Šoumien Jaŭhien Bułka, jaki źjechaŭ u Izrail, tanna pradaje svoj zaharadny dom pad Łahojskam
Jaŭhien Bułka padtrymaŭ pratesty, trapiŭ u «čornyja» śpisy ŭ Biełarusi i pačaŭ novaje žyćcio ŭ Izraili, pracuje tam sanitaram.
Abjavu pra prodaž doma zaŭvažyŭ «NV». Niekatoryja padpisčyki paprakajuć artysta, što jon vystaviŭ zanadta maleńkuju canu za asabniak i ŭčastak 25 sotak niedaloka ad harnałyžnaha kompleksu ŭ Łahojsku.
«Ci možna addać maru?! Možna, kali daviaraješ miru i žyćciu. Možna, kali mara zastajecca ŭ zychodnym punkcie, a ty ruchaješsia dalej. Možna, kali vyzvalaješ miesca dla novych zadač i met.
Ja hatovy rasstacca sa svajoj maraj i vykanać niečuju. Zabirajcie hety dom za simvaličny košt! U im — kancentravanaje kachańnie, kłopat, pryhažość i harantavanaja vyhoda. Tak, jašče treba krychu prykłaści ruku, inakš poŭnaj kaštoŭnaści nie budzie. Zrabicie dla siabie.
Dom z učastkam 25 sotak, — zrabiŭ abjavu Jaŭhien Bułka. — Dom pabudavany pa novaj japonskaj technałohii. Idealnaja šuma– i ciepłaizalacyja. Amierykanskaja sistema aciapleńnia, kandycyjanavańnia i ŭvilhatnieńnia pavietra. Hatovy dla kruhłahadovaha pražyvańnia ŭ malaŭničym miescy, Šviejcaryja Biełarusi, pobač z harnałyžnymi kompleksami Łahojsk i Siličy.
Na ŭčastku dastatkova miesca dla pabudovy asnoŭnaj chaty, a hety možna vykarystoŭvać dla adpačynku vychodnaha dnia. Chata aciaplajecca elektrakatłom z kanviektaram abahravańnia pavietra, prytokava-vyciažnaja vientylacyja z funkcyjaj ačystki pavietra. Vykanana ŭsia razvodka santechniki i elektryki, ustanoŭleny jakasnyja vokny-profil sałamandar z dvuchkamiernymi škłopakietami. Centralnaja vada, miascovaja kanalizacyja, elektryčnaść, učastak kutni, pa susiedstvie les…»
Jaŭhien Bułka prosić za dom 25 000 dołaraŭ.
Televiadoŭcu zakidali pytańniami ab košcie: maŭlaŭ, čamu tak mała?! Jon byŭ zmušany navat zapisać davoli emacyjnaje videa, u jakim adkazaŭ adrazu ŭsim krytykam.
«Ja nie čakaŭ takoj kolkaści prapanoŭ… — kaža Jaŭhien. — Čałaviek 50 abo 100 mnie napisali za sutki, ja navat źbiŭsia z padliku. Takoj kolkaści zvankoŭ i paviedamleńniaŭ u mianie nikoli nie było. Situacyja prosta kapiec… Davajcie tak: kali niechta choča zabrać hety dom za 60 tysiač — zabirajcie, usich astatnich prapanoŭ ja razhladać nie budu. Dziakuj za ŭvahu, ale stolki krytyki, što 25 000 — heta nie košt, u čym padvoch? Niama nijakaha padvochu! Zabirajcie za 60 000! Kali vy hatovy zabrać maju maru… Niachaj usio budzie adekvatna. Dasyłajcie prapanovy pa košcie! Dyzajn-prajekt i prarab u padarunak. Biaspłatna!»
Akcior razam z žonkaj źjechaŭ ź Biełarusi. Ciapier jon žyvie ŭ Izraili, pracuje sanitaram u adnoj ź miascovych klinik.
«U hateli staić achova tolki praz toje, što ty biełaj rasy». Jak biełarus pracavaŭ u Vjetnamie, Zimbabve i Filipinach9
Kamientary