Biełaruskija kampanii pastaŭlajuć u Rasiju zachodnija mikraschiemy ŭ abychod sankcyj — novaje rasśledavańnie

Jak śćviardžajuć žurnalisty Biełaruskaha rasśledvalnickaha centra ŭ svaim novym rasśledavańni, ź vieraśnia 2022-ha pa červień 2024-ha hoda biełaruskija kampanii pradali rasijskim pradpryjemstvam mikraschiem na $125 miljonaŭ, ź ich amal na $400 tysiač — zachodniaj vytvorčaści, na pastaŭki jakich u Biełaruś i Rasiju nakładziena zabarona.

Z dapamohaj «Kibierpartyzan» žurnalisty BCR zmahli vyśvietlić, jakija biełaruskija kampanii zajmalisia zakupkaj i pieraprodažam u Rasiju padsankcyjnych mikraschiem, što vykarystoŭvajucca ŭ vytvorčaści roznych vidaŭ vajennaj pradukcyi — pačynajučy ad avijabombaŭ i zakančvajučy źniščalnikami.

Łahistyka i mytnaja ačystka

U materyjale žurnalisty źviartajuć uvahu na dźvie kampanii — TAA «Alekśvit łtd» i «Łahistyčnaja kampanija Uschod».

Pieršaj vałodaje Siarhiej Barysiuk, jaki raniej zajmaŭ pasadu namieśnika staršyni Dziaržaŭnaha mytnaha kamitetu Biełarusi i ŭznačalvaŭ biełaruskuju Asacyjacyju mytnych pradstaŭnikoŭ. Zhodna z raniejšym rasśledavańniem BRC, kampanija «Alekśvit łtd» źviazana z daŭnim i bližejšym saratnikam Łukašenka Viktaram Šejmanam.

U razmovie z žurnalistam BCR, jaki pradstaviŭsia zakazčykam, pradstaŭnica kampanii nie admaŭlała mahčymaści pastaŭki zachodnich mikraschiem u Rasiju, ale adznačyła, što jany pracujuć tolki z bujnymi partyjami.

Uładalnik «Łahistyčnaj kampanii Uschod» Alaksiej Maćviejeŭ u 2017-2019 hadach pracavaŭ u Biełaruskaj tenisnaj fiederacyi, jakuju ŭ toj čas uznačalvaŭ nabližany da Łukašenki biznesmien Siarhiej Ciacieryn. Akramia hetaha partnioram pa biznesie ŭ kašalka Łukašenki źjaŭlajecca siastra Maćviejeva Taćciana.

Pavialičyć

U adroźnieńni ad «Alekśvid łtd», «Łahistyčnaja kampanija Uschod» sama pastaŭkami nie zajmajecca, ale moža dapamahčy z mytnaj ačystkaj dakumientaŭ. Kampanija vystupaje aficyjnym pakupnikom nieabchodnaj klijentu pradukcyi, zaklučaje ad svajho imia impartny kantrakt. A paśla pastaŭki tavaru ŭ Biełaruś jana stanovicca pradaŭcom, a pakupnikom užo vystupaje realny zakazčyk. Pra takuju schiemu žurnalistam raskazała pradstaŭnica «Łahistyčnaj kampanii Uschod».

Inšyja pastaŭščyki

U materyjale BRC nazyvajucca i inšyja biełaruskija firmy, jakija ŭ rozny pieryjad, pačynajučy ź lutaha 2022 hoda, zajmalisia pastaŭkami ŭ Rasiju padsankcyjnych mikraschiem.

Siarod ich: TAA «OFS Export», jakaja, jak śćviardžajuć žurnalisty, źviazana ź jašče adnym kašalkom Łukašenki — Alaksandram Šakucinym, a taksama TAA «Handlovy dom Eksparthandal», źviazanaja z byłym pamočnikam Viktara Łukašenki biznesmienam Alaksandram Zajcavym.

Žurnalisty taksama vyśvietlili, što ŭ łancužku pastavak z rasijskaha boku prysutničaje TAA «Bałtelektron», zasnavalnikam jakoha źjaŭlajecca biełarus Dźmitryj Savašynski.

Kampanija «Bałtelektron», jakaja znachodzicca pad amierykanskimi sankcyjami jak pastaŭščyk mikraelektroniki dvajnoha pryznačeńnia, u 2022-2023 hadach zakuplała mikraschiemy ŭ troch biełaruskich kampanij: TAA «Čyp Ekspres», TAA «Čypimpart» i TAA «Elekrasejł».

U materyjale BRC taksama nazyvajecca TAA «SD Elektra», jakaja ździajśniała pastaŭki mikraschiem rasijskaj kampanii «Hryn-Čyp», siarod klijentaŭ jakoj abaronnyja pradpryjemstvy.

U telefonnaj razmovie supracoŭnica «Hryn-Čyp» paviedamiła, što ich kampanija moža pad zamovu pastavić mikraschiemy z ZŠA, Hiermanii, Małajzii i Tajvania. Paźniej žurnalistu pierazvaniŭ ź biełaruskaha numaru mužčyna, jaki spasłaŭsia na pakinutuju zamovu dla «Hryn-Čyp» i paviedamiŭ, što «ŭ Minsku kampanija nazyvajecca «SD Elektra».

Lidar pa pastaŭkach

U materyjale BRC śćviardžajecca, što lidaram pa pastaŭkach zachodnich mikraschiem u Rasiju ź Biełarusi źjaŭlajecca TAA «Pieršy Kantynient», jakoje była stvorana praz dva miesiacy paśla pačatku poŭnamaštabnaj vajny. Kampanija tolki z šeść miesiacaŭ 2024 hoda pradała ŭ Rasiju mikraschiem na $155 tysiač.

Uładalnikam «Pieršaha Kantynientu» źjaŭlajecca Ilja Tarasiuk, jaki kala 20 hadoŭ adpracavaŭ na pradpryjemstvach vajenna-pramysłovaha kompleksu Biełarusi. Siarod ich, naprykład, «Pielenh».

Asnoŭnym pakupnikom «Pieršaha Kantynientu» ŭ Rasii źjaŭlajecca TAA «Staut», jakoje znachodzicca pad sankcyjami ZŠA i Jeŭrasajuza.

Pa vynikach svajho rasśledavańnia redakcyja BRC adpraviła zapyty amierykanskamu Biuro pramysłovaści i biaśpieki (Bureau of Industry and Security) i Savietu Jeŭropy z pytańniami ab tym, što jany robiać dla taho, kab abmiežavać dostup Biełarusi i Rasii da sankcyjnych tavaraŭ, i jak adsočvajuć vykanańnie zabaronaŭ.

• 2
• 0
• 0
• 2
• 0
• 0
• 7
• 0