Dziermant zastupiŭsia za baškirskaha hieroja Sałavata Jułajeva. Heta nie spadabałasia Dziukavu
«Alaksiej, da čaho ž vy dakacilisia». — «Alaksandr, dla mianie vy daŭno prabili dno».
Biełaruski prapahandyst i hałoŭny redaktar časopisa «Historyja i hramadaznaŭstva» Alaksiej Dziermant u svaim telehram-kanale źviarnuŭ uvahu na vyniki konkursu na vobraz, jaki budzie źmieščany na 1000-rublovaj kupiury ŭ Rasii.
«Hańby vartaje toje, što suprać adnaho z kankurujučych vobrazaŭ — pomnika Sałavatu Jułajevu [u stalicy Baškartastana Ufie] — była sfabrykavanaja sapraŭdnaja kampanija ckavańnia, jakaja razharnułasia ŭ ŚMI, na internet-sajtach i telehram-kanałach z boku tak zvanych «ruskich nacyjanalistaŭ». Nie varty, maŭlaŭ, Sałavat krasavacca na ruskich hrošach», — napisaŭ Dziermant.
Praź niekalki dzion prapahandyst zrabiŭ pierapost z kanała viadomaj hramadskaj dziajački Baškartastana Raufy Rachimavaj, jakaja napisała:
«Hetaje ckavańnie, arhanizavanaje tak zvanymi «ruskimi nacyjanalistami», ahidnaje. Za našaha nacyjanalnaha hieroja zastupiŭsia ruski piśmieńnik Zachar Prylepin i biełaruski fiłosaf Alaksiej Dziermant».
Heta nie zastałosia biez uvahi dyrektara fondu «Histaryčnaja pamiać» Alaksandra Dziukava, rasijskaha nacyjanalistyčnaha historyka z karaniami ŭ łacinaamierykanskaj Hajanie:
«Aleksiej, da čaho ž vy dakacilisia. Vas chvalić adkrytaja antyrasijskaja nacyjanalistka, jakaja źjechała z Rasii ŭ Turcyju, asudžanaja za raspaŭsiudžvańnie fejkaŭ ab SVA, jakaja raspaŭsiudžvaje łžyvyja vydumki ab uładach Baškiryi».
Na što ŭ svaim kanale Dziermant adkazaŭ:
«Alaksandr, pohladaŭ Raufy Rachimavaj nakont SVA nie padzialaju, zrešty, jak i vašych u adnosinach da Lenina i Sałavata Jułajeva. I dla mianie vy daŭno prabili dno, robiačy ŭ siabie reposty i papularyzujučy nacysta [błohiera i publicysta Ramana] Antonaŭskaha».
Paśla Dziermant napisaŭ, što ŭdakładniŭ infarmacyju pra Rachimavu. «Dyk voś, žyvie i pracuje jana va Ufie, ni ŭ jakuju Turcyju nie źbiahała, nijakich nacyjanalistyčnych, antyrasijskich vykazvańniaŭ za joj zaŭvažana nie było», — davodzić prapahandyst i dadaje, što nasamreč Rachimava «padtrymlivaje SVA i zajmajecca vałanciorstvam, dapamahajučy bajcam z Baškiryi».
«Prykra, što zaraz davodzicca praviarać kožnaje słova niekali pavažanaha historyka Dziukava na pradmiet adkrytaj chłuśni», — piša Dziermant.
Dziukaŭ nie zmaŭčaŭ i taksama vystupiŭ z abvinavačvańniami:
«Padumajcie jašče raz, Alaksiej, što adbyłosia, čamu vy apynulisia na adnym baku z antyrasijskaj baškirskaj nacyjanalistkaj, jakaja raspaŭsiudžvaje fejki pra SVA, i Prylepinym, jaki skažona adlustroŭvaje Sajuznuju dziaržavu. Dzie vy paviarnuli nie tudy? Chto śpichnuŭ vas na hety šlach?»
U nastupnym dopisie jon patłumačyŭ, čamu zastajecca pry svaim mierkavańni adnosna Rachimavaj. Praŭda zusim nie zhadaŭ taho, što jana sapraŭdy ni ŭ jakuju Turcyju nie źjechała.
U svaju čarhu Dziermantu daviałosia tłumačyć, što vykazvańni Prylepina ŭ 2020-m hodzie ab rusafobii jak častcy dziaržaŭnaj ideałohii Biełarusi byli «emacyjnaj reakcyjaj na zatrymańnie ŭ toj pieryjad u Biełarusi bajcoŭ hrupy Vahnier» i što «potym z hetaj situacyjaj razabralisia».
Svoj dopis prapahandyst skončyŭ abvinavačvańniem apanienta: «U dačynieńni da pazicyi Dziukava siońnia vyklikajuć vialikija pytańni jaho antyleninizm i pa sutnaści antysavietyzm. Ź biełaruskaha punktu hledžańnia padobnyja pohlady iduć nasupierak sajuznamu padychodu da histaryčnaj pamiaci».
Praź niekalki hadzin Dziermant patłumačyŭ, čamu jamu nie padabajecca «kampanija pa ačarnieńni» asoby Sałavata Jułajeva, jaki źjaŭlajecca nacyjanalnym hierojem baškirskaha narodu.
Prapahandyst adznačyŭ, što ličyć postać Sałavata Jułajeva značnaj nie tolki dla baškir, ale i dla ruskich. I nahadaŭ, što ŭ saviecki čas Sałavat Jułajeŭ byŭ ahulnasajuznaj fihuraj. Na jaho pohlad, «kampanija pa ačarnieńni hieroja z boku ruskich nacyjanalistaŭ moža pryvieści da razbałansiroŭki mižnacyjanalnych adnosin jak u Rasii, tak i ŭ cełym u Sajuznaj dziaržavie».
Kamientary