Za apošnija 15 hadoŭ vydańnie knih u Biełarusi źmienšyłasia na 40%
Za historyju niezaležnaj Biełarusi maksimalnaja kolkaść apublikavanych knižnych vydańniaŭ zafiksavanaja ŭ 2008 hodzie — tady było vypuščana 13,2 tys. knih i brašur. Paśla hetaha pakazčyk pačaŭ padać i da siońnia źmienšyŭsia amal napałovu. Pra heta havorycca ŭ artykule ŭ časopisie «Sociołohičieskij almanach», jaki vypuskajecca Nacyjanalnaj akademijaj navuk, piša Thinktanks.pro.
Pavodle danych Biełstata, u 2023 hodzie ŭ krainie było vydadziena 7,8 tys. knih i brašur, tady jak dziesiać hadoŭ tamu, u 2013-m, ich vyjšła 11,4 tys. — na 32% bolš. Kali ž ličyć ad 2008 hoda, to źmianšeńnie ŭ paraŭnańni z 2023 hodam — na 41%.
Kali kazać nie tolki pra knihi, a pra drukavanuju pradukcyju ŭsich typaŭ, to skaračeńnie jaje vypusku za apošniaje dziesiacihodździe (2013-2023 hady) skłała 42%, a kali vieści adlik z 2008, to vypusk abvaliŭsia amal napałovu.
Usiaho ŭ 2023 hodzie Knižnaj pałataj zarehistravana 40,2 tys. abaviazkovych ekzemplaraŭ drukavanych vydańniaŭ. U spravazdačy Knižnaj pałaty za 2023 hod pradstaŭleny źmiastoŭny skład vydańniaŭ, ź jakich 20% skłali knihi i brašury, kala 50% — numary haziet, 11,5% — časopisy i biuleteni, i kala 17% — viedamasnyja i listavyja vydańni.
Uzmacnieńnie strohaści va ŭmovach pracy vydaviectvaŭ pačalisia jašče ŭ 2002 hodzie. Tady byli admienienyja padatkovyja pasłableńni dla vydavieckaha siektara, paśla čaho pačałosia źnižeńnie rentabielnaści vydaviectvaŭ, a paśla skaracilisia pieralik litaratury i drukavanyja nakłady.
Siektar adčuvaŭ ciažkaści ŭ kankurencyi z rasijskimi vydaŭcami, što adbivałasia na struktury rynku litaratury. Da 90% knižnaha rynku Biełarusi składała litaratura, impartavanaja z Rasii.
A paśla 2020 hoda ŭ Biełarusi byli pazbaŭlenyja licenzii i zakrytyja mnohija pryvatnyja knižnyja vydaviectvy.
I viedajecie, heta ŭsio — praŭda. Novaja dakumastackaja kniha Ancipava vykliča skryhat u miedyjnych i bahiemnych kołach
«U biełaruskaj knižnaj prastory čas byccam zapavoliŭsia». Zosia Łuhavaja raskazała pra tendencyi ŭ litaratury
«Spadziajusia, što my vyrulim, tamu što robim niešta važnaje i dobraje». Dyrektarka kniharni raskazała, što takoje knižny biznes u sučasnych umovach
«Pierastali być kačeŭnikami i asieli na ziamli». Vydaviec Januškievič prezientavaŭ novuju kniharniu i raskazaŭ pra pierśpiektyvy biznesu
Kamientary