Užo čatyry tydni za kratami znachodziacca advakat z ZŠA Juraś Ziankovič, litaraturaznaŭca Alaksandr Fiaduta i staršynia Partyi BNF Ryhor Kastusioŭ.
Usie jany źjaŭlajucca abvinavačanymi pa kryminalnym artykule 357 «Zmova abo inšyja dziejańni, ździejśnienyja z metaj zachopu dziaržaŭnaj ułady». Palitykam pahražaje ad 8 da 12 hadoŭ źniavoleńnia.
«Naša Niva» spytała ŭ pradstaŭnika pravaabarončaha centra «Viasna» Valancina Stefanoviča, ci atrymajuć Ziankovič, Fiaduta i Kastusioŭ status palityčnych viaźniaŭ.
«Vielmi ciažka rabić niejkija vysnovy, bo ŭsia infarmacyja, jakuju my viedajem, my majem ź dziaržaŭnaha telebačańnia, inšaha niama. My viedajem, što zatrymanyja čatyry čałavieki (čaćviortaja — Volha Hałubovič, supracoŭnica minskaha ofisa Jurasia Ziankoviča — «NN»), jany znachodziacca ŭ SIZA, troje nibyta pryznali svaju vinu i supracoŭničajuć sa śledstvam. Pra ŭsio heta kaža KDB.
Viedajem taksama, što kazaŭ Łukašenka. Maŭlaŭ, hienierał byŭ niesapraŭdnym, jaho syhraŭ niejki aficer. Usio astatniaje — heta infarmacyjnaja nakručvańnie, pačynajučy ad Bajdena, skončvajučy džypami, jakija pavinny byli prarvacca ź Litvy.
Davajcie razvažać sa składu artykuła 357. U vypadku «zmovy» złačynstva ličycca skončanym u momant tajemnaha pahadnieńnia ab zachopie ŭłady pamiž dvuma ci bolš asobami. Zusim nieabaviazkova, kab heta byli asoby, što majuć niejkija ŭładnyja paŭnamoctvy. Kali b heta ŭsio skončvałasia tolki razmovami ŭ zumie, biez kantaktaŭ ź inšymi asobami, to možna było kazać: ci mała chto pra što razmaŭlaje i spaborničaje ŭ daścipnaści?
Ale ŭsio ž kantakty z «vajskoŭcami», napeŭna, byli. Vierahodna, što jany sapraŭdy mahli pieradavać kamuści niejkija hrošy. Byŭ zrobleny šerah dziejańniaŭ, a zaviaršalny etap — sustreča ŭ Maskvie, dzie byli damoŭlenaści ab dziejańniach.
Možna vieści havorku ab «pravakacyi złačynstva», ale heta składanaja tema. Viadoma, što śledčyja vykarystoŭvajuć takija mietady ŭ svajoj pracy, jak, skažam, «kantrolnaja zakupka» ŭ narkahandli. I suśvietnaja praktyka kaža, što śpiecsłužby, palicyja takija mietady mohuć vykarystoŭvać. Ale jany nie mohuć hrać aktyŭnuju rolu. Adna situacyja, kali hetyja kantakty šukali abvinavačanyja, i zusim inšaja — kali nibyta «hienierały».
Dla nas, pravaabaroncaŭ, važny momant, ci sapraŭdy jany płanavali takija dziejańni, jak «likvidacyja prezidenta». My ni ŭ jakim razie nie padtrymlivajem palityčny hvałt, niezaležna ad taho, chto suprać kaho. Pytańnie, ci pryznajuć abvinavačanyja svaju vinu dobraachvotna, ci pad ciskam peŭnych abstavin?
Treba nahadać, što heta nie pieršaja sprava ab «zmovie, nakiravanaj na zachop ułady». Čamuści našy orhany zabylisia pra Kaardynacyjnuju radu, ale tam značna praściej, bo Rada dziejničała publična. Jany prapanoŭvali ŭładam pieramovy, a nie niekanstytucyjny zachop.
Jasna, što heta była raspracoŭka, śpiecapieracyja. Usio heta fiksavałasia, usie pieradačy. Ja vielmi ździŭleny niekatorymi piersanažami, jakija tudy ŭpisalisia. Mabyć, prysutničała niejkaja naiŭnaść.
Pakul nie staić pytańnie ab pryznańni zatrymanych palitviaźniami. Najpierš havorka pra mety. Ci sapraŭdy jany havaryli pra fizičnuju likvidacyju kiraŭnika krainy? Pakul my možam havaryć, što fakt zmovy vidavočna jość.
Z taho, što pakazali pa TB, nie da kanca zrazumiełaja rola Ryhora Kastusiova. Mahčyma, jon moh być nieabaznany ŭ hetych płanach. Kali jon nie viedaŭ pra dziejańni i płany, to viny tut niama».
Skandał na abłasnoj alimpijadzie pa niamieckaj movie. Dyrektar škoły, dzie vučycca pieramožca, adkazaŭ chiejtaram25
Kamientary