Nijakaha 21 dnia. Abvierhnuty samy papularny mif pra zvyčki
Mnohija z nas čuli pra toje, što na farmavańnie zvyčki čałavieku patrabujecca 21 dzień, adnak novaje daśledavańnie, praviedzienaje na asnovie nazirańniaŭ za niekalkimi tysiačami čałaviek, abviarhaje hety mif.
Navukoŭcy z Univiersiteta Paŭdniovaj Aŭstralii vyjavili, što farmavańnie karysnych i inšych zvyčak zajmaje značna bolš času, čym pryniata ličyć.
Daśledavańnie, u jakim uziali ŭdzieł bolš za 2600 čałaviek, pakazała, što ŭ siarednim novyja zvyčki pačynajuć farmiravacca na praciahu dvuch miesiacaŭ (59—66 dzion), ale ich poŭnaje zamacavańnie moža zaniać da 335 dzion, piša vydańnie ScienceDaily.
Akramia taho, isnuje šerah dadatkovych faktaraŭ, jakija ŭpłyvajuć na paśpiachovaje farmavańnie zvyčak.
«Pośpiech zaležyć ad taho, jak časta my paŭtarajem novaje dziejańnie, u jaki čas sutak heta adbyvajecca i nakolki jano pryjemnaje dla nas. Kali ŭklučyć novy rytuał u ranišni raskład, šancy na jaho zamacavańnie pavialičvajucca. Taksama važna atrymlivać zadavalnieńnie ad pracesu», — tłumačyć aŭtar daśledavańnia doktar Ben Sinhch.
«Spracoŭvajuć i takija pryjomy, jak zahadzia padrychtavanyja rečy: naprykład, pakłaści spartyŭnuju formu ŭviečary, kab ranicaj było lahčej pajści na prabiežku, abo pryhatavać karysny śniadanak zahadzia.
Čym lepš my płanujem novyja zvyčki i ŭklučajem ich u štodzionnaje žyćcio, tym bolšaja vierahodnaść taho, što jany paśpiachova zamacujucca. Mienavita tamu važna nie zdavacca, kali praz try tydni ŭ vas nie atrymlivajecca adaptavacca da novaha režymu», — padkreślivaje daśledčyk.
Vysnovy navukoŭcaŭ z Aŭstralii mohuć być karysnymi dla raspracoŭki dziaržaŭnych prahram, jakija spryjajuć farmavańniu zdarovych zvyčak u nasielnictva. Daśledčyki dadajuć, što patrebnyja dalejšyja navukovyja pracy, ale ŭžo ciapier vysnovy mohuć dapamahčy ludziam razumniej płanavać šlach da zdarovaha žyćcia.
«Maja pamyłka, što zapisvaju videa». Čym skončylisia rezanansnyja zvaroty da Łukašenki?4
Kamientary