Ekśpierty pa kibierbiaśpiecy: Biełaruś supracoŭničaje z chakierami i viadzie padryŭnuju dziejnaść suprać krain NATO
Amierykanskaja kampanija pa kibierbiaśpiecy Mandiant vypuściła spravazdaču, u jakoj śviedčyć: biełaruski ŭrad supracoŭničaje z chakierskimi supołkami i ekśpiertami pa dezinfarmacyi.
Zhodna z dakumientam, na praciahu niekalkich hadoŭ Biełaruś prymaje ŭdzieł u varožych dziejańniach, nakiravanych suprać jaje susiedziaŭ-čalcoŭ NATO. Niepasredna hetym zajmajecca chakierskaja hrupiroŭka pad nazvaj UNC1151, i ekśpierty ličać, što, vielmi vierahodna, jaje kiraŭnictva ažyćciaŭlajecca ź Minska, piša Sky News.
Što pryviało ich da takich vysnovaŭ? Ekśpierty spasyłajucca na šmatlikija krynicy, što paćviardžajuć suviaź pamiž chakierami i biełaruskimi vajennymi, a taksama na pakinutyja chakierami ličbavyja ślady. Ale ž Mandiant nie tłumačyć, čamu jany pryjšli da vysnovy, što chakiery źviazanyja ź biełaruskim uradam, i nie raskryvaje sutnaści svaich krynic.
Adzin z elemientaŭ pracy hrupiroŭki — kampanija pa dezinfarmacyi ŭ ramkach kibierapieracyi Ghostwriter, jakaja pravodzicca niekalki hadoŭ. Raniej ekśpierty źviazvali jaje dziejnaść z Rasijaj.
Da vybaraŭ 2020 hoda kampanija ŭ asnoŭnym była pryśviečanaja raspaŭsiudu historyj admoŭnaha charaktara pra prysutnaść NATO ŭ susiednich ź Biełaruśsiu krainach. Ludziam raspaviadali iłžyvuju infarmacyju, naprykład, pra razhortvańnie ŭ tych krainach jadziernaj zbroi, ci pra toje, jak vojski NATO ździajśniajuć złačynstvy ci raspaŭsiudžvajuć kavid.
Adnak paśla vybaraŭ kampanija pa dezinfarmacyi nabyła inšy charaktar. Jak śviedčyć Mandiant, ciapier jaje ŭdzielniki stali abvinavačvać zachodnija ŭrady ŭ karupcyi. Asabliva heta datyčyłasia ŭradaŭ Litvy i Polščy, što stroha asudzili pieraśled mirnych demanstrantaŭ u Biełarusi.
Metaj dezinfarmacyi było stvaryć napružańnie ŭ adnosinach pamiž Polščaj i Litvoj, a taksama dyskredytyravać biełaruskuju apazicyju.
Biendžamin Ryd, kiraŭnik adnaho z padraździaleńniaŭ Mandiant, pryvioŭ prykład dezinfarmacyi, ź jakoj sutyknuŭsia padčas rasśledavańnia. Zhodna ź im, udzielniki kampanii skłali historyju pra polskaha śviatara, jakoha nibyta zabiŭ mihrant ź Iraka. Hety mihrant raniej byŭ u Litvie, ale zdoleŭ trapić u Polšču. Na samoj spravie śviatar byŭ žyvy. Adnak heta daloka nie adzinaja niehatyŭnaja historyja pra mihrantaŭ, što akazałasia iłžyvaj. Udzielniki kampanii skłali na polskaj movie šmat takich historyj.
Chakiery suprać dysidentaŭ
Mandiant taksama raspaviadaje ŭ spravazdačy, što biełaruskija dysidenty, miedyja i žurnalisty akazalisia siarod achviar kampanii pa kibieršpijanažy. Zhodna z ekśpiertami, chakiery stvarali śpiecyjalnyja damieny, praź jakija krali paroli ludziej i potym uvachodzili ŭ ich elektronnuju poštu. Inšych padrabiaznaściej nie pryvodzicca.
Adnak nie tolki biełarusy akazalisia celami chakieraŭ. Taksama pad udar trapili dziaržaŭnyja i pryvatnyja ŭstanovy ŭ Litvie, Łatvii, Ukrainie, Polščy i Hiermanii.
Jak śviedčyć Biendžamin Ryd, lepšy sposab abaranicca ad takich napadaŭ — vykarystańnie ŭ miesendžerach i sacsietkach dvuchfaktarnaj aŭtentyfikacyi. Taksama varta svoječasova źviartać uvahu na paviedamleńni pra toje, što ŭ vaš akaŭnt ździejśnieny ŭvachod i vam treba pamianiać parol.
Chakiery śćviardžajuć, što ŭzłamali bazu Fondu sacyjalnaj abarony nasielnictva. Jany apublikavali danyja pa najbližejšym kole Łukašenki
EUObserver apublikavaŭ rasśledavańnie, jakoje raskryvaje, jak niekatoryja krainy ES abychodzili embarha na pastaŭki zbroi ŭ Biełaruś
Samy maštabny źliŭ dakumientaŭ «Pandora papers»: što heta, što tam pra Biełaruś, pry čym tut Šejman i jaho syn
-
Šlacham Cichanoŭskaha: redaktarka rajonki i łukašenkaŭski błohier tak zachapilisia prablemami Barysava, što pryjšli da kramolnych vysnovaŭ
-
Dzie ciapier Kirył Kazakoŭ — były kiraŭnik STB, «chrosny baćka» Azaronka i inšych prapahandystaŭ?
-
Biełaruskamoŭny dziciačy časopis «Matulina soniejka» prypyniŭ svoj vychad
Kamientary