«Žyvu ŭ svabodnaj krainie»: padletak pasadziŭ na ziamlu eks-kiraŭnika HUBAZiKa. Toj u adkaz pačaŭ stralać PADRABIAZNAŚCI
Jak stała viadoma «Našaj Nivie», trapiŭ u historyju sumnaviadomy Andrej Paršyn, adzin z asnoŭnych arhanizataraŭ masavych represij u Biełarusi i da niadaŭniaha času kiraŭnik HUBAZiKa. Jon pasprabavaŭ razahnać hrupu dziaciej i padletkaŭ kala svajho padjezda (małodšamu ŭ kampanii było 11 hod), ale atrymaŭ adpor ad 16-hadovaha chłopca. Vynik: chłopiec u balnicy pad kropielnicami z prastrelenaj nahoj, u Paršyna — strasieńnie mozhu.
Hetaje zdareńnie adbyłosia 21 červienia ŭ prestyžnym minskim mikrarajonie «Kaskad». «Naša Niva» znajšła niekalki śviedkaŭ taho, što adbyłosia.
«Kampanija ź piaci dziaciej siadzieła na łavačcy kala padjezda. Para dziaŭčat, chłopcy. Mienšamu ŭ kampanii było 11 hadoŭ. Usie na kanikułach, prosta bavili čas — było trochi raniej za 19 hadzin, — raskazvaje «Našaj Nivie» abstaviny historyi adzin sa śviedkaŭ. — Tut dadomu viartaŭsia pałkoŭnik Andrej Paršyn i pačaŭ ź dziećmi kanflikt. Maŭlaŭ, čaho siadzicio, vaš padjezd? Nie vaš? Pravalvajcie. Tolki ŭsio matam».
U adkaz na pretenzii mužčyny starejšy ź dziaciej, 16-hadovy Jaŭhien D., kažuć, zajaviŭ, što «jany žyvuć u svabodnaj krainie, i volnyja vybirać łavačku».
U adkaz na dziorzki ton, śćviardžaje śviedka, Paršyn udaryŭ padletka — pa tvary, pa šyi.
«Uchapiŭ za majku, razarvaŭšy jaje adnym rucham, daŭ chłopcu pa tvary. Ale Jaŭhien — kandydat u majstry sportu pa viesłavańni, spartovy chłopiec. Jon znajšoŭ arhumient u adkaz, u vyniku čaho Paršyn apynuŭsia na ziamli. Padniaŭšysia, pačaŭ šmalać ź pistaleta pa dzieciach», — kaža śviedka.
U vyniku ranieńnie atrymaŭ toj samy Jaŭhien D. Kula trapiła ŭ nahu.
«Paśla hetaha Paršyn zanios zbroju dadomu i vyklikaŭ chutkuju, a taksama milicyju i jašče nieviadoma kaho. Astatnich dziaciej «apracoŭvali» ŭ mašynie ludzi ŭ cyvilnym, pakul miedyki chutkaj ratavali Jaŭhiena. Kazali, što, kali buduć raskazvać, jak usio było, to ŭsich čakaje turma. Paśla hetaha dziaciej źvieźli na inšych mašynach, milicejskich», — kažuć śviedki.
My nie viedajem, ź jakoj zbroi stralaŭ Paršyn, bajavoj ci traŭmatyčnaj, ale viadoma, što na dadzieny momant chłopiec znachodzicca pad kanvojem u vajskovym špitali. Jon pieranios užo dźvie apieracyi.
Suprać jaho zaviedziena kryminalnaja sprava pa artykule «Chulihanstva». Nočču ŭ siamju z vobšukam pryjazdžali supracoŭniki HUBAZiKa. Małaletniaja dziaŭčyna chłopca, jakoj 14 hadoŭ, imavierna, taksama praviała noč u milicyi. Los astatnich nieviadomy, chutčej za ŭsio, ich nie zatrymlivali.
Siamja Jaŭhiena — šmatdzietnaja, baćki vychoŭvajuć čatyroch dziaciej.
«Vielmi dobraja ŭ jaho maci. Dzieci hadujucca ŭ strohaści, sumlennaści i paradku. Na Jaŭhiena — tolki stanoŭčaja rekamiendacyja, narmalny, tałkovy chłopiec. Spartoviec, paradačny, nie kanfliktny. Adkazny za blizkich, bo raście ŭ vialikaj siamji, u vučobie nie durań», — kaža znajomy ź situacyjaj siabra siamji paciarpiełych.
«Uvieś dom u šoku. Jak heta? Čałaviek słužyć u milicyi, navučany, nibyta viedaje zakony. Navat kali dzieci šumieli, to što — stralać pa ich? Jość ža niejkija patrulnyja, jakich možna vyklikać, jość jašče niejkija mietady viadzieńnia dyskusii, usie ŭ žachu», — kaža žychar doma.
Pa infarmacyi «Našaj Nivy», u Andreja Paršyna paśla kanfliktu ź dziciom — strasieńnie mozhu.
Andrej Paršyn uznačalvaŭ upraŭleńnie ŭłasnaj biaśpieki MUS, paśla čaho napačatku 2021-ha byŭ pryznačany kiraŭnikom u HUBAZiK.
Pry im HUBAZiK adyhryvaŭ centralnuju rolu ŭ praviadzieńni palityčnych represij: ź jaho ŭdziełam byli vyniščanyja palityčnyja struktury, niezaležnyja ŚMI, kultura, biznes, dziasiatki tysiač prajšli praz zatrymańni i ździeki abo vymušanyja byli pakinuć radzimu.
Niadaŭna Paršyn byŭ pryznačany na hienieralskuju pasadu ŭ Departamient zabieśpiačeńnia apieratyŭna-vyšukovaj dziejnaści MUS.
Paršyn maje kvateru ŭ «Kaskadzie».
Stała zrazumieła, čamu kiraŭnik biełaruskaha Ernst&Young nie zmoh asabista raźvitacca z kalektyvam2
Kamientary