Asudžany na 25 hadoŭ rasijski palityk Kara-Murza staŭ uładalnikam Pulitceraŭskaj premii
Rasijski publicyst i apazicyjny palityk Uładzimir Kara-Murza, prysudžany ŭ Rasii da 25 hadoŭ źniavoleńnia pavodle artykułaŭ pra «dziaržzdradu», supracu z «niepažadanaj» arhanizacyjaj i «fejki» pra vojska, staŭ łaŭreatam prestyžnaj Pulitceraŭskaj premii
Adznačajecca, što Uładzimir Kara-Murza byŭ pryznany najlepšym u naminacyi «kamientar» za niekalki publikacyj u raździele «mierkavańni» ŭ haziecie The Washington Post, jakija vyjšli sa studzienia pa kastryčnik 2023 hoda. Hetyja kamientary pryśviečanyja vajnie Rasii suprać Ukrainy, apazicyjanieru Alaksieju Navalnamu, mahčymaści palityčnych pieramienaŭ u Rasii i inšym aktualnym temam, piša Deutsche Welle.
Prysud u 25 hadoŭ, vyniesieny Uładzimiru Kara-Murzie ŭ krasaviku 2023 hoda, heta samy praciahły turemny termin, jaki kali-niebudź pryznačaŭsia za krytyku Pucina.
Da prysudu palityk pravioŭ pad vartaj hod, choć abarona nastojvała, što jon nie moža pa stanie zdaroŭja ŭtrymlivacca ŭ SIZA.
30 studzienia 2024 hoda Kara-Murzu pieraviali ŭ adzinaje pamiaškańnie kamiernaha typu (APKT) u papraŭčaj kałonii №7 (PK-7) u Omsku. Umovy ŭtrymańnia ŭ APKT ličacca samymi strohimi. Siamja i advakaty apazicyjaniera zajaŭlajuć, što jon pakutuje na paliniejrapatyju praź dźvie sproby atrucić jaho, u jakich padazrajuć śpiecsłužby RF. Pravaabarončyja arhanizacyi pryznali Uładzimira Kara-Murzu palitviaźniem. Čalcy Kanhresu ZŠA zaklikali Bieły dom unieści rasijskaha palityka ŭ śpis «niezakonna zatrymanych».
19 krasavika 2024 hoda pravaabarončy prajekt «Pieršy adździeł» paviedamiŭ sa spasyłkaj na žonku źniavolenaha Jaŭhienu Kara-Murzu, što jaje muža źbirajucca suprać voli etapavać z Omska ŭ Maskvu dla ŭdziełu ŭ pasiadžeńni Viarchoŭnaha suda ŭ kasacyi na prysud. Pa słovach Jaŭhienii Kara-Murzy, prymusovaje etapavańnie ŭ Maskvu, jakoje moža zaniać niekalki miesiacaŭ, aznačaje, što rodnyja ŭ najbližejšy čas straciać suviaź z Uładzimiram.
Kamientary