Adna z najbahaciejšych žančyn Vjetnama prajhrała apielacyju. Kali jana nie zmoža sabrać $9 miljardaŭ, jaje pakarajuć śmierciu
Vjetnamskaja pradprymalnica Čyonh Mi Łan, adna z najbahaciejšych žančyn krainy, prajhrała apielacyju pa spravie ab machlarstvie, ale jaje prysudzili da śmiarotnaha pakarańnia. Jana moža paźbiehnuć vyšejšaj miery, kali zapłacić 9 młrd dalaraŭ ZŠA — try čverci ad sumy, jakuju jana atrymała ŭ vyniku svajho machlarstva, piša Bi-bi-si.
68-hadovaja Čyonh Mi Łan była prysudžanaja da śmiarotnaha pakarańnia ŭ krasaviku.
Jak ustanaviŭ sud, Čyonh Mi Łan za pieryjad z 2011 da 2022 hoda atrymała kredyty na sumu 304 trłn donhaŭ (blizu 12,5 młrd dalaraŭ ZŠA) ad banka Saigon Commercial Bank. Heta — amal 3% ad VUP Vjetnama ŭ 2022 hodzie. Pry hetym ahulnaja škoda ad jaje dziejańniaŭ aceńvajecca ŭ 27 młrd dalaraŭ.
Zhodna z vjetnamskim zakonam, kali prysudžanyja da śmiarotnaha pakarańnia za ekanamičnyja złačynstvy viernuć 75% vykradzienych srodkaŭ, ich žyćcio zachavajuć.
Tak što Čyonh Mi Łan pavinna zapłacić kala 9 młrd dalaraŭ, kab paźbiehnuć śmiarotnaha pakarańnia.
U chodzie apielacyi abarona pradprymalnicy prasiła źmianić prysud na pažyćciovaje źniavoleńnie. Pa słovach advakataŭ, joj budzie našmat praściej sabrać nieabchodnuju sumu, kali nad asudžanaj nie budzie navisać pahroza śmiarotnaha pakarańnia. Kab sabrać 9 młrd dalaraŭ, Čyonh Mi Łan treba pradać aktyvy, naprykład, nieruchomaść u Chašyminie, akcyi i doli ŭ pradpryjemstvach i budaŭničych prajektach.
«Ahulny košt jaje aktyvaŭ pieravyšaje patrabavanuju sumu kampiensacyi», — rastłumačyŭ Bi-bi-si adzin ź jaje advakataŭ. «Adnak dla ich prodažu treba prykłaści šmat namahańniaŭ i vydatkavać šmat času: mnohija ź jaje aktyvaŭ — heta nieruchomaść, jakuju nielha chutka realizavać».
Niahledziačy na arhumienty abarony, sud nie staŭ źmianiać prysud Čyonh mi Łan. U jaje jašče zastałasia mahčymaść paprasić prezidenta ab amnistyi.
Kali mienavita płanujecca pryvieści prysud u vykanańnie, nieviadoma: Vjetnam stavicca da śmiarotnaha pakarańnia jak da dziaržaŭnaj tajamnicy i nie publikuje danyja pra jaje. Jak praviła, pamiž prysudam i vykanańniem prachodzić niekalki hadoŭ, choć źniavolenym paviedamlajuć ab budučym pakarańnia zusim niezadoŭha da jaho.
Sprava Čyonh Mi Łanh — redki vypadak, kali žančynu ŭ Vjetnamie prysudžajuć da śmiarotnaha pakarańnia za ekanamičnaje złačynstva. Zbolšaha heta tłumačycca biesprecedentnym maštabam kryminalnaj spravy. Dziaržaŭny bank Vjetnama, miarkujučy pa ŭsim, vydatkavaŭ miljardy dalaraŭ na rekapitalizacyju Saigon Commercial Bank, kab paźbiehnuć paniki ŭ bankaŭskim siektary.
Akramia Čyonh Mi Łan, pa kryminalnaj spravie prachodzili jašče 85 čałaviek, u tym liku jaje muž i plamieńnica. Usie jany byli pryznanyja vinavatymi i atrymali ad troch hadoŭ umoŭna da 20 hadoŭ źniavoleńnia.
U kastryčniku Čyonh Mi Łan była prysudžanaja da pažyćciovaha źniavoleńnia pa inšaj kryminalnaj spravie — ab admyvańni hrošaj.
Kamientary