Stvaralnika Prahramy Kalinoŭskaha ŭ Varšavie nichto nie biŭ — jon sam zvaliŭsia ź leśvicy
Rehijanalnaja prakuratura akruhi «Śrudmieście-Poŭnač» u Varšavie paviedamiła pra spynieńnie rasśledavańnia ŭ spravie źbićcia stvaralnika Prahramy Kastusia Kalinoŭskaha Jana Malickaha 19 śniežnia 2024 hoda. Farmuloŭka pryniataha rašeńnia — «u suviazi z vysnovaj, što złačynstva nie było ździejśniena».
Pavodle paviedamleńnia prakuratury, padčas śledstva piać razoŭ byŭ dapytany sam paciarpieły, praviedzienyja dopyty adzinaccaci inšych śviedkaŭ, ahlad miesca zdareńnia, ahlad paciarpiełaha, analiz videazapisaŭ z kamier nazirańnia, ahlad telefona, a taksama atrymana ekśpiertnaje zaklučeńnie ŭ halinie sudovaj miedycyny adnosna charaktaru i miechanizmu ŭźniknieńnia traŭmaŭ.
U vyniku była zroblena vysnova, što
«nivodzin z dastupnych dokazaŭ nie śviedčyć pra toje, što paškodžańni Jana Malickaha byli vynikam dziejańniaŭ abo biaździejnaści inšaj fizičnaj asoby».
Na padstavie sabranych dokazaŭ prakuror pryjšoŭ da vysnovy, što traŭmy Jana Malickaha stali vynikam niaščasnaha vypadku. Jon, maŭlaŭ, spatyknuŭsia ab niaroŭnaść tratuara abo prystupak u varšaŭskim Kazimiežaŭskim parku, što mahło pryvieści da straty pamiaci. Pra heta zajaŭlaŭ i sam paciarpieły.
Dyrektar Centra ŭschodniejeŭrapiejskich daśledavańniaŭ Varšaŭskaha ŭniviersiteta Jan Malicki śćviardžaŭ, što byŭ źbity nieviadomymi ŭ varšaŭskim Kazimiežaŭskim parku.
U intervju haziecie Rzeczpospolita jon havaryŭ, što ŭ noč z 19 na 20 śniežnia ŭ Kazimiežaŭskim parku, što kala Varšaŭskaha ŭniviersiteta, na jaho napali dvoje mužčyn. Spačatku nieviadomyja spytali, jak jaho zavuć, a kali jon nazvaŭsia, udaryli pa hałavie. Prafiesar Jan Malicki straciŭ prytomnaść i ačuŭsia tolki ŭ mašynie chutkaj dapamohi. Pierad zdareńniem jon byŭ na sustrečy, jakaja skončyłasia pozna, a paśla pajšoŭ praz drenna aśvietleny Kazimiežaŭski park.
U Malickaha tady vyjaviłasia surjoznaja traŭma hałavy: pierałom čerapa, dźvie hiematomy i strasieńnie mazhoŭ.
Kamientary