«Hetaja kraina nazyvaje nas svaim voraham». Prezident Čechii patłumačyŭ svaju prapanovu sačyć za rasijanami ŭ Jeŭropie
Prezident Čechii Petr Paveł udakładniŭ svaje vykazvańni pra pahrozu biaśpiecy, jakuju jon bačyć u rasijskich hramadzianach u Jeŭropie, i nieabchodnaści ŭvažliva sačyć za ich dziejnaściu.
U čaćvier prezident Paveł skazaŭ u intervju «Radyjo Svaboda», što rasijskija hramadzianie, jakija pražyvajuć u Jeŭropie, pavinny znachodzicca pad nahladam śpiecsłužbaŭ.
Heta vyklikała hnieŭnuju reakcyju mnohich rasijskich karystalnikaŭ sacyjalnych sietak, jakija, u pryvatnaści, asabliva šmat kamientavali paraleli, jakija Paveł pravioŭ pamiž stanoviščam rasijanaŭ u krainach ES i japoncaŭ u časy Druhoj suśvietnaj vajny ŭ ZŠA, pra heta piša Bi-bi-si.
«Ja mahu adčuvać škadavańnie ŭ dačynieńni da hetych ludziej, ale ŭ toj ža samy čas, kali my pahladzim na historyju, na čas, kali pačynałasia Druhaja suśvietnaja vajna, u dačynieńni da ŭsiaho japonskaha nasielnictva ZŠA taksama byŭ uviedzieny režym pilnaha nazirańnia. Heta prosta košt vajny», — skazaŭ tady Paveł.
Paśla pačatku Druhoj suśvietnaj vajny ŭłady ZŠA internavali kala 125 tysiač japoncaŭ, jakija pražyvali na terytoryi krainy etničnych japoncaŭ, bolšaść ź jakich byli amierykanskimi hramadzianami.
Aficyjnaja pradstaŭnica kiraŭnika Čechii ŭdakładniła, što paraŭnańnie ź japonskim nasielnictvam ZŠA «było zroblena ŭ tym kantekście, što abmiežavalnyja miery ŭ dačynieńni da hramadzian varožych krain — źjava nie novaja, i ŭ minułym jany taksama ŭvodzilisia, choć i bolš žorstka».
Prezident Čechii nie kazaŭ, što takija zachady treba paŭtarać ciapier i nijakim čynam nie mieŭ na ŭvazie «internavańnie abo jaki-niebudź inšy pieraśled», jak dadała jana.
«Stavicca z aściarožnaściu»
U niadzielu svaje słovy patłumačyŭ užo Paveł. U efiry telekanała CNN Prima News prezident udakładniŭ, što nie prapanuje śpiecsłužbam sačyć za kožnym rasijaninam. Razam z tym ułady, sa słoŭ prezidenta Čechii, pavinny sačyć za padziejami ŭ rasijskaj supołcy, kab reahavać na patencyjnuju ryzyku.
Paveł paŭtaryŭ, što Rasija viadzie ahresiŭnuju vajnu i «adkryta admaŭlaje rečaisnaść mižnarodnych praviłaŭ i prava». Jon nahadaŭ hledačam pra vybuchi ŭ 2014 hodzie na češskim składzie zbroi — tajnaj apieracyi, jakuju, sa słoŭ Prahi, praviali ahienty rasijskaha HRU.
«Hetaja kraina nazyvaje nas svaim voraham. Praz svaich pieršych asob jana pahražaje inšym krainam vajennymi ŭdarami, u tym liku z užyvańniem jadziernaj zbroi. Hetaja kraina ździejśniła terarystyčny akt u našaj dziaržavie. Pa ŭsich hetych pryčynach my pavinny z aściarožnaściu stavicca da hramadzian Rasii, jakija pražyvajuć na našaj terytoryi», — adznačyŭ Paveł.
U subotu słovy Paveła prakamientavaŭ kiraŭnik kamiteta Dziarždumy ŭ mižnarodnych spravach Leanid Słucki. Jon skazaŭ, što zajavy prezidenta Čechii «absalutna za miežami», heta «nieanacyzm u čystym vyhladzie».
Stała viadoma, jak dobra ŭładkavaŭsia ŭ žyćci muž starejšaj unučki Łukašenki12
Kamientary
Blin po dobromu zaviduju čiecham,normalnyj priezidient hovoriaŝij adiekvatnyje vieŝi,v našich riealijach eto tak mnoho.