Siarhiej Ciacieryn kupiŭ jašče bolš ziamli na radzimie Łukašenki

Upłyvovy biznesmien i kiraŭnik Biełaruskaj tenisnaj fiederacyi Siarhiej Ciacieryn abzavioŭsia 21 hiektaram ziamli ŭ susiedniaj z Aleksandryjaj-2 vioscy Chimy. Pra heta śviedčać źviestki adzinaha dziaržrehistra nieruchomaj majomaści Biełarusi. Piša TUT.BY.

Pavialičyć

Niadaŭna paviedamlałasia, što na małoj radzimie Alaksandra Łukašenki ŭ vioscy Aleksandryja-2 znachodzicca rezidencyja, jakoj vałodaje kampanija «Biełnaftahaz» biznesoŭca Alaksieja Aleksina. Tam ža raźmieščany i dom Siarhieja Ciacieryna — biznesmiena, kiraŭnika Biełaruskaj tenisnaj fiederacyi i hanarovaha konsuła Hruzii ŭ našaj krainie. Ale, jak akazałasia, heta nie ŭsie jaho ŭładańni ŭ vakolicach.

Zusim pobač z Aleksandryjaj-2 znachodzicca vioska Chimy Aršanskaha rajona Viciebskaj vobłaści, jakuju jašče ŭ 2011 hodzie taksama vyrašyli zrabić uzornaj. Miarkujučy pa danych dziaržrehistra, tam u 2017 hodzie Siarhiej Ciacieryn kupiŭ nievialiki dom. Budynak znachodzicca na ziamielnym učastku płoščaj 0,1 hiektara, za arendu jakoha jon štohod płacić kala 1,78 rubla.

Na praciahu ž 2018-2019 hadoŭ Ciacieryn abzavioŭsia jašče 9 učastkami niedaloka ad vioski Chimy. Ich ahulnaja płošča — kala 21,3 hiektara. Metavaje pryznačeńnie — dla viadzieńnia sialanskaj (fiermierskaj) haspadarki. Ziamla naležyć Ciacierynu na pravie pažyćciovaha spadčynnaha vałodańnia. Pradastaŭleny ŭčastki rašeńniami Aršanskaha rajvykankama. Jany raźmieščany pryblizna ŭnutry voś takich miežaŭ:

Jak kažuć znajomyja z hetaj historyjaj krynicy, na hetaj ziamli Ciacieryn sapraŭdy moža zaniacca sielskaj haspadarkaj. «Dy jon ža i sam taki — chłopiec ad sachi», — dadaje adzin z surazmoŭcaŭ partała.

Pavialičyć

Pa słovach krynic, u vakolicach u Ciacieryna jość taksama stajnia i pčalnik.

Siarhieju Ciacierynu 59 hadoŭ. Naradziŭsia jon u Minsku. Prafiesijna zajmaŭsia tenisam. U 1979 hodzie staŭ bronzavym pryzioram čempijanatu SSSR da 18 hadoŭ, a ŭ 1980-m — čempijonam Jeŭropy ŭ parnym razradzie siarod moładzi. U 90-ja hady mienavita Ciacieryn dałučyŭ da vialikaha tenisu Alaksandra Łukašenku.

Paźniej Siarhiej Ciacieryn u liku inšaha byŭ namieśnikam ministra sportu, pamočnikam prezidenta, dyrektaram spartkompleksu «Raŭbičy» i vice-prezidentam NAK. Ale bližej da 2010-ch stała viadoma i pra jaho biznes.

Ciapier kampanii Ciacieryna zajmajucca dystrybucyjaj praduktaŭ i ałkaholu, hramadskaha charčavańnia (jak minimum — bar «Svabody, 4»), a taksama źbirajucca budavać šmatfunkcyjanalny kompleks nasuprać Pałaca niezaležnaści ŭ Minsku. Struktury biznesmiena taksama padtrymlivajuć raźvićcio tenisa i spansujuć spabornictvy.

Siarhieja Ciacieryna nazyvajuć blizkim da Alaksandra Łukašenki čałaviekam. Jany byli zaŭvažanyja nie tolki na spartyŭnych mierapryjemstvach, ale i na sielskahaspadarčych pracach. Jak minimum Ciacieryn niekalki razoŭ kasiŭ travu razam z Łukašenkam, a taksama źbiraŭ ź im kavuny.

• 0
• 0
• 0
• 0
• 0
• 0
• 0
• 0