«Kab nie było darohi nazad». Hurt VOLSKI anansavaŭ albom «Listy palitviaźniam»
26 vieraśnia hurt VOLSKI aficyjna abviaściŭ start pracy nad novym muzyčnym albomam «Listy palitviaźniam». Heta hramadska-muzyčny prajekt, jaki stvarajecca sumiesna ź biełaruskimi inicyjatyvami «Palitviazynka» i «Dysidentbaj».
U albomie płanujecca 12 tvoraŭ pad nazvami «List №1…», «List №2…». Aŭtary prajekta ź liku muzykaŭ i inicyjatyŭ, jakija ŭzdymajuć prablemy palitviaźniaŭ, zaklikajuć pisać listy palityčnym źniavolenym rehularna, niahledziačy na ciažkaści. Heta prajava salidarnaści, jakaja daje ahromnistuju siłu jak našym hierojam, tak i biełaruskamu hramadstvu ahułam.
Što kankretna VOLSKI choča skazać ludziam praz novy albom, raskazaŭ aŭtar piesień i lidar hurta Lavon Volski:
«U Biełarusi bolš za 1726 čałaviek z palityčnych pryčyn utrymlivajucca za kratami ŭ niečałaviečych umovach.
Kroŭ stynie, kali čytaješ, jak katujuć palitźniavolenych… Heta fašystoŭskija rečy.
Pra hetuju dzikuju absalutna źjavu treba pamiatać i zaŭsiody kazać, pryciahvać uvahu, u tym liku suśvietnaj hramadskaści. Choć ludzi i stamilisia ad navin pra vajnu i represii.
My majem uśviedamleńnie, što taki muzyčny prajekt nieabchodny, bo ludzi zabyvajucca pra palitźniavolenych.
Maŭlaŭ, siadziać tam — nu i siadziać. Kazali raniej, kali sadzili na try hady: oj, dy nie adsiedziać jany hetaha terminu… Ale ludzi ŭžo adsiedzieli i vyjšli. I z byłymi palitviaźniami treba razmaŭlać pra heta.
Dla XXI stahodździa biesprecedentnaja situacyja ŭ krainie, jakaja znachodzicca ŭ centry Jeŭropy. Kab represii nie paŭtaralisia, pra heta musić viedać jak maha bolš ludziej».
Tvorcy daŭno płanavali hetuju hramadska-muzyčnuju kampaniju, niekatoryja napracoŭki piesień užo jość. A ciapier adbyvajecca vychad ź cieniu.
«Ja mušu pra heta skazać aficyjna, kab nie było darohi nazad», — samairanična zaznačaje Lavon Volski.
Zapis alboma płanujecca ŭ Vilni.
Za abnaŭleńniami i pracaj nad albomam «Listy palitviaźniam» možna sačyć na sacyjalnych płatformach hurta VOLSKI ŭ YouTube, Telegram, Instagram, Facebook.
Vychodzić kniha viasiołych ašukanskich historyj ź ilustracyjami Lavona Volskaha
Lavon Volski ŭ svoj dzień narodzinaŭ prezientavaŭ novy albom
Rokier u karunkach. Lavon Volski ździviŭ fanataŭ kreatyŭnym łukam
«Chaciełasia b viarnucca da Vałožynščyny». Lavon Volski raskazaŭ pra svoj novy albom i žyćcio ŭ emihracyi
Biełyja dy čyrvonyja kvietki i mora śloz. Jak u Vilni sustrakali Palinu Šarendu-Panasiuk29
Kamientary