Lan Veńfen — tajemny zasnavalnik DeepSeek, jaki pieraviarnuŭ śviet štučnaha intelektu

Jašče niekalki tydniaŭ tamu mała chto pa-za miežami śvietu kitajskich finansaŭ viedaŭ imia Lan Veńfena (Liang Wenfeng). 20 studzienia pa kitajskim telebačańni byŭ pakazany siužet ab sustrečy premjera Dziaržrady Kitaja Li Ciana ź nievialikaj hrupaj ekśpiertaŭ u halinie štučnaha intelektu na čale z hetym 40-hadovym mužčynam.

«Apranuty ŭ śvietły harnitur i śvietła-šery śvitar, kali ŭsie astatnija vybrali ciomnyja pinžaki. Niepasłuchmianyja pasmy vałasoŭ niadbajna apadali na masiŭnuju apravu akularaŭ, što jašče bolš rabiła jaho źniešni voblik padobnym da hika. Takim jon źjaviŭsia ŭpieršyniu ŭ hałoŭnym vypusku navin dziaržaŭnaha telebačańnia a 7-j viečara», — piša Le Mond.

Dla Kitaja heta było pieršaje znajomstva z novym hierojem technałahičnaj honki z ZŠA, jaki 20 studzienia pradstaviŭ svaju novuju madel štučnaha intelektu DeepSeek-R1, adkrytuju i biaspłatnuju, stvoranuju z vykarystańniem u razy mienšaha finansavańnia i vyličalnych mahutnaściej.

Tak chto ž hety mužčyna, stvaralnik startapu, jaki vyklikaŭ chvalavańnie ŭ Silikonavaj dalinie i niervovaść na Uoł-stryt?

Lan Veńfen, naradziŭsia ŭ 1985 hodzie ŭ partovym horadzie Čžanczian na poŭdni Kitaja. Jašče padčas vučoby va ŭniviersitecie ŭ Chančžoŭ jon zachapiŭsia finansavym madelavańniem, natchniony pośpiechami chiedž-fondu Renaissance.

Chiedž-fond — heta inviestycyjny fond, jaki vykarystoŭvaje składanyja stratehii, uklučajučy kredytnaje plačo, karotkija prodažy i vytvornyja finansavyja instrumienty, kab atrymać vysokuju prybytkovaść niezaležna ad stanu rynku. Jon adroźnivajecca ad tradycyjnych fondaŭ bolšaj hnutkaściu i vysokim uzroŭniem ryzyki. Čaściej za ŭsio dastupny tolki dla bujnych inviestaraŭ.

Chłopiec pisaŭ pieršyja ałharytmy dla analizu rynku, a ŭ 2013 hodzie, praź niekalki hadoŭ paśla atrymańnia dypłoma, razam z adnakurśnikami zasnavaŭ kvantavy inviestycyjny fond, jaki vykarystoŭvaŭ madelavańnie vialikich danych dla prahnazavańnia rynkavaj dynamiki i častkovaj aŭtamatyzacyi inviestycyjnych rašeńniaŭ.

U 2015 hodzie, kali kitajski fondavy rynak pieražyŭ burny rost, a zatym kryzis, heta adkryła mahčymaści dla vopytnych trejdaraŭ. Zasnavany ŭ toj ža hod druhi fond Lana Veńfena, High-Flyer, prynios značnyja prybytki. Da 2019 hoda jaho aktyvy vyraśli z 1 da 10 miljardaŭ juaniaŭ (z 130 miljonaŭ da 1,3 miljarda jeŭra).

Paŭnavartasna zasiarodziŭšysia na trejdynhu z vykarystańniem ŠI, Veńfen inviestavaŭ u vyličalnyja mahutnaści: High-Flyer zakupiŭ supierkampjutary na 156 miljonaŭ jeŭra i paśpieŭ nabyć 10 000 kartak Nvidia A100 da ŭviadzieńnia sankcyj ZŠA suprać Kitaja ŭ 2022 hodzie. Ale ŭžo tady jaho ŭvaha była skiravanaja dalej — na stvareńnie «ahulnaha štučnaha intelektu», jaki pavinien pieraŭzyści čałaviečy.

Pavialičyć

Stvareńnie DeepSeek

Inviestycyi dla DeepSeek Veńfen biare z High-Flyer i pryciahvaje na pracu maładych vypusknikoŭ biez dośviedu, ličačy, što «tyja, chto nie viedaje hatovych rašeńniaŭ, šukajuć novyja». Sam jon praciahvaje pisać kod, čytać navukovyja artykuły i ŭdzielničać u abmierkavańniach DeepSeek. Jak adznačajuć ekśpierty, Kitaj maje dźvie klučavyja pieravahi: šmatlikija talenty ŭ matematycy i vialikija masivy dadzienych dla navučańnia ŠI.

DeepSeek znajšoŭ novy padychod da navučańnia ŠI. U toj čas jak inšyja madeli prosta nazapašvajuć viedy, DeepSeek byŭ navučany lepš šukać adkazy z dapamohaj mietadu «navučańnia z padmacavańniem». Pry im sistema sama zadaje sabie pytańni i atrymlivaje ŭznaharody (naprykład, dadatkovyja bały abo palapšeńnie jaje mahčymaściaŭ), kali jaje rašeńni pravilnyja. Heta robić jaje mienš chutkaj, ale značna bolš efiektyŭnaj u spažyvańni enierhii.

U vyniku DeepSeek-R1 apynuŭsia da 27 razoŭ tańniejšym za OpenAI o1 u raźliku na zapyt. Akramia taho, DeepSeek byŭ navučany ŭsiaho na 2 048 videakartach, jakija Nvidia ciapier pastaŭlaje ŭ Kitaj u abmiežavanym vyhladzie, što stavić pad pytańnie efiektyŭnaść amierykanskich sankcyj.

Taki padychod vyklikaŭ cikavaść navat u ZŠA. Na dumku ekśpiertaŭ, efiektyŭnaść kitajskaj madeli ŠI ŭ adnosinach da koštu robić ich bolš dastupnymi.

Adnak DeepSeek maje i svaje abmiežavańni. Madel schilnaja da hienieracyi niesapraŭdnych faktaŭ. Da taho ž pry pytańniach pra palityku abo historyju KNR jana časta prapanuje «pahavaryć pra niešta inšaje», što śviedčyć pra ŭbudavanuju cenzuru.

Jak adznačaje vydańnie, paśla zapusku ChatGPT u 2022 hodzie Kitaj sutyknuŭsia z amierykanskaj pieravahaj u ŠI i technałahičnymi abmiežavańniami, uviedzienymi Vašynhtonam. Pieršapačatkovyja sproby kitajskich raspracoŭščykaŭ nie daciahvali da ŭzroŭniu OpenAI. Adnak ciapier DeepSeek pierakanaŭ navat nacyjanalnych lidaraŭ u mahčymaści technałahičnaj pieramohi.

Sam Lan Veńfen zajaŭlaje, što bolš nie šukaje bahaćcia, a imkniecca da praryvaŭ, kab Kitaj moh stajać u avanhardzie technałohij. I ciapier mienavita amierykanskija inžyniery vyvučajuć kod DeepSeek, kab zrazumieć jaho sakrety.

• 11
• 0
• 5
• 2
• 4
• 0
• 2
• 0