Vybić z pazicyj voraha, jaki akapaŭsia, ličycca adnoj z samych składanych vajennych apieracyj. Amierykanskaja hazieta Wall Street Journal sprabuje adkazać na pytańnie, jakoje šmat kaho chvaluje: čamu ŭkrainskaje kontrnastupleńnie idzie tak pavolna?
Aŭtary adznačajuć, što letaś Ukraina dziakujučy ŭmiełym manieŭram zdoleła damahčysia pieravahi nad rasijskim vojskam, niahledziačy na niedachop ludziej, uzbrajeńnia i supastaŭnaj z Rasijaj padtrymki z pavietra. Umiełaje kamandavańnie, dobraje viedańnie miascovaści i efiektyŭnaje vykarystańnie dronaŭ i ličbavych technałohij dazvolili ŭkrainskim vajskoŭcam dać adpor značna bolš šmatlikaj i pieršapačatkova lepš asnaščanaj armii, jakaja na ich fonie vyhladała niazhrabnaj i zahrazła ŭ biurakratyčnych pravałokach, jak pierakazvaje analiz Bi-bi-si.
WSJ kanstatuje: usiamu hetamu pryjšoŭ kaniec.
Ciapier Ukraina sprabuje vybić z pazicyj voraha, jaki akapaŭsia na jaje terytoryi, što ličycca adnoj z samych składanych vajennych apieracyj. Rasijskija vajskoŭcy patracili miesiacy na budaŭnictva abarončych zbudavańniaŭ, u tym liku bunkieraŭ, supraćtankavych pastak i minnych paloŭ.
Dla rasijskich sił, jakija raniej sioleta sprabavali zachapić bolš ukrainskich terytoryj, nastup nie mieŭ pośpiechu, adnak utrymlivać abarončyja pazicyi budzie lahčej, jak piša WSJ sa spasyłkaj na Majkła O'chanłona, śpiecyjalista ŭ halinie biaśpieki Brukinhskaha instytuta ŭ Vašynhtonie.
Naprykład, ukrainskija sałdaty raskazali, što rasijskija vajskoŭcy ŭ Zaparožskaj vobłaści pabudavali kiłamietry zihzahapadobnych, złučanych pamiž saboj tranšej, niekatoryja ź jakich umacavanyja bietonam abo pakrytyja halinkami i ziamloj, kab ich było ciažka vyjavić z dapamohaj dronaŭ. Pali mocna zaminavanyja. Jak minimum u dvuch vypadkach, sa słoŭ ukrainskich vajskoŭcaŭ, cieły ich zabitych tavaryšaŭ taksama byli zaminavanyja.
«Niemahčyma całkam źniščyć takija dobra padrychtavanyja pazicyi pierad nastupam», — rastłumačyŭ žurnalistam adzin z ukrainskich vajskoŭcaŭ. Pavodle jaho słoŭ, kab uziać hetyja pazicyi, rajon treba spačatku nakryć artyleryjskim ahniom, a zatym prasoŭvacca napierad z dapamohaj braniatechniki, kab zadziejničać piachotu. Adnak niedachop tankaŭ i inšaj braniatechniki ŭskładniaje realizacyju hetaj stratehii.
Nastup na siły akupantaŭ, jakija akapalisia, byŭ ciažkim vyprabavańniem navat dla samych mahutnych armij śvietu, jak nahadvaje WSJ. Chaŭruśnikam, jakija vysadzilisia na ŭźbiarežžy Narmandyi padčas Druhoj suśvietnaj vajny, spatrebiłasia bolš za dva miesiacy, kab prarvać niamieckija ŭmacavańni i prasunucca ŭhłyb krainy.
U 1991 hodzie, pierš čym suchaputnyja siły kaalicyi prasunulisia ŭ chodzie apieracyi «Bura ŭ pustyni», ZŠA na praciahu piaci tydniaŭ viali pavietranuju kampaniju, kab asłabić pazicyi irakskich vajskoŭcaŭ, jak nahadvaje WSJ.
Raniej na hetym tydni prezident Ukrainy Uładzimir Zialenski ŭ intervju CNN vykazaŭ škadavańnie, što Ukraina nie zmahła pačać kontrnastupleńnie raniej — da taho, jak Rasija paśpieła ŭstalavać abarončyja zbudavańni i zaminiravać terytoryi.
Biełaruska nie znajšła siabie ŭ śpisie vypusknikoŭ škoły — ličyć, što praz palityčnyja pohlady2
Kamientary