«Nievierahodna, što dziaržTB moža tak adkryta chłusić». Čałaviek, jakoha BT nazvała kurataram japonskaha špijona, prakamientavaŭ situacyju
Pavodle viersii KDB, zatrymany vykładčyk Homielskaha dziaržuniviersiteta Masatosi Nakanisi atrymlivaŭ zadańni ad kuratara ź Japonii. Ale čałaviek, jakoha nazvali kurataram, zajaviŭ, što heta chłuśnia.
4 vieraśnia stała viadoma pra zatrymańnie ŭ Homieli vykładčyka japonskaj movy Masatosi Nakanisi. Na nastupny dzień na «Biełaruś 1» vyjšaŭ siužet, u jakim zatrymanaha nazyvajuć japonskim špijonam. Pa viersii KDB, jon atrymlivaŭ zadańni ad kuratara Masanary Sata — byłoha muža jaho siastry.
Vydańnie The Manichi apublikavała intervju ź biznesmenam, jakoha biełaruski KDB ličyć kurataram japonskaha ahienta. Imia čałavieka ŭ artykule nie nazyvajecca, ale možna mierkavać, što havorka idzie mienavita pra Sata.
Mužčyna admaŭlaje, što jany z Nakanisi supracoŭničajuć ź japonskimi śpiecsłužbami. Prahramu BT jon nazvaŭ «poŭnaj mistyfikacyjaj» i zaklikaŭ da nieadkładnaha vyzvaleńnia Nakanisi.
Pradprymalnik źviartaje ŭvahu na skryn pierapisak na japonskaj, jakija byli apublikavanyja ŭ siužecie. Pavodle jaho słoŭ, aŭtary prahramy niapravilna pierakłali paviedamleńni, skaziŭšy ich pieršapačatkovy sens.
Mužčyna raspavioŭ, što padtrymlivaŭ dobryja stasunki z Nakanisi, jaki byŭ bratam jahonaj žonki. Jany sustrakalisia niekalki razoŭ na hod, u tym liku paśla pierajezdu Nakanisi ŭ Biełaruś. Apošni raz jany razmaŭlali ŭ krasaviku 2024 hoda, abmianiaŭšysia prostymi pryvitańniami.
U siužecie BT paviedamlałasia, što Sata byŭ źviazany z Nacyjanalnaj kamisijaj hramadskaj biaśpieki Japonii, i što jon davaŭ ukazańni pa špijonskaj dziejnaści. U prahramie byŭ pakazany abmien dumkami pamiž im i Nakanisi ŭ jakaści «dokazu» hetych abvinavačvańniaŭ.
U skrynie paviedamleńnia Nakanisi na japonskaj havorycca: «japonskija kampanii majuć tolki niekalki pieravah (dla praniknieńnia siudy). Moc Kitaja vielizarnaja». Ale pierakład ad BT niekalki adroźnivajecca: «što tyčycca niadaŭniaha napadu, to jano, padobna, źjaŭlajecca mistyfikacyjaj ZŠA. Kali tut adbudziecca niešta padobnaje, ja vam abaviazkova paviedamlu. Pa sutnaści my nie daviarajem tut ŚMI. Možna vieryć tolki svajoj sietcy znajomstvaŭ».
Pa słovach mužčyny, pakazany ŭ teleprahramie dyjałoh adbyŭsia niekalki hadoŭ tamu i ŭjaŭlaŭ saboj adkaz Nakanisi na jaho pytańnie ab raźvićci biznesu ŭ Biełarusi, zadadzienaje vyklučna ź cikaŭnaści.
«Ja prosta chacieŭ daviedacca, ci budzie pradukcyja majoj kampanii zapatrabavanaja za miažoj, i heta była całkam zvyčajnaja razmova dla biznes-mieniedžara», — zajaviŭ uładalnik kampanii.
«Nievierahodna, što dziaržaŭny viaščalnik moh tak adkryta chłusić. Ja dahetul nie razumieju, čamu ja taksama akazaŭsia ŭciahnutym u heta».
Jon skazaŭ, što nie atrymlivaŭ nijakich paviedamleńniaŭ ad biełaruskich uładaŭ.
Havoračy ab Nakanisi, mužčyna adznačyŭ: «Jon z usich sił staraŭsia danieści japonskuju kulturu ŭ Biełaruś. Ja nie mahu pavieryć, što jon zajmaŭsia špijanažam. Ja spadziajusia, što jon vierniecca ŭ Japoniju ŭ dobrym zdaroŭi jak maha chutčej».
Masatosi Nakanisi zatrymali ŭ krasaviku 2024 hoda. Jaho abvinavačvajuć pa artykule ab ahienturnaj dziejnaści. Pavodle viersii KDB Biełarusi, ciaham šaści hadoŭ jon zdabyvaŭ źviestki ab važnych stratehičnych abjektach i hramadska-palityčnaj situacyi ŭ krainie dla japonskaj vyviedki.
«Maja pamyłka, što zapisvaju videa». Čym skončylisia rezanansnyja zvaroty da Łukašenki?6
Kamientary