Čamu Polšča zabaraniła vyvaz tavaraŭ fizičnym asobam i jakija tavary ciapier nielha pravieźci?
Ranica 4 lipienia pačałasia ź infarmacyi, što palaki pierastali vypuskać biełarusaŭ z novymi rečami, jakija tyja nabyli ŭ Polščy. Raźbirajemsia, što zdaryłasia.
Što adbyvajecca?
Usio pačałosia z taho, što 29 červienia 2024 hoda Jeŭrapiejski sajuz uzhadniŭ novyja sankcyi suprać Biełarusi. Dakumient byŭ apublikavany ŭ aficyjnym časopisie Jeŭrapiejskaha sajuza 30 červienia i nabyŭ moc z 1 lipienia.
Mienavita paśla hetaha stała viadoma pra amal što poŭnuju zabaronu na ŭvoz tavaraŭ ź Biełarusi ŭ Łatviju.
Rehłamient ES składajecca z 265 staronak, tamu vyhladaje, što zabarony pačynajuć dziejničać pastupova i nie sinchronna ŭ pieršuju čarhu praz toje, što mytnym słužbam patrebny čas, kab zrazumieć, jak pracavać pa novych praviłach.
Pakolki rehłamient pryniaty nie tolki Polščaj, a Jeŭrapiejskim sajuzam, całkam vierahodna, što ŭśled za palakami biestavarny vyjezd uviaduć Łatvija i Litva.
Na što spasyłajucca?
Amal usie raniejšyja abmiežavańni i zabarony ŭ pieršuju čarhu tyčylisia kamiercyjnych pastavak i nie zakranali fizičnych asob. Ale nie hetym razam.
U artykule 1bb rehłamientu havorycca nastupnaje:
«Zabaraniajecca pradavać, pastaŭlać, pieradavać abo ekspartavać, prama ci ŭskosna, tavary, jakija mahli b spryjać, u pryvatnaści, umacavańniu biełaruskich pramysłovych mahutnaściaŭ, niezaležna ad taho, pachodziać jany z Sajuza ci nie, jak pakazana ŭ dadatku XVIII, luboj fizičnaj abo jurydyčnaj asobie, arhanizacyi abo orhanu ŭ Biełarusi abo dla vykarystańnia ŭ Biełarusi».
To-bok novyja abmiežavańni raspaŭsiudžvajucca ŭ tym liku na zvyčajnych ludziej, jakija nabyli tavary ŭ ES i vyvoziać ich u Biełaruś dla ŭłasnych patreb.
Što za tavary?
Śpis tavaraŭ, zabaronienych da vyvazu ź Jeŭrasajuza ŭ Biełaruś, pieraličany ŭ dadatku XVIII «Pieralik tavaraŭ i technałohij, jakija mohuć spryjać pavieličeńniu pramysłovaha patencyjału Biełarusi».
Pieralik zabaronienych mytnych kodaŭ zajmaje bolš za 30 staronak. U hety śpis trapili samyja raznastajnyja pazicyi, pačynajučy ad kvietak i raślin i zakančvajučy huzikami i padušačkami dla čarniła.
Siarod papularnych tavaraŭ — batarejki, mabilnyja telefony, manitory, prajektary, mikrafony, hukavyja ŭzmacnialniki, abahravalniki, niekatoryja vidy tkaniny, pakryški dla aŭtobusaŭ i hruzavikoŭ, bide, unitazy i šmat inšaha.
Što pišuć u čatach?
Karystalniki admysłovych čataŭ pišuć, što z Polščy ŭ Biełaruś nielha pravieźci lubuju techniku, aŭtamabilnyja zapčastki, u tym liku b/u. Pry hetym nie važna, tavary jeduć praz čyrvony kanał (VAT) abo praź zialony.
Padarožnikaŭ, jakija vyjazdžajuć praź zialony kalidor, taksama praviaraje polskaja mytnia, choć raniej pry vyjeździe z Polščy takoha nikoli nie było, pišuć karystalniki.
«Na pradukty charčavańnia, miedykamienty, a taksama na bytavuju chimiju VATy pa-raniejšamu adznačajuć. Astatniaje vyvozić nielha navat biez VAT», — dzielicca dośviedam biełarus, jaki niadaŭna pierasiek miažu.
Što tyčycca adzieńnia i abutku, to vyvieźci jaho lehalna ź viartańniem PDV taksama nielha, tamu padarožniki pišuć, što mytnia prapuskaje adzieńnie bieź birak i abutak biez karobak. I tolki ŭ vypadkach, kali ŭdajecca pierakanać, što heta ŭžo b/u rečy, jakija patrebnyja na čas pajezdki.
Što kaža mytnia?
Tłumačeńniaŭ, što dakładna možna vieźci, a što nie, prynamsi pakul polskaja mytnia nie daje, sucha spasyłajučysia na toj samy rehłamient, jaki krainy ES pryniali 29 červienia. Padarožniki spadziajucca, što ŭ chutkim časie źjavicca bolš padrabiaznaja infarmacyja, jak pierasiakać miažu ŭ novych umovach.
Aproč abmiežavańniaŭ na vyvaz tavaraŭ ź ES u Biełaruś, u dakumiencie ŭtrymlivajucca normy, jakija taksama tyčacca zabarony na ekspart šerahu pazicyj ź Biełarusi, a taksama tranzitu niekatorych tavaraŭ pa terytoryi našaj krainy, kali punktam pryznačeńnia źjaŭlajucca trecija krainy.
Stała viadoma, za što buduć sudzić pieršaha namieśnika načalnika Kiraŭnictva spravami Łukašenki1
Kamientary