Кітайскі лідар зладзіў прэзідэнту Францыі раскошны прыём падчас афіцыйнага візіту. Гэты факт аналітыкі разглядаюць як прызнанне Пекінам важнасці захаваць нармальныя адносіны з Еўрапейскім саюзам. Што гэта значыць для нашага рэгіёна?
Кітайскі лідар зладзіў прэзідэнту Францыі незвычайна шчодры прыём падчас афіцыйнага візіту. Гэты факт некаторыя аналітыкі разглядаюць як прыкмету намераў Пекіна любым коштам захаваць добрыя адносіны з Еўрапейскім саюзам, без гандлю з якім эканоміка Кітая абваліцца.
Важнасць, якую афіцыйны Пекін надае адносінам з адной з ключавых краін ЕС, падкрэслівае той факт, што Эмануэль Макрон быў запрошаны кітайскім лідарам у Гуанчжоу, сталіцу правінцыі Гуандун — якой у свой час кіраваў бацька Сі Цзіньпіна. Там яны разам выпілі чаю. Такія паездкі з замежнымі лідарамі здараюцца нячаста, звяртае ўвагу Reuters. У кітайскай цырыманіяльнай традыцыі яны значаць шмат.
Reuters спасылаецца на словы прафесара кітаязнаўства і замежнай палітыкі Дэнверскага ўніверсітэта Чжао Суншэнга аб тым, што
«усе кітайскія замежнапалітычныя дзеянні маюць фонам амерыкана-кітайскія адносіны. Таму супрацоўніцтва з любой краінай, асабліва з сярэднімі або вялікімі дзяржавамі як Францыя, — гэта тое, што яны будуць спрабаваць зрабіць, каб супрацьстаяць ЗША».
На думку аналітыка Rhodium Group Ноа Баркіна, галоўная мэта Кітая — каб Еўропа займала адносна Кітая больш мяккую пазіцыю, чым Злучаныя Штаты.
Гэтую думку пацвярджае і рэдакцыйны артыкул, размешчаны ў чацвер 6 красавіка ў кітайскай афіцыйнай газеце «Global Times»:
«Усім ясна, што быць стратэгічным васалам Вашынгтона — гэта тупік. Ператварэнне адносін паміж Кітаем і Францыяй у мост для супрацоўніцтва паміж Кітаем і Еўропай выгаднае абодвум бакам і цэламу свету».
Як вядома, Эмануэль Макрон здзейсніў свой візіт разам з кіраўніцай Еўрапейскай камісіі Урсулай фон дэр Ляен. Яе павітальная цырымонія ў аэрапорце была больш сціплай. Яе не запрашалі на некаторыя мерапрыемствы з удзелам лідараў дзвюх краін, а вось Макрон сустракалі па максімальнай праграме, зусім не на тым узроўні, на якім нядаўна прымалі Аляксандра Лукашэнку.
Макрон і фон дэр Ляен, у першую чаргу, прасілі ад Пекіна больш канкрэтных дзеянняў ва ўрэгуляванні вайны на Украіне.
Аналітык Ноа Баркін адзначае адносна гэтага:
«Макрон, здавалася, верыў, што зможа пераканаць Сі, каб той змяніў свой падыход да вайны. Ён прыехаў не з голымі рукамі — прывёз з сабой велізарную дэлегацыю бізнэс-колаў і пацвердзіў сваю падтрымку стратэгічнай аўтаноміі Еўропы», — мяркуе аналітык.
Аднак ад Кітая Макрону ўдалося дабіцца не так і шмат. Напярэдадні візіту пасол Кітая пры Еўрапейскім саюзе заявіў, што Пекін не падтрымлівае ваеннай аперацыі Расіі ва Украіне, а заявы пра «безгранічную дружбу» з Масквой не больш чым рыторыка. Падчас самога візіту Пекін паабяцаў падтрымаць мірны план Францыі — калі такі будзе. Але гэта, зноў жа, рыторыка. «Перад Макронам Сі Цзіньпін непахісны» — такі загаловак дае аналізу візіту ў Пекін добра інфармаванае французскае выданне Le Monde.
Аднак ключавое — гэта цэны, па якіх Кітай купляе ў Расіі нафту і газ, і пастаўкі мікрасхем для расійскай зброі. Пакуль Кітай не парушаў столі цэн, устаноўленай Захадам, каб абмежаваць здольнасць Масквы фінансаваць вайну. А значных паставак зброі, боепрыпасаў і мікрасхем не фіксуецца. Гэта важней за словы.
Падкрэсленая дэманстрацыя павагі Кітая да Макрона ўпісваюцца ў дыпламатычную стратэгію Кітая, які спрабуе аслабіць выдаткі стрымлівання Злучанымі Штатамі на фоне рознагалоссяў наконт Тайваня, вайны ва Украіне і абмежаванняў ЗША на экспарт тэхналогій.
У 2023 годзе дыпламатычныя выдаткі Кітая выраслі на 12,2 працэнта. Толькі за апошнія некалькі тыдняў кітайскія лідары і высокапастаўленыя чыноўнікі наведалі Расію, Сінгапур, Малайзію, Іспанію і Японію.
У сакавіку Кітай выступіў пасрэднікам у вырашэнні канфлікту паміж Саудаўскай Аравіяй і Іранам. Гэта дазволіла Пекіну заявіць аб сваёй ролі міратворца на Блізкім Усходзе, што адпавядае яго жаданню гуляць большую ролю ў свеце.
У найбліжэйшыя тыдні чакаюцца візіты ў Пекін кіраўніка замежнапалітычнай службы Еўрасаюза Жазэпа Барэля і міністра замежных спраў Германіі.
У ЗША да дыпламатычнага ўзаемадзеяння Кітая з Францыяй ставяцца з доляй скептыцызму. Па даных некаторых крыніц, Вашынгтон вычэквае, каб пабачыць, ці еўрапейскія размовы з Пекінам па Украіне выведуць на нейкую канкрэтыку.
Чытайце яшчэ:
Сі Цзіньпін паабяцаў Макрону падтрымаць французскі мірны план па Украіне
Стала вядома імя чалавека, якога сілавікі назвалі першым затрыманым па справе «Гаюна»34
Каментары
Лживая, лукавая и людоедская власть.