U Minzdaroŭja raskazali, jaki štam karanavirusa cyrkuluje ŭ Biełarusi
Namieśnik ministra achovy zdaroŭja, hałoŭny dziaržaŭny sanitarny doktar Biełarusi Alaksandr Tarasienka raspavioŭ BiełTA ab situacyi z kavidam u krainie.
Pavodle źviestak Alaksandra Tarasienki, z krasavika 2022 hoda ŭ Biełarusi nazirajecca peŭnaja stabilnaść u dačynieńni da raspaŭsiudu COVID-19. «Ciapier, jak i va ŭsim śviecie, adznačajecca peŭny rost zachvorvańnia. Situacyja kantralavanaja», — rastłumačyŭ jon. Varta adznačyć, što ź lipienia 2022 hoda Minzdaroŭja nie nazyvaje kolkaści vypadkaŭ zachvorvańnia kavidam u krainie.
Cyrkuluje raznavidnaść štamu amikron — «piroła».
«Karanavirusnaja infiekcyja nie pakidała nas z 2020 hoda. Ciapier u śviecie vyklikaje zakłapočanaść cyrkulacyja štamu «piroła», i ciapier nazirajecca peŭny ŭzdym. Hety štam charaktaryzujecca źnižeńniem praciahłaści inkubacyjnaha pieryjadu:
ad momantu zaražeńnia da zachvorvańnia prachodzić try dni, pry tym, što raniej było piać i bolš. Zachvorvańnie praciakaje ŭ niaciažkaj formie», — raspavioŭ hałoŭny dziaržaŭny sanitarny doktar.
U Ministerstvie achovy zdaroŭja taksama rekamiendujuć nasielnictvu vakcynavacca, nieabchodnyja dla pryščepak preparaty jość u najaŭnaści.
Tarasienka adznačyŭ, što apošnim časam u sietcy pieryjadyčna źjaŭlajucca paviedamleńni i kamientary ab tym, što z ulikam źmieny štamaŭ karanavirusa vakcynavacca biessensoŭna.
«Tak, štamy mianiajucca, ale Ministerstva achovy zdaroŭja nastojliva rekamienduje pa epidpakazčykach vakcynavacca, asabliva ludziam hrupy ryzyki. Heta hramadzianie va ŭzroście 61+, z chraničnymi zachvorvańniami i inšymi, vakcyna spryjaje tamu, što ŭ vypadku zaražeńnia zachvorvańnie budzie prachodzić nie ŭ ciažkaj formie. Vielmi važna, kab ludzi nie traplali na reanimacyjnyja łožki, kab nie było sumnych zychodaŭ. Na siońnia bolš za 10% nasielnictva pryščeplena», — padkreśliŭ jon.
Pa jaho słovach, ciapier praciahvajecca pryščepačnaja kampanija, dastupnyja rasijskaja i kitajskaja vakcyny («Sputnik V», «Sputnik łajt», Vero Cell. — NN) suprać COVID-19. «I my rekamiendujem nasielnictvu vakcynavacca i suprać hrypu, i suprać COVID-19. Vakcyny na siońnia jość u najaŭnaści. Kali kazać pra hryp, to za biudžetnyja srodki dastupnaja vakcyna rasijskaj vytvorčaści. Taksama za košt ułasnych srodkaŭ možna pryščapicca ŭ luboj ustanovie achovy zdaroŭja preparatami zamiežnaj vytvorčaści», — raspavioŭ Alaksandr Tarasienka, adznačyŭšy, što efiektyŭnaść vakcynacyi dakazanaja dziesiacihodździami.
Nahadajem, što dyrektar Centra imia Hamalei, jaki raspracavaŭ vakcynu «HamkavidVak», raskazaŭ, što pieršapačatkovy varyjant vakcyny staŭ biessensoŭny pierad novymi štamami. Pa słovach Alaksandra Hincburha, jahony instytut užo raspracoŭvaje novuju vakcynu, ale ŭ šyroki ŭžytak jana pastupić nie raniej za sakavik.
Kamientary