Chto jany — troje rejkavych partyzan, jakim pahražaje rasstrełam SK
Śledčy kamitet anansavaŭ pieradaču ŭ sud spravy śvietłahorskich rejkavych partyzan. Akazałasia, što zatrymanyja — svajaki. Pastaralisia vyśvietlić, chto jany i čamu vyrašylisia na taki krok.
Źmicier Ravič, Aleh Małčanaŭ i Dzianis Dzikun spalili relejnuju šafu na čyhuncy, kab pieraškodzić ruchu vajennaj techniki praź Biełaruś. Ich zatrymali 4 sakavika.
Usie troje žyli ŭ Śvietłahorsku i nie ŭdzielničali ŭ pratestach 2020 hoda. Ale z pačatkam vajny heta źmianiłasia.
Źmicier Ravič
Mužčynie 33 hady. Jon pracavaŭ u filijale «Biełaruśnafty» vyškamantažnikam-elektramancioram, a paralelna vučyŭsia na kursach ad rasijskaha ŭniviersiteta «Sinierhija».
Pa paviedamleńniach tych, chto jaho viedaŭ, mužčyna byŭ spakojny i niekanfliktny. Jahonaje vialikaje chobi — mašyny. Źmicier časta braŭ ich u volny čas na ramont, zachaplaŭsia dyjahnostykaj.
Jon lubić padarožničać i ź siamjoj vioŭ dosyć aktyŭny ład žyćcia. Taksama lubić sport, naviedvaŭ trenažornuju zału.
U jaho dvoje małych dziaciej. Znajomyja apisvajuć jaho jak uzornaha baćku i muža.
Aleh Małčanaŭ
Mužčynie 52 hady. Jon — kolišni vajskoviec, słužyŭ u VMF na vyśpie Ruski kala Uładzivastoka. Ciapier čaść zakinutaja, ale za savieckim časam takaja słužba była vielmi prestyžnaj.
Paśla fłotu Aleh pracavaŭ zvyčajnym rabočym — sadoŭnikam, kiroŭcam, ślesaram, kačaharam. Potym adkryŭ IP pa hruzapieravozkach, a paralelna padpracoŭvaŭ tym, što pryvoziŭ u Śvietłahorsk zabavy ŭ parki dla dziaciej kštałtu vialikich mašynak, u jakich jany mahli katacca. Čas ad času mužčyna taksavaŭ.
Aleh aktyŭny čałaviek, jaki vielmi hanarycca svajoj słužbaj. Z pabracimami jany arhanizavali muziej u honar VMF u Śvietłahorsku i štohod adznačali lipieńskaje prafiesijnaje śviata. U Aleha troje dziaciej — darosłaja dačka i dvoje niepaŭnaletnich synoŭ.
Dzianis Dzikun
Dzianisu 29 hadoŭ. Apošnim časam jeździŭ na zarobki ŭ Rasiju. Jahonaja niaviesta — dačka Aleha Małčanava.
Chłopiec — vialiki amatar futboła, kali byŭ maładziejšy, to hulaŭ sam. Jon i ciapier staraŭsia padtrymlivać siabie ŭ formie i rehularna chadziŭ u sportzału.
Brat Dzianisa Źmicier raskazvaje, što zatrymanyja — svajaki.
«Aleh — baćka niaviesty brata, a Źmicier — muž majoj siastry. My ŭsie byli znajomyja, usie razam časta na daču jeździli.
U pratestach 2020 hoda nichto ź ich nie ŭdzielničaŭ. Aleha aštrafavali byccam by ŭdzieł u pratestach, ale heta była vypadkovaść — jon pracavaŭ u taksi, čakaŭ klijenta i trapiŭ na kamieru.
Ale ja dumaju, što jany nie zdoleli tryvać biazładździe, jakoje adbyvajecca ŭ Biełarusi. A paśla pačałasia vajna, praź Śvietłahorsk pajšli ešałony i kałony z rasijskaj technikaj — usie bačyli heta na ŭłasnyja vočy. I ja miarkuju, što ŭ ich prosta skončyłasia ciarpieńnie i jany zachacieli dapamahčy Ukrainie.
Padčas zatrymańnia ich katavali i źbivali — nam kazali, brat kulhaŭ i trymaŭsia za bok, kali jaho viali ŭ IČU. Ich usich raźvieźli pa roznych haradach: Dzianisa — u Śvietłahorsk, Źmitra — u Rečycu, a Aleha — u Žłobin.
Ja viedaju, što ciapier trymajucca jany ciapier davoli badziora. Ale vielmi pieražyvaju za toje, jak i čym heta skončycca».
Mužčyn abvinavačvajuć pa čatyroch artykułach Kryminalnaha kodeksa: č. 3 art. 289 (akt teraryzmu, ździejśnieny ŭ składzie arhanizavanaj hrupy, jaki paciahnuŭ ciažkija nastupstvy, što stvarajuć pahrozu hibieli ludziej i pryčynieńnie im cialesnych paškodžańniaŭ), č. 3 art. 361-1 (udzieł u ekstremisckim farmiravańni), č.č. 2, 4 art. 309 (naŭmysnaje pryviadzieńnie ŭ nieprydatnaść šlachoŭ złučeńnia, jakoje paciahnuła ciažkija nastupstvy, a taksama stvaryła pahrozu krušeńnia, avaryi i hibieli ludziej) i č. 1 art. 356 (zdrada dziaržavie).
SK zajaŭlaje, što im pahražaje śmiarotnaje pakarańnie. Adnak źmieny ŭ Kryminalny kodeks byli ŭniesieny tolki 29 maja, tamu pa zakonie nie raspaŭsiudžvajucca na raniejšy pieryjad (pakolki paharšajuć stan źniavolenych, a nie źmiakčajuć jaho). Da papravak abvinavačanych pa č.3 art. 289 KK možna było prysudzić da rasstrełu ŭ vypadku, kali zahinuli ludzi. Pa abnoŭlenym zakonie śmiarotnaje pakarańnie pa hetym artykule možna pryznačyć i tady, kali nichto nie zahinuŭ.
Kamientary