artykuł Mukavozčyk, padpisaŭšysia jak «člen Prezidyuma Sajuza piśmieńnikaŭ Biełarusi».
U jakaści łakmusavaj papierki jon pryvodzić svoj ža raniejšy «ekspres-test», u jakim prapanuje adkazać čałavieku na pytańnie, za ci suprać jon uviedzienych suprać łukašenkaŭskaj Biełarusi sankcyj, i kali suprać — to treba pra heta napisać ci skazać publična, a chto ŭchilajecca ad hetaha — toj «pradstaŭnik «antahanistyčnaha kłasa».
Uchilajucca ž, pavodle nazirańniaŭ Mukavozčyka, mnohija:
«I tut nie tolki pra piśmieńnikaŭ razmova — mastaki ich zusim nie apiaredžvajuć. I architektary z dyzajnierami taksama. Jak i teatralnyja z muzyčnymi dziejačy, a taksama litaraturna-mastackija krytyki. […] Uvohule, nie chapaje asabista mnie choć niejkaj «dźvižuchi» ŭ toj hramadskaj supolnaści, jakaja ŭśviedamlaje siabie nibyta asobna ad inšych, pad nazvaj «tvorčaja intelihiencyja».
Ad tvorcaŭ Mukavozčyk čakaje «padtrymki kursu rodnaj krainy, padtrymki jaje realnaha suvierenitetu, padtrymki nieabchodnych reform i nieabchodnych represij».
«Usich znojdziem — i ŭ hetym «my», tvorčaja intelihiencyja, miarkuju, pavinna stajać kali i nie ŭ pieršych, dyk u šerahach. Ci nie, kalehi?»
Paśla taho jon paŭščuvaŭ «kaleh» za toje, što tyja nie ceniać dabrotaŭ, atrymanych nibyta ledź nie vyklučna ad dziaržavy, i nie chočuć adździačyć «ruce, jakaja kormić».
«I voś ciapier my z vami zaviaršajem, idučy na vybary, čarhovy histaryčny vitok u losie našaj Biełarusi — a chto pra heta piša? Śpiavaje? Vykazvajecca? Ja navat dapuskaju, što i dahetul u vas — u častki — zastalisia peŭnyja sumnieńni», — zaŭvažaje Mukavozčyk.
Paśla čaho zaprašaje tvorcaŭ uklučycca ŭ ažyŭleńnie najsumniejšaj u najnoŭšaj historyi Biełarusi prezidenckaj vybarčaj kampanii.
«Dyk davajcie! Paspračajciesia, ci maje racyju Hajdukievič u svaim epičnym žeście ci niachaj pakazvaje jaho Syrankovu ŭ adkaz na prapanovu taho ab ułasnaści. Źbiarycie kruhły stoł na temu bačnych dobrych jakaściej i niedachopaŭ Kanapackaj na fonie Chižniaka — ci naadvarot. Tolki nie maŭčycie. Nie zamieniać lidary mierkavańniaŭ, prapahandysty i ekśpierty tvorčuju intelihiencyju, dakładniej, nie zdolejuć prykryć jaje biezdapamožnaje maŭčańnie», — zaklikaje prapahandyst.
A paśla taho adrazu pierachodzić da tolki krychu zakamuflavanych pahroz:
«A ciapier nie čas maŭčać. Inakš potym ža mohuć spytać: vy, značyć, nie Tałstoj? Nie Leŭ, atrymlivajecca? Možacie, akazvajecca, maŭčać? Dyk a navošta tady vy ŭvohule na kazionnych charčach padjadajeciesia?»
Dakarajučy tvorcaŭ, što tyja ŭ 2020 hodzie nie žadali iści ŭ adkryty boj suprać ułasnaha naroda, Mukavozčyk adznačaje:
«Nu tady — niachaj, ale voś ciapier — situacyja prama supraćlehłaja. Ciapier bicca ŭžo nie treba — niama z kim! Zatoje treba dapamahčy na budoŭli. Padstavić plačo reformam. Vykazacca na karyść kursu, jakim idzie kraina. Prosta praśpiavać razam z narodam, a to i zapiavałaj kali-nikali stać».
Adnak ža, nasupierak čakańniam, «znoŭ nie vidać hetaha ad tvorčaj intelihiencyi». Choć
«chtości ž pavinien iści napieradzie, źbirajučy ŭvieś viecier i ŭsie kamiani, ale asabistym prykładam viedučy za saboj? A čamu heta pavinna być nie tvorčaja intelihiencyja sa svaimi sajuzami, drukavanymi i roznymi orhanami i inšymi dziejnymi strukturami?»
Urešcie naprykancy prapahandyst źviartajecca da histaryčnaha dośviedu i nahadvaje, što ad aktyŭnaj padtrymki represij suprać ułasnaha naroda (jakija ciaham usiaho artykuła pabłažliva nazyvajucca «rypresijami») tvorcy mohuć atrymać istotnyja materyjalnyja bonusy. Bo kali represii byli pry Stalinie:
«tak, mnohija tvorčyja ludzi paciarpieli. Adnak inšyja — i taksama mnohija — jak syr u maśle płavali, niaŭžo nie? I dzieci ich, a ŭ niekatorych jašče i ŭnuki, i praŭnuki atrymali ŭ spadčynu srebnyja łyžki ŭ ratok. Ci roŭnaja addača? I potym: moža, heta taki žyćciovy bałans, hetki zakon zachavańnia, i «rypresii» ni pry čym?»
Biełaruskaja prapahanda stvaryła tabłoid «Piatnica». Jaki vychodzić u sieradu
Mukavozčyk: Kali HUBAZiK zatrymaje mianie za padpisku na Matolku, absalutna budzie mieć racyju
«Strašna toje, što jany robiać u ramkach Sajuznaj dziaržavy». Suprać Bondaravaj i jaje kamandy vystupiŭ navat Mukavozčyk
Mukavozčyk: Pahoniu para ŭ ich zabirać, jana pavinna być naša
«Ludzi vychodzili adtul mokryja, byccam u h…no ich mačanuli». Prapahandyst Mukavozčyk vučyŭ patryjatyzmu žodzinskich piedahohaŭ
Kamientary
Tovariŝ A.Mukovozčik