Aŭstryjski «Rajfajzen» spyniaje supracoŭnictva ź biełaruskimi bankami sa žniŭnia — krynicy
Jak stała viadoma «Našaj Nivie», aŭstryjski «Rajfajzen» razasłaŭ biełaruskim bankam paviedamleńnie ab tym, što sa žniŭnia spyniaje ź imi karespandenckija adnosiny. Heta aznačaje, što zakryvajecca adzin z apošnich kanałaŭ ruchu hrošaj na Zachad i z Zachadu.
Surazmoŭcy ŭ bankaŭskich kołach paviedamili «Našaj Nivie», što ŭ paniadziełak, 15 maja, aŭstryjski Rajfajzen Bank painfarmavaŭ kiraŭnictva biełaruskich bankaŭ ab tym, što z 31.07 spyniaje supracoŭnictva z usimi bankami ŭ biełaruskaj jurysdykcyi.
U vyniku sankcyj za ŭnutranyja represii i ŭdzieł režymu ŭ vajnie biełaruski finansavy siektar byŭ mocna abmiežavany ŭ svajoj mahčymaści padtrymlivać znosiny z navakolnym śvietam. «Rajfajzen» zastavaŭsia apošnim bankam, jaki karespandavaŭ biełaruskim bankam pry nakiravańni płaciažoŭ u Jeŭropu, a taksama pryjomie płaciažoŭ adtul.
«Praz «Rajfajzen» pracavali amal usie. Heta vielmi ŭskładniaje i biez taho niaprostaje finansavaje žyćcio biełaruskim kampanijam, jakija prymajuć apłatu ŭ dalarach/ieŭra abo płaciać u ich za tavary ci pasłuhi, — kaža supracoŭnik adnaho z bankaŭ. — Kali tłumačyć ruch hrošaj asacyjatyŭna, to raniej my lotali ŭ Vilniu pramym rejsam, potym pačali lotać u Vilniu praź Vienu, a zaraz my dalacim da Vilni tolki ź niekalkimi pierasadkami praz Astanu ci Jerevan. A kali kančatkovaja meta «palotu» jakaja-niebudź Ałbanija, to palot moža ŭvohule stać biaskoncym.
Faktyčna biznes maje paru miesiacaŭ, kab prydumać novuju schiemu raźlikaŭ z partniorami. Chtości ŭžo raniej vyvieŭ svaju zamiežnaekanamičnuju dziejnaść u inšuju jurysdykcyju, ale niama nijakich harantyj, što nas u vyniku nie «paprosiać» i z umoŭnaha Kazachstana, tamu što amierykancy i jeŭrapiejcy ŭzmacniajuć cisk na tych, chto dapamahaje abychodzić sankcyi».
Adnačasova z hetym, jak paviedamlajuć biełaruskija biznesmieny, biełaruski Pryjorbank pačaŭ dasyłać klijentam listy z prośbaj nie paznačać karespandujučy bank u danych płaciažoŭ — inačaj jany nie buduć dastaŭlenyja.
«Pierakładajučy znoŭ na asacyjatyŭnuju movu, možna skazać, što kali b Pryjorbank byŭ servisam pa prodažy avijakvitkoŭ, to ciapier jon infarmuje, što vy možacie tolki paznačyć, kudy vam treba, a voś avijakampaniju, a taksama vaš maršrut budziem vybirać my, i vy ŭpłyvu na heta nie majecie», — dadaje da hetaha naš surazmoŭca-bankir.
Imavierna, admova ad karespandujučych adnosin ź biełaruskimi bankami — heta nastupstvy cisku ZŠA na jeŭrapiejskija finansavyja instytuty, jakija praciahvali pracavać z rasijanami i biełarusami nasupierak ahulnaj palitycy sankcyj.
Raniej surazmoŭcy «Našaj Nivy» paviedamlali, što kampietentnyja struktury ZŠA zapytali ŭ aŭstryjskaha «Rajfajzena» ŭsiu dakumientacyju ab praviedzienych biełaruskaj i rasijskaj «dočkami» apieracyjach. Pry admovie vydać dakumientacyju abo pry vyjaŭleńni faktaŭ zabaronienych płaciažoŭ aŭstryjskamu banku pahražali sankcyjami — zabaronaj na pracu z dalaram.
Ab praviadzieńni pravierki ŭ kantekście vajny (ale biez zhadki Biełarusi) paviedamlałasia aficyjna.
Praź niejki čas paśla hetaha stała viadoma, što Pryjorbank i rasijskaja dačka «Rajfajzena» pradajucca. Imavierny kupiec — struktury «Rasnafty», rasijskaha dziaržaŭnaha naftahazavaha hihanta.
Jašče raniej praź cisk amierykancaŭ byŭ zakryty filijał rasijskaha MTS Banka ŭ Abjadnanych Arabskich Emiratach.
Paśla spynieńnia mahčymaści pracavać u valucie praz aŭstryjski «Rajfajzen» u biełaruskaha biznesu zastaniecca jašče mienš varyjantaŭ.
Kanały dla apłaty ŭ jeŭra i złotych zastajucca ŭ Alfa-banku i BNB-Banku, łaziejka z dalarami zastajecca ŭ Parytetbanku.
Luboje zvužeńnie mahčymaściaŭ robić płaciažy bolš praciahłymi i darahimi.
Čytajcie taksama:
«Naša Niva» — bastyjon biełaruščyny
PADTRYMAĆStała viadoma imia čałavieka, jakoha siłaviki nazvali pieršym zatrymanym pa spravie «Hajuna»11
Kamientary