Puhač raskazaŭ, jak hraŭ kancert na Płoščy Pieramienaŭ, a ludzi strymlivali HUBAZiK
Lidar hurta J:MORS raspavioŭ «Biełsatu», jak vystupaŭ na Płoščy Pieramien, ratavaŭsia ad pieraśledu, a taksama zhadaŭ prapanovy supracy z uładami.
Uładzimir Puhač zhadvaje, jak u 2020-m vystupaŭ na Płoščy Pieramien, jakaja była hałoŭnaj placoŭkaj hramadzianskaha pratestu:
«Kali ja pryjechaŭ da ich, u dvary nas čakaŭ HUBAZiK. Što prydumali ludzi. Jany pryviali mianie niepasredna ŭ budynak i pastavili na ahulny bałkon. Ja stajaŭ na bałkonie, hraŭ kancert dla ich. Jany ŭ dvary słuchali. Ludzi zabłakavali dźviery, kab HUBAZiK nie trapiŭ u budynak i mianie nie aryštavaŭ. Pakul ja hraŭ kancert, jany niejak strymlivali dźviery znutry. HUBAZiK nie moh patrapić unutr. U niejki momant u ich atrymałasia heta zrabić. Jany trapili ŭnutr i stali šukać mianie pa bałkonach».
Śpiavak raspavioŭ, što jon hetaha nie bačyŭ, ale potym na zdymkach było dobra vidać, jak pa bałkonie, što znachodzicca źvierchu, biehajuć ludzi ŭ bałakłavach, hladziać uniz i sprabujuć vyrašyć, jak schapić mužčynu.
«Ludzi trymali dźviery na pavierch, na jakim ja byŭ. Ja skončyŭ, schavaŭsia ŭ adnu z kvater. My tam siadzieli prykładna hadziny dźvie, čakali pakul jany vakoł domu na svaich busikach stajali. Vielmi dobra pracavała raźviedka. Usiudy byli ludzi. Jany paviedamili, kali HUBAZiK źjechaŭ. Potym mianie pieraapranuli ŭ inšuju vopratku, spuścili ŭ padziemny haraž, pasadzili ŭ niejkuju mašynu, vyvieźli z dvara. Potym my ŭziali taksi i zjechali».
Pra prapanovy supracy z uładami
Uładzimir Puhač raspavioŭ, što jamu nie raz prapanoŭvali vystupić na kancertach u padtrymku ŭładaŭ. Za admovu vystupić na kancertach u padtrymku Łukašenki ŭ časie vybarčaj kampanii 2006 hoda hurt prykładna na paŭhoda źniali z usich efiraŭ. Zabarony byli ŭ 2010 i 2020 hadach.
«Mnie ciapier lohka i spakojna, što ja nikoli nie vystupaŭ na navahodnich imprezach Łukašenki, jakija rabilisia tradycyjna adrazu paśla Novaha hoda. Uvieś čas zvanili i prasili pryjechać vystupić. Ja nikoli nie jeździŭ. Ja prasiŭ dyrektara skazać, što my zjechali, što ŭ adpačynku. Heta nie toje što kožny raz ja im siaredni palec pakazvaŭ. Ja prosta paźbiahaŭ hetaha, kab mieć mahčymaść pracavać dalej».
Pra ŭdzieł u Kaardynacyjnaj radzie i vyjezd ź Biełarusi
Uładzimir Puhač raspavioŭ, što ŭ 2020 hodzie ŭvajšoŭ u Kaardynacyjnuju radu. I ŭ peŭny čas jaho, jak i inšych siabraŭ rady, stali zaprašać na dopyty.
«Kali stała zrazumieła, što zaviali kryminalnuju spravu suprać nas usich, ja padumaŭ, što lepiej zjedu. Pajechaŭ u Kijeŭ i miesiac tam žyŭ u studzieni [2021 hoda] …. Heta byŭ čas, kali va Ukrainie byŭ łakdaŭn, ničoha nie pracavała. Potym z kryminalnaj spravaj niešta stała. Jany nie stali jaje praciahvać. Ja zmoh viarnucca ŭ Biełaruś».
Jak zhadvaje Puhač, adčuvańnia taho, što za im pryjduć, u 2021 hodzie jašče nie było.
«Mnie padavałasia, što voś hetyja padziei skončylisia… Ale kali ź ciaham času stała zrazumieła, što ŭłady praciahvajuć hvałt, moj vielmi dobry siabra, jaki vymušany byŭ zjechać jašče ŭ 2020 hodzie ŭ žniŭni, aformiŭ mnie zaprašeńnie. Ja zrabiŭ vizu i ŭ 2022 hodzie zjechaŭ. Prykładna praź miesiac-dva pačalisia adrasnyja represii suprać artystaŭ. Mnie vielmi pašancavała. Kali b ja zastaŭsia jašče prykładna na dva-try miesiacy, ja b, moža, užo byŭ za kratami».
Čytajcie jašče:
«Ujaviŭ, što mnie było b cikava pasłuchać». Salist J:Mors zaniaŭsia aŭdyjaknihami
«Kali my kazali «było b idealna pracavać u Jeŭrasajuzie», to mieli na ŭvazie zusim nie heta». Vialikaja hutarka ź lidaram J:Mors Uładzimiram Puhačam
J:MORS vypuścili klip na pieśniu «Byvaj»: jon pra adčuvańni paśla žniŭnia-2020 VIDEA
«Maja pamyłka, što zapisvaju videa». Čym skončylisia rezanansnyja zvaroty da Łukašenki?10
Kamientary