Бізнэсмен Анатоль Трухановіч, бацька кандыдаткі ў прэзідэнты Ганны Канапацкай і яе давераная асоба, даў інтэрв'ю сайту Ej.by. У ім ён прызнаўся, што не разумее паводзіны дачкі.
— Многія не разумеюць учынкаў вашай дачкі ў перыяд прэзідэнцкай кампаніі, можа быць, вы зможаце растлумачыць усё гэта?
— І я не разумею, і сястра не разумее, уся сям'я не разумее. І Ганна з-за гэтага вельмі перажывае. Я не ведаю, чаму так адбываецца, можа быць, гэта залішняе хваляванне… Я бачу ў ёй дух сям'і, нацэленасць на справядлівасць. Але вось гэтыя яе выступы — гэта зусім не падобна да яе. Я выхоўваў сваіх дачок так, што не проста трэба быць абывацелем, а перажываць за вялікае, калі хочаш быць вялікім.
— Вы сказалі, што не разумееце цяпер дачку, што паводзіны да яе не падобныя, а што канкрэтна вам не падабаецца?
— Ну, напрыклад, навошта так груба казаць пра Бабарыку? Асабіста мяне гэта таксама карабаціць. На фоне таго, што ў нас ужо ёсць такі прэзідэнт, які не сочыць за тым, што кажа, і тут дачка такая. Мне здаецца, што гэта няправільна. За ёй жа ніколі такога не вадзілася. У сям'і ў нас нават грубых інтанацый не было. Мы заўсёды асуджалі з ёй, як прэзідэнт груба кажа пра кагосьці. Не павінен так кандыдат казаць, тым больш прэзідэнт. Ад прэзідэнта чакаем мудрасці. З мудрасці выцякае тры асаблівасці: правільна аналізаваць, беспамылкова гаварыць і бездакорна дзейнічаць.
Вядома, трэба разумець, што калі прадстаўнік расійскага банка будзе ў Беларусі прэзідэнтам, то гэта будзе несці пэўныя рызыкі. Так і трэба казаць, дыпламатычна. Людзі ўсё зразумеюць. Не трэба гэтых грубых параўнанняў. Яна дапусціла тут памылку. Лічу, што яна павінна папрасіць прабачэння. Памыляюцца ўсе, але толькі дурні не прызнаюць свае памылкі.
— Вы спрабавалі паўплываць на дачку ці яна вас не слухае?
— Ганна ўжо дарослая і сама прымае рашэнні, асабліва не слухае, але прыслухоўваецца. Я ёй выказаў свой пункт гледжання з гэтай нагоды. Вось, напрыклад, быў просты крок: пайсці на Камароўку і арганізаваць там пікет. Але Ганна кажа, што нельга прыпадабняцца прэзідэнту і ў самы пік каранавіруса праводзіць нейкія масавыя мерапрыемствы, як ён праводзіў парад. Правільная матывацыя, ну так і растлумач людзям. Але чамусьці словы атрымаліся іншыя. Матывацыя адна, а іншае тлумачэнне.
— Можа быць, дарадцы ў штабе такія?
— Ну калі мы будзем казаць, што цар добры, а ўсе астатнія дрэнныя — гэта будзе няправільна. Калі ў цябе каманда дрэнная, то прабач, ты ў гэтым вінаваты.
***
— Як вы лічыце, шанцы ў Ганны перамагчы ў гэтай гонцы яшчэ ёсць?
— …Ганна адвярнула ад сябе частку свайго электарату, яна не зразумела, што людзі будуць галасаваць не за кагосьці, а супраць. Калі яна выбачыцца, калі ў астатні час скажа, што трэба… Калі ўсё гэта зробіць, калі выбары былі б сумленнымі, шанцы ў яе былі б высокія.
Чытайце таксама:
Канапацкая параўнала Бабарыку з педафілам, якому нельга працаваць у дзіцячым садзе
Канапацкая: Святлана Ціханоўская абмежавана дзеяздольная
Канапацкая з лазні: За палітычнымі амбіцыямі спрабуюць схаваць звычайную карупцыйную крымінальшчыну
Стала вядома імя чалавека, якога сілавікі назвалі першым затрыманым па справе «Гаюна»34
Каментары