Łukašenka papiaredziŭ, što ŭ hetym hodzie znoŭ budzie asabliva ciažka, i pryznaŭsia, što choča nadalej zachavać uładu
Pryznačajučy Juryja Čabatara na pasadu ministra ekanomiki, Alaksandr Łukašenka zajaviŭ, što chacieŭ by bačyć aktyŭnuju rolu ministerstva, bo «hod u nas asablivy», to-bok hod da prezidenckich vybaraŭ.
«Budziem havaryć sumlenna i ščyra, kab nas da čarhovych prezidenckich vybaraŭ praz hod nie paprakali, što my tam niedzie julili-krucili, niapraŭdu kazali i ŭvohule ŭłada «naša ni da čaho nie prydatnaja, jak ciapier užo pačynajuć heta raskručvać», — skazaŭ Łukašenka.
A ŭ asnovie ŭsiaho, dadaŭ jon, lažyć ekanomika.
«Lohka nie budzie. Budzie ciažka, asabliva sioleta, — papiaredziŭ Łukašenka. — Nie tamu, što ciapierašni prezident choča być i dalej prezidentam. Nie tamu, što niechta čahości choča…» — pačaŭ jon, ale tak i nie davioŭ da kanca dumku, čamu ž mienavita hety hod budzie asabliva ciažkim.
Łukašenka papiaredziŭ Čabatara, što ŭ asnovie pracy taho pavinna lažać praŭda. «Nijakaha pierabolšvańnia. Rana ci pozna ja heta zaŭvažu. U mianie dastatkova dla hetaha ryčahoŭ. Tamu ni ŭ jakim razie nie chłusić. Usio jak jość. Tamu što kali vy, miakka kažučy, niedakładnuju infarmacyju budziecie davać mnie, značyć, buduć niapravilnyja kiraŭničyja rašeńni», — skazaŭ Łukašenka.
Pryznačajučy staršyniu Maładziečanskaha rajvykankama, Łukašenka papiaredziŭ taho taksama, što čakaje vynikaŭ.
«Kali vy prymajecie hetu pasadu, pamrycie, ale pavinien być vynik», — natchniŭ Łukašenka.
Pryznačajučy pasłom u Indyi Michaiła Kaśko, Łukašenka namiaknuŭ, što toj moža viarnucca dadomu za kraty. Da hetaha času Kaśko zajmaŭ pasadu staršyni kancerna Biellespapierapram.
«Michaił Michajłavič, što datyčycca vas, ja pahadziŭsia na pryznačeńnie. Ale ŭ mianie, viadoma, buduć pretenzii da vas. Vy viedajecie, u jakim stanie siońnia vašaje ministerstva faktyčna, i mnie vielmi nie chaciełasia b, kab maje padazreńni ŭ tym, što vas chočuć prosta cichieńka zrušyć na niejkuju inšuju pasadu, kab heta paćvierdziłasia ŭ budučyni, — skazaŭ Łukašenka. I dadaŭ: — Uratuj vas boh dumać, što heta dla vas adpačynak ci vy syšli kudyści ŭbok».
Stała zrazumieła, čamu kiraŭnik biełaruskaha Ernst&Young nie zmoh asabista raźvitacca z kalektyvam4
Kamientary