Danija vyrašyła praviarać tankiery rasijskaha cieniavoha fłotu. Heta rezkaja źmiena raniejšych padychodaŭ

Dackaje marskoje ŭpraŭleńnie pačnie pravodzić inśpiekcyi sudnaŭ, jakija «nie mohuć ličycca biaśpiečnymi ŭ płavańni» i stajać na rejdzie kala Skahiena (horad na paŭnočnym uskrajku paŭvostrava Jutłandyja na vychadzie z Bałtyjskaha mora ŭ Paŭnočnaje).

«Heta robicca ŭ suviazi z aktyŭnaściu starych sudnaŭ, jakija pieravoziać naftu praz Dackija pralivy, što vyklikaje pavyšanuju ryzyku i zaniepakojenaść u pytańni zabieśpiačeńnia biaśpieki marapłaŭstva, marakoŭ i navakolnaha asiarodździa», — havorycca ŭ zajavie viedamstva.

Jano budzie praviarać sudny na adpaviednaść hetym normam — pierš za ŭsio tankiery, pakolki jany ŭjaŭlajuć najbolšuju niebiaśpieku.

Rasijski cieniavy fłot składajecca z bolš čym 600 tankieraŭ, pavodle acenak Lloyd's List i Kijeŭskaj škoły ekanomiki. Jany pieravoziać kala 70% nafty, jakaja ekspartujecca marskim šlacham. U mnohich ź ich adsutničaje infarmacyja pra ŭładalnikaŭ i strachoŭku.

Za apošnija dva hady, kali z dapamohaj takich sudnaŭ eksparciory stali sprabavać abychodzić uviedzienuju zachodnimi krainami cenavuju stol dla rasijskaj nafty, u Bałtyjskim mory było niekalki vypadkaŭ pałomak tankieraŭ. Jany, praŭda, nie pryviali da raźlivaŭ nafty.

Sapraŭdnaja katastrofa, adnak, adbyłasia ŭ śniežni 2024 hoda ŭ Čornym mory. U vyniku krušeńnia ŭ Kierčanskim pralivie dvuch tankieraŭ, pabudavanych bolš za paŭstahodździa tamu, vyliłasia pa mienšaj miery 4 tysiačy ton mazuty. Likvidavać nastupstvy hetaha ekałahičnaha biedstva nie ŭdajecca da hetaha času.

Praz vuzkija i źvilistyja Dackija pralivy ŭ 2024 hodzie było vyvieziena rasijskaj nafty prykładna na $33 młrd. Heta kala 42% sukupnaha koštu rasijskaha marskoha naftavaha ekspartu, śviedčać sabranyja Bloomberg danyja ab adsočvańni sudnaŭ i ceny, atrymanyja ad Argus Media.

Da hetaha času Danija nie advažvałasia pravodzić nadhlady sudnaŭ, niahledziačy na rost zaniepakojenaści praz mahčymyja pałomki, jakija mohuć pryvieści da raźlivu nafty. Jana zajaŭlała, što nie budzie pieraškadžać prachodžańniu rasijskich karabloŭ praz svaje vody ŭ adpaviednaści z damovaj ad 1857 hoda, jakaja harantuje svabodnaje płavańnie praz Dackija pralivy.

Padstavaj dla inśpiekcyi moža stać najaŭnaść dakładnaj infarmacyi, što tankier ujaŭlaje pahrozu dla ekałahičnaj biaśpieki vod i ŭźbiarežža krainy. Da hetaha času Danija nie karystałasia hetaj mahčymaściu, jakuju dajuć mižnarodnyja zakony ab svabodzie sudnachodstva, ale apošniaja zajava aznačaje radykalnaje źmianieńnie takoj palityki, adznačaje Bloomberg.

U śniežni 12 krain Paŭnočnaj Jeŭropy damovilisia ŭvieści pravierku strachavych polisaŭ u rasijskich tankieraŭ. Choć sudny nie abaviazanyja spyniacca ŭ vypadku vystaŭleńnia takoha patrabavańnia, tyja, chto admovicca, buduć traplać u bazu danych; prysutnaść u joj moža stać padstavaj dla ŭviadzieńnie sankcyj suprać takich tankieraŭ.

U kancy minułaha hoda Vialikabrytanija ŭžo pačała patrabavać ad sudnaŭ, jakija prachodziać praz praliŭ Ła-Manš, padavać strachoŭku.

• 6
• 0
• 0
• 0
• 0
• 0
• 0
• 0