Mužčyna, jaki niadaŭna pieravioz svaju siamju z ZŠA ŭ Pakistan, pryznaŭsia ŭ zabojstvie svajoj dački-padletka praz toje, što nie ŭchvalaŭ jaje videa ŭ tyktoku. Pra heta paviedamlaje VVS sa spasyłkaj na palicyju.
Ul-Chaka Anvara abvinavacili ŭ zabojstvie paśla taho, jak jon pryznaŭsia, što zastreliŭ svaju dačku Chiru ŭ paŭdniova-zachodnim horadzie Kvieta ŭ aŭtorak. Spačatku jon skazaŭ śledčym, što stralali nieviadomyja mužčyny.
Baćka, jaki maje hramadzianstva ZŠA, zajaviŭ, što ličyć publikacyi dački «nieprymalnymi».
Palicyja zajaviła, što razhladaje ŭsie viersii złačynstva, uklučajučy mahčymaść «zabojstva honaru», jakija nie źjaŭlajucca redkaściu ŭ krainie.
Pavodle źviestak pravaabarončych arhanizacyj, u Pakistanie štohod u vyniku tak zvanych «zabojstvaŭ honaru» hinuć sotni ludziej, pieravažna žančyny. Ich zvyčajna zabivajuć svajaki, śćviardžajučy, što takim čynam abaraniajuć honar siamji.
U vypadku z Chiraj Anvar, jakoj było kala 13—14 hadoŭ, jaje siamja «mieła piarečańni da jaje adzieńnia, ładu žyćcia i znosin», adznačyŭ pradstaŭnik palicyi.
Siamja pražyła ŭ ZŠA 25 hadoŭ, i Chira pačała vykładać kantent u tyktoku jašče da viartańnia ŭ Pakistan. Śledčyja zajavili, što majuć jaje telefon, jaki zastajecca zabłakavanym.
Palicyja paviedamiła, što ŭ suviazi z zabojstvam taksama aryštavany švahier jaje baćki.
Kali mužčyn pryznajuć vinavatymi ŭ «zabojstvie honaru», im pahražaje abaviazkovaje pažyćciovaje źniavoleńnie — zhodna sa źmianieńniami, jakija ŭnios u zakanadaŭstva ŭrad Pakistana ŭ 2016 hodzie. Raniej jany mahli paźbiehnuć turmy, kali ich daravała siamja achviary.
U 2023 hodzie italjanski sud asudziŭ pakistanskuju paru da pažyćciovaha źniavoleńnia za zabojstva svajoj 18-hadovaj dački, jakaja admoviłasia ad damoŭlenaha šlubu.
Hodam raniej brat pakistanskaj zorki sacyjalnych sietak Kandył Bałoch vyjšaŭ z turmy paśla taho, jak apielacyjny sud apraŭdaŭ jaho za zabojstva siastry. Da hetaha jaho asudzili da pažyćciovaha źniavoleńnia, bo jon pryznaŭsia, što zabiŭ siastru ŭ 2016 hodzie, zajaŭlajučy, što jana zhańbiła siamju.
Stała viadoma imia čałavieka, jakoha siłaviki nazvali pieršym zatrymanym pa spravie «Hajuna»17
Kamientary