Krynicy: «Makdonalds» zastajecca, Łukašenka zabaraniŭ mianiać franšyzu
Rasijskaha brenda «Vkusno — i točka» ŭ Biełarusi nie budzie. Kazacham zabaranili mianiać franšyzu, «Makdonalds» zastajecca.
«Makdonalds» vielmi redka vydaje franšyzy i čaściej za ŭsio ŭsim vałodaje sam. Ale ŭ Biełarusi tak vyjšła, što samoha «Makdonaldsa» nie było, byŭ frančajzi «KSB Viktary Restarany». Jahony ŭłaśnik — Kajrat Baranbaj, kazach sa svajackimi suviaziami z Nazarbajevym, ciapier Baranbaj u Kazachstanie apynuŭsia pad śledstvam. «KSB Viktary Restarany» pracavaŭ pa franšyzie, vydadzienaj «Makdonaldsam». Niejkija pamiaškańni ŭ ich byli svaje, niejkija — u arendzie.
Na bolšaj ža častcy Rasii pracavaŭ «sapraŭdny» «Makdonalds», jaki, paśla raźviazvańnia Rasijaj vajny z Ukrainaj, vyrašyŭ syści z taksičnaha rynku i pradać biznes — pamiaškańni, abstalavańnie i h.d.
Usio heta vykupiŭ navakuźniecki biznesoviec Alaksandr Hovar, jaki da taho byŭ frančajzi «Makdonaldsa» ŭ pary dalnich sibirskich haradoŭ. Jon na miescy starych «Makdonaldsaŭ» zapuściŭ novuju sietku charčavańnia «Vkusno — i točka».
Voś pad jaje kazachi i chacieli pieravieści biznes.
«Makdonalds» nie rabiŭ zajaŭ, što zabaraniaje pracavać u Biełarusi, minskija ŭłady jaho taksama ŭ śpinu nie pchali. Byli niekatoryja niuansy z admovami abnaŭlać biełaruskaj franšyzie recepty i prahramnaje abstalavańnie, ale ŭsio heta možna vyrašyć u pieramoŭnym paradku. Što, vidać, ułaśniku nie zusim zručna rabić z-pad aryštu. Jon vyrašyŭ nie zmahacca z drobnymi prablemami, a pierakinucca da «Vkusno — i točka», što jamu było zručniej pa techničnych pryčynach», — apisvaje dalejšuju chadu padziej abaznany surazmoŭca.
«Łukašenka zabaraniŭ mianiać franšyzu. Heta jaho rašeńnie. Padobnaje niadaŭna zdaryłasia i z «Sineva», jakoje chacieła pradacca ruskim, ale im zabaranili. Tolki ŭ razmovie z «Makdonaldsam» ab prodažy havorka nie išła, tolki pra zamienu franšyzy. Ale zabaranili. Heta ŭžo dakładna», — dadaje surazmoŭca.
Čamu dla režymu važna nie stračvać pradstaŭnictvy suśvietnych brendaŭ — možna tolki zdahadvacca.
Heta idzie ŭrazrez z publičnaj rytorykaj Łukašenki: niadaŭna jon rytaryčna aburaŭsia pierad čynoŭnikami, što biełarusy «sami nie mohuć razrezać napałam bułku».
Paśla hetaha pa «Makdonaldsie» prajšlisia i prapahandysty i deputaty, ad Ananič da Azaronka. Ale niepublična łukašenkaŭcy zmusili brend zastacca.
I, pa infarmacyi «Našaj Nivy», takaja ŭstanoŭka sychodzić asabista ad Alaksandra Łukašenki.
«U cełym u Łukašenki niama pazicyi, što zachodnija brendy ci vytvorčaści pavinny syści z krainy. Naadvarot, im u asabistych sustrečach i listach usialak davodzicca, što ich pracu ceniać, što jany mohuć zastavacca spakojna, što im nie treba nikudy biehčy. Heta adroźnivajecca ad publičnaj pazicyi Łukašenki, a taksama ad pazicyi Pucina. Nu jano i jasna: u Rasii kampanii z zachodnimi karaniami vykuplaje rasijski kapitał, a ŭ nas heta byŭ by rasijski kapitał, jaki i biez taho vielmi i vielmi prysutny», — dadaje inšy surazmoŭca.
Kamientary